ഹീറ്റ് സ്ട്രെസ്സ് നിസ്സാരമല്ല, മാനസികാരോഗ്യത്തെ ബാധിക്കുന്ന വില്ലൻ; താപതരംഗം കേരളത്തെ വലയ്ക്കുമോ?

ഇന്ത്യയുടെ ഭൂപടം പരിശോധിച്ചാൽ അറബിക്കടലിന്റെയും പശ്ചിമഘട്ട മലനിരകളുടെയും ഇടയിലായി സ്ഥിതിചെയ്യുന്ന കൊച്ചുപ്രദേശമാണ് നമ്മുടെ കേരളം. കേരളത്തിന്റെ ഭൂപ്രകൃതി പൊതുവായി ഹൈ ഹ്യൂമിഡിറ്റി, അഥവാ ആർദ്രതയുള്ളതാണെന്നാണ് കണക്കാക്കപ്പെടുന്നത്. എന്നാൽ, കഴിഞ്ഞ പത്തുവർഷത്തെ ചരിത്രം പരിശോധിച്ചാൽ കേരളത്തിലെ കാലാവസ്ഥ പ്രവചനാതീതമാണ്. മഴയുടെ രൂപത്തിൽ കേരളം വലിയ ഭീഷണി നേരിട്ടുകഴിഞ്ഞു. നാം നേരിടാനിരിക്കുന്ന വലിയൊരു പാരിസ്ഥിതിക ഭീഷണി താപതരംഗം (Heat Wave) ആണ്.

താപതരംഗവും അതുമൂലമുണ്ടാകുന്ന ഹീറ്റ് സ്ട്രെസ്സും കേരളത്തെ എങ്ങനെ ബാധിക്കുന്നു എന്നാണ് കുസാറ്റ് റഡാർ ഗവേഷണകേന്ദ്ര വിഭാഗം ഡയറക്ടർ ഡോക്ടർ എസ്. അഭിലാഷ് വിശദീകരിക്കുന്നത്.

എന്താണ് താപതരംഗം?

സമതല പ്രദേശങ്ങളിൽ താപനില 40 ഡിഗ്രിക്ക് മുകളിലാവുകയും ശരാശരിയിൽനിന്ന് നാലഞ്ച് ഡിഗ്രി കൂടുകയും, ഈ അവസ്ഥ രണ്ടുദിവസം നിലനിൽക്കുകയും ചെയ്യുന്നതിനെയാണ് താപതരംഗം എന്ന് പറയുന്നത്. ഇതിന്റെ നിർവചനം പ്രദേശത്തിനനുസരിച്ച് വ്യത്യാസപ്പെടും.

ഹിൽസ്റ്റേഷനുകളിൽ താപനില 30 ഡിഗ്രി ആവുകയും ശരാശരിയിൽനിന്ന് 4-5 ഡിഗ്രി കൂടുകയും ചെയ്താൽ താപതരംഗമായി കണക്കാക്കാം. തീരദേശങ്ങളിൽ ഇത് 37 ഡിഗ്രിക്ക് മുകളിൽ ഉയരുകയും ശരാശരിയിൽനിന്ന് 4-5 ഡിഗ്രി കൂടുകയും വേണം. പരമ്പരാഗതമായി ഇന്ത്യയിൽ മാർച്ച് മുതൽ ജൂൺ വരെയാണ് താപതരംഗ സീസൺ.

വടക്കുപടിഞ്ഞാറൻ ഇന്ത്യമുതൽ തെലങ്കാനവരെയുള്ള ഭാഗങ്ങളാണ് പ്രധാനമായും ഹീറ്റ് വേവ് സോൺ ആയി അറിയപ്പെടുന്നത്. എന്നാൽ, 2015-16 കാലഘട്ടത്തിന് ശേഷം കേരളത്തിലും താപതരംഗം പ്രത്യക്ഷമാകുന്നുണ്ട്. കേരളത്തിൽ 37 ഡിഗ്രി സെൽഷ്യസിനോടൊപ്പം ഉയർന്ന ആർദ്രതകൂടി ആകുമ്പോൾ അത് വലിയ ആരോഗ്യ പ്രശ്നങ്ങളിലേക്ക് നയിക്കുന്നു. രാജസ്ഥാനിലെ 45 ഡിഗ്രിയേക്കാൾ നമുക്ക് ബുദ്ധിമുട്ടുണ്ടാക്കുന്നത് കൊച്ചിയിലെ 37 ഡിഗ്രി ചൂടായിരിക്കും.

