ആഗോള ഭക്ഷ്യവസ്തുവായി മാറിയ ഇന്ത്യയുടെ മഖാന; എത്ര കഴിക്കണം? ഗുണങ്ങളറിയാം

ആഗോള ഭക്ഷ്യവസ്തുവായി അംഗീകരിക്കപ്പെട്ട ബിഹാറിലെ മഖാന, യുഎസ്എ, കാനഡ, അറബ് രാജ്യങ്ങള്‍ എന്നിവയ്ക്ക് പുറമെ യൂറോപ്പിലേക്കും മറ്റ് ഏഷ്യന്‍ രാജ്യങ്ങളിലേക്കും കയറ്റുമതി ചെയ്യുമെന്ന് കേന്ദ്ര കൃഷിമന്ത്രി ശിവരാജ് സിംഗ് ചൗഹാന്‍ കഴിഞ്ഞ ദിവസം പ്രഖ്യാപിച്ചിരുന്നു.

പട്‌നയില്‍ നടന്ന മഖാന ഫെസ്റ്റിവലിന്റെ ഉദ്ഘാടന വേളയില്‍ സംസാരിക്കവെ, ആഫ്രിക്കന്‍ രാജ്യങ്ങളിലേക്കുള്ള കയറ്റുമതിക്കും കരാര്‍ ഒപ്പിട്ടതായി അദ്ദേഹം പറഞ്ഞിരുന്നു. മഖാന ബിഹാറിന്റെ അഭിമാനം മാത്രമല്ല, ഇന്ത്യന്‍ പാരമ്പര്യത്തിന്റെയും മൂല്യങ്ങളുടെയും കര്‍ഷകരുടെ കഠിനാധ്വാനത്തിന്റെയും പ്രതീകം കൂടിയാണെന്നാണ് മന്ത്രി അഭിപ്രായപ്പെട്ടത്.

ബിഹാറിലെ മഖാനയ്ക്കും അവിടുത്തെ കര്‍ഷകര്‍ക്കും ആഗോള അംഗീകാരം ഉറപ്പാക്കാന്‍ സാധ്യമായ എല്ലാ പിന്തുണയും കൃഷി മന്ത്രാലയം നല്‍കുമെന്ന് അദ്ദേഹം ഉറപ്പുനല്‍കി. മഖാന കൃഷി, ഉത്പാദനം, കയറ്റുമതി എന്നിവ ശക്തിപ്പെടുത്തുന്നതിനുള്ള ശ്രമങ്ങള്‍ മഖാന ബോര്‍ഡ് ആരംഭിച്ചതായും അദ്ദേഹം കൂട്ടിച്ചേര്‍ത്തു.

മഖാനയുടെ ഗവേഷണത്തിനും വികസനത്തിനുമാണ് മന്ത്രാലയത്തിന്റെ പ്രധാന മുന്‍ഗണന. ഉത്പാദനം വര്‍ധിപ്പിക്കുന്നതിന് അത്യുല്‍പാദന ശേഷിയുള്ള വിത്തിനങ്ങള്‍ വികസിപ്പിക്കേണ്ടത് ആവശ്യമാണെന്ന് പറഞ്ഞ മന്ത്രി ഇന്ത്യന്‍ കൗണ്‍സില്‍ ഓഫ് അഗ്രികള്‍ച്ചറല്‍ റിസര്‍ച്ച് ഇതിനായി പ്രവര്‍ത്തിക്കുന്നുണ്ടെന്നാണ് ജനങ്ങളോട് പറഞ്ഞത്. മഖാനയുടെ ഗവേഷണ-വികസന പ്രവര്‍ത്തനങ്ങള്‍ക്ക് ഫണ്ടിന്റെ കുറവുണ്ടാകില്ലെന്നും കേന്ദ്രമന്ത്രി ഉറപ്പുനല്‍കിയിരുന്നു.

