'ചിലപ്പോൾ ആളുകൾ പരിഹസിക്കും, ചിലപ്പോൾ ആക്ഷേപിക്കും'; പ്രതിഫലം ആഗ്രഹിക്കാതെ ഒരു ഒറ്റയാള്‍ വിപ്ലവം

ചില മനുഷ്യരുണ്ട്. സാമാന്യ മനുഷ്യർ ഭ്രാന്തെന്നോ കിറുക്കെന്നോ പറയുന്ന കാര്യങ്ങൾ അസാധാരണമായ ഉള്ളുറപ്പോടെ പിന്തുടരുന്നവർ. അവനവനു വേണ്ടിയല്ലാതെ ദേഹം വിയർക്കുന്നവരെ ഭ്രാന്തരെന്ന് വിളിച്ചു ശീലിച്ച ആൾക്കൂട്ടം നല്ലൊരു നാളെ സ്വപ്നം കാണുന്ന നിസ്വാർഥരായ ഇത്തരം മനുഷ്യരെ അവഗണിച്ചും അവഹേളിച്ചും തളർത്താൻ ശ്രമിക്കുമ്പോഴും സ്വയം ഏറ്റെടുത്ത ദൗത്യവുമായി വിശ്രമമില്ലാതെ പ്രവർത്തിക്കുന്നവർ. കിതച്ചുപോയാലും വീണുപോയാലും മറ്റൊരാൾ ഏറ്റെടുക്കില്ലെന്ന് ഉറപ്പില്ലെന്ന കർമനിയോഗങ്ങളെ പരാതികളില്ലാതെ ഏറ്റെടുത്തവർ.

ധർമടം ഒഴയിൽഭാഗം സുരേന്ദ്രനെ (59) തലശ്ശേരിയിലും പരിസരത്തുമുള്ളവർ വിളിക്കുന്നത് കണ്ടൽ സുരേന്ദ്രൻ എന്നാണ്. കൊല്ലം വള്ളിക്കാവ് സ്വദേശി വി. രവീന്ദ്രൻ പ്രീ ഡിഗ്രി വിദ്യാഭ്യാസം കഴിഞ്ഞ് ധർമടത്ത് ഇളയച്ഛന്റെ വീട്ടിലേക്ക് വരുന്നത