നഗരങ്ങളിലെ സാഹചര്യം

നഗരങ്ങളിൽ ഗ്രാമപ്രദേശങ്ങളെക്കാൾ 2-3 ഡിഗ്രി താപനില കൂടുതലായിരിക്കും. അർബൻ ഹീറ്റ് ഐലൻഡ് (Urban Heat Island) എന്നാണ് ഈ പ്രതിഭാസത്തിൻ്റെ പേര്. ടാറിട്ട റോഡിനു മുകളിലെ വായുവിന് 38 ഡിഗ്രി രേഖപ്പെടുത്തിയാലും ഉപരിതലത്തിൽ 50 ഡിഗ്രിക്ക് അടുത്ത് ചൂടുണ്ടാകാം. എന്നാൽ, മരങ്ങളുടെ ചുവട്ടിൽ ഇത് 30-32 ഡിഗ്രി മാത്രമായിരിക്കും.

ഹ്യൂമിഡിറ്റി കൂടുമ്പോൾ നമ്മുടെ ശരീരത്തിലെ സ്വാഭാവിക കൂളിങ് സംവിധാനമായ വിയർപ്പിൻ്റെ ബാഷ്പീകരണം (Evaporative cooling) നടക്കാതാവുന്നു. 37-38 ഡിഗ്രി ചൂടും 50 ശതമാനം ഹ്യൂമിഡിറ്റിയും ഉണ്ടെങ്കിൽ നമ്മുടെ ശരീരം അനുഭവിക്കുന്ന ചൂട് 50 ഡിഗ്രിക്ക് അടുത്തായിരിക്കും.

നിർമാണ പ്രവർത്തനങ്ങൾ താപതരംഗങ്ങളെ എങ്ങനെ ബാധിക്കുന്നു?

അശാസ്ത്രീയമായ നിർമാണ പ്രവർത്തനങ്ങൾ വായുസഞ്ചാരത്തെ (Ventilation) തടസ്സപ്പെടുത്തുന്നു. കെട്ടിടങ്ങൾ കടൽക്കാറ്റിൻ്റെ ദിശയെ തടസ്സപ്പെടുത്താത്ത രീതിയിൽ കിഴക്ക്-പടിഞ്ഞാറ് ദിശയിൽ പണിയുന്നതാണ് നല്ലത്. ചതുപ്പുകളും കണ്ടൽക്കാടുകളും സംരക്ഷിക്കുന്നത് ചൂട് കുറയ്ക്കാൻ സഹായിക്കും.

2024 ഏറ്റവും ചൂടുള്ള വർഷമായിരുന്നു, 2026 എങ്ങനെയായിരിക്കും?

2024 ഒരു എൽ നിനോ (El Niño) വർഷമായിരുന്നു, അതുകൊണ്ടാണ് ആഗോളതാപനം ഇത്രയധികം അനുഭവപ്പെട്ടത്. 2026-ൽ നിലവിൽ എൽ നിനോ ഇല്ലെങ്കിലും മെയ്-ജൂൺ മാസത്തോടെ ചൂട് കൂടാൻ സാധ്യതയുണ്ട്. എന്തുതന്നെയായാലും 2026 ലോകചരിത്രത്തിലെ ഏറ്റവും ചൂടുള്ള പത്തു വർഷങ്ങളിൽ ഒന്നായിരിക്കാൻ സാധ്യതയുണ്ട്.

ചൂട് പ്രതിരോധിക്കാൻ വീടിനു മുകളിൽ ഷീറ്റ് ഇടുന്നതും മറ്റും ഫലപ്രദമാണോ?

കറുപ്പ് അല്ലെങ്കിൽ ചാരനിറമുള്ള ഷീറ്റുകൾ ചൂട് കൂടുതൽ ആഗിരണം ചെയ്യും. അതിനു പകരം വൈറ്റ് റൂഫ് ഷീറ്റുകൾ ഉപയോഗിച്ചാൽ 30 ശതമാനംവരെ സൂര്യപ്രകാശത്തെ പ്രതിഫലിപ്പിക്കാൻ സാധിക്കും. റോഡുകളിൽ ടാറിന് പകരം സിമന്റ് ബ്ലോക്കുകൾ ഉപയോഗിക്കുന്നതും വെള്ള നിറം അടിക്കുന്നതും ചൂട് കുറയ്ക്കാൻ സഹായിക്കും.

ജോലിസമയം ക്രമീകരിക്കുന്നത് എത്രത്തോളം പ്രധാനമാണ്?

ഉച്ചയ്ക്ക് 12 മുതൽ മൂന്നുമണി വരെയുള്ള സമയത്ത് നേരിട്ടുള്ള സൂര്യപ്രകാശം ഒഴിവാക്കേണ്ടത് അത്യാവശ്യമാണ്. ചൂട് കൂടുമ്പോൾ ആളുകളുടെ കാര്യക്ഷമത കുറയും. അതുകൊണ്ട് രാവിലെ നേരത്തെ ജോലി തുടങ്ങുന്നതോ വൈകുന്നേരം വൈകി ജോലി ചെയ്യുന്നതോ ആണ് നല്ലത്. ഇത് പോലീസുകാർക്കും ഡ്രൈവർമാർക്കും ഒക്കെ ബാധകമാണ്. പ്രകൃതിയിൽ പോലും മാറ്റങ്ങൾ സംഭവിക്കുന്നുണ്ട്. കണിക്കൊന്നകൾ നേരത്തെ പൂക്കുന്നത് ഇതിന്റെ ലക്ഷണമാണ്.

ഹീറ്റ് സ്ട്രെസ്സ് മാനസികാരോഗ്യത്തെ ബാധിക്കുമോ?

തീർച്ചയായും. ഇത് പ്രായമായവരെയും കുട്ടികളെയും ഗർഭിണികളെയും ആണ് കൂടുതൽ ബാധിക്കുന്നത്. ഹീറ്റ് സ്ട്രെസ്സ് ഡ്രൈവർമാരുടെ ഏകാഗ്രത കുറയ്ക്കാനും ആക്സിഡന്റുകൾ കൂടാനും കാരണമാകും. മൃഗങ്ങളിലും ഇത് പ്രകടമാണ്. ഹീറ്റ് വേവ് സമയത്ത് മുട്ടയുടെ വലിപ്പവും പാലിന്റെ അളവും കുറയുന്നതായി പഠനങ്ങൾ പറയുന്നു.

മുൻകരുതലുകൾ എന്തൊക്കെയാണ്?

മാർച്ച് പകുതി മുതൽ ഏപ്രിൽവരെ ഉച്ചസമയങ്ങളിൽ യുവി ഇൻഡെക്സ് (UV Index) കൂടുതലായിരിക്കും. അതിനാൽ ദാഹം തോന്നിയില്ലെങ്കിലും വെള്ളം കുടിക്കുക, അയഞ്ഞ വസ്ത്രങ്ങൾ ധരിക്കുക, ആൽക്കഹോളും കഫീനും ഒഴിവാക്കുക എന്നിവ പ്രധാനമാണ്. എളുപ്പം ദഹിക്കുന്ന ലഘുഭക്ഷണം കഴിക്കുന്നതാണ് നല്ലത്. ശാരീരിക വ്യായാമങ്ങൾ ഉച്ചസമയത്ത് ഒഴിവാക്കണം.

Content Highlights: Definition of heat waves across different geographical zones (plains, hills, coast)., Impact of high humidity on perceived temperature in Kerala., The role of Urban Heat Islands in intensifying city temperatures., Practical mitigation strategies like white roofing and architectural adjustments., Health precautions and workplace safety during peak heat hours.