എന്താണ് മഖാന?
പോഷകഗുണങ്ങളുള്ള ഭക്ഷണവസ്തുവാണ് മഖാന അഥവാ താമരവിത്ത്. എളുപ്പത്തില്‍ തിരഞ്ഞെടുക്കാവുന്ന ലഘുഭക്ഷണ് മഖാന വിഭവങ്ങള്‍. ശരീരഭാരം കുറയ്ക്കാന്‍ ശ്രമിക്കുന്നവര്‍ തിരഞ്ഞെടുക്കുന്ന സൂപ്പര്‍ഫുഡുകളില്‍ ഒന്ന്. വറുത്തോ, ലഘുഭക്ഷണമായോ, സൂപ്പുകളില്‍ ചേര്‍ത്തോ മഖാന കഴിക്കാം. മഖാന നല്‍കുന്ന ആരോഗ്യ ഗുണങ്ങള്‍ എന്തെല്ലാമാണെന്ന് പരിശോധിക്കാം.

1. പോഷക സമ്പുഷ്ടം
മഖാനയില്‍ കലോറി കുറവാണെങ്കിലും പ്രോട്ടീന്‍, കാത്സ്യം, മഗ്‌നീഷ്യം, ഫൈബര്‍, ഇരുമ്പ്, പൊട്ടാസ്യം, ഗുണകരമായ ആന്റി ഓക്‌സിഡന്റുകള്‍ എന്നിവയുള്‍പ്പെടെയുള്ള അവശ്യ പോഷകങ്ങള്‍ ധാരാളം അടങ്ങിയിരിക്കുന്നു.

2. ശരീരഭാരം കുറയ്ക്കാന്‍ സഹായിക്കുന്നു
ശരീരഭാരം കുറയ്ക്കാന്‍ സഹായിക്കുന്ന ഒരു ലഘുഭക്ഷണമാണ് മഖാന. ഇത് നിങ്ങളുടെ ആകെ കലോറിയുടെ അളവ് കാര്യമായി വര്‍ധിപ്പിക്കാതെ വിശപ്പ് നിയന്ത്രിക്കാന്‍ സഹായിക്കും. ഇതിലെ ഉയര്‍ന്ന പ്രോട്ടീനും ഫൈബറും കൂടുതല്‍ നേരം വയറുനിറഞ്ഞതായി തോന്നാന്‍ സഹായിക്കുന്നു.

3. രക്തത്തിലെ പഞ്ചസാരയുടെ അളവ് നിയന്ത്രിക്കുന്നു
മഖാന കഴിക്കുന്നത് രക്തത്തിലെ പഞ്ചസാരയുടെ അളവ് നിയന്ത്രിക്കാന്‍ സഹായിക്കുമെന്ന് പഠനങ്ങള്‍ സൂചിപ്പിക്കുന്നു. മഖാനയുടെ കുറഞ്ഞ ഗ്ലൈസെമിക് ഇന്‍ഡെക്‌സ് പ്രമേഹരോഗികള്‍ക്കും ഇത് അനുയോജ്യമാക്കുന്നു.

4. വാര്‍ധക്യത്തെ ചെറുക്കുന്ന ഗുണങ്ങള്‍
മഖാനയില്‍ ആന്റി ഓക്‌സിഡന്റുകള്‍ ധാരാളം അടങ്ങിയിട്ടുണ്ട്. ഇത് ഓക്‌സിഡേറ്റീവ് സ്‌ട്രെസ്സിനെ ചെറുക്കാനും ചര്‍മത്തിന്റെ ആരോഗ്യം മെച്ചപ്പെടുത്താനും സഹായിക്കും. ഗ്ലൂട്ടാമിന്‍, സിസ്റ്റിന്‍, അര്‍ജിനൈന്‍, മെഥിയോണിന്‍ എന്നിവയുള്‍പ്പെടെ ചര്‍മത്തിന്റെ ഇലാസ്തികതയെ സഹായിക്കുന്ന നിരവധി അമിനോ ആസിഡുകള്‍ മഖാനയില്‍ അടങ്ങിയിട്ടുണ്ടെന്ന് പഠനങ്ങള്‍ സൂചിപ്പിക്കുന്നു. മഖാന കഴിക്കുന്നത് ചുളിവുകള്‍ കുറയ്ക്കാനും പ്രായമാകുമ്പോള്‍ ചര്‍മത്തിന്റെ ആരോഗ്യം നിലനിര്‍ത്താനും സഹായിച്ചേക്കാം.

5. ഹൃദയാരോഗ്യം മെച്ചപ്പെടുത്തുന്നു
മഖാന കഴിക്കുന്നത് ചീത്ത കൊളസ്‌ട്രോളിന്റെ അളവ് കുറയ്ക്കാനും ഹൃദയത്തിന്റെ മൊത്തത്തിലുള്ള ആരോഗ്യം മെച്ചപ്പെടുത്താനും സഹായിക്കുമെന്ന് തെളിയിക്കപ്പെട്ടിട്ടുണ്ട്.
മഖാന എത്ര അളവില്‍ കഴിക്കണം?
എന്തും അമിതമായാല്‍ ആരോഗ്യത്തിന് ഹാനികരമാകും. ഒരു ദിവസം അമിതമായി മഖാന കഴിക്കുന്നത് ചില പാര്‍ശ്വഫലങ്ങള്‍ക്ക് കാരണമായേക്കാം. പ്രതിദിനം ഏകദേശം 30 ഗ്രാം (ഏകദേശം ഒരു കൈപ്പിടി) ആണ് മിതമായ അളവ്.

മഖാന അമിതമായി കഴിക്കുന്നതിന്റെ പാര്‍ശ്വഫലങ്ങള്‍ എന്തൊക്കെയാണ്?
നാരുകള്‍ ധാരാളം അടങ്ങിയ ഭക്ഷണങ്ങള്‍ ശരിയായ അളവിലാണ് കഴിക്കേണ്ടത്. നാരുകള്‍ അമിതമായി കഴിക്കുന്നത് ചിലര്‍ക്ക് ദഹനപ്രശ്‌നങ്ങള്‍ക്ക് കാരണമാകും. മഖാനയില്‍ കാത്സ്യം ധാരാളം അടങ്ങിയിട്ടുണ്ട്. ഇത് അമിതമായി കഴിച്ചാല്‍ വൃക്കയില്‍ കല്ലുകള്‍ ഉണ്ടാകാനുള്ള സാധ്യത കൂടുന്നു. അമിതമായി കഴിക്കുന്നത് ശരീരഭാരം കൂടാനും കാരണമായേക്കാം.

ആരൊക്കെയാണ് മഖാന ഒഴിവാക്കേണ്ടത്?

1. അലര്‍ജികള്‍

നട്‌സിനോടോ വിത്തുകളോടോ അലര്‍ജിയുള്ളവര്‍ ജാഗ്രത പാലിക്കുകയും മഖാന ഭക്ഷണത്തില്‍ ചേര്‍ക്കുന്നതിന് മുമ്പ് ഒരു ആരോഗ്യ വിദഗ്ധന്റെ ഉപദേശം തേടുകയും വേണം.

2. നിലവിലുള്ള രോഗാവസ്ഥകള്‍

വൃക്ക സംബന്ധമായ പ്രശ്‌നങ്ങള്‍ പോലുള്ള ചില രോഗാവസ്ഥകളുള്ളവരും പ്രത്യേക ഭക്ഷണക്രമം പിന്തുടരുന്നവരും മഖാന അവര്‍ക്ക് അനുയോജ്യമാണോ എന്ന് പരിശോധിക്കണം.

3. അളവ് നിയന്ത്രിക്കുക

അമിതമായ ഉപയോഗം ദഹനസംബന്ധമായ അസ്വസ്ഥതകള്‍ക്ക് കാരണമായേക്കാം, അതിനാല്‍ ശുപാര്‍ശ ചെയ്യുന്ന അളവില്‍ കഴിക്കേണ്ടത് പ്രധാനമാണ്. എപ്പോഴും നിങ്ങളുടെ ശരീരം ശ്രദ്ധിക്കുകയും അത് എങ്ങനെ ഭക്ഷണങ്ങളോട് പ്രതികരിക്കുന്നു എന്ന് മനസ്സിലാക്കുകയും ചെയ്യുന്നതാണ് ഏറ്റവും നല്ലത്. 

Content Highlights: Discover the health benefits of Makhana, a global superfood from India. Learn about its nutritional value, weight loss, blood sugar control, and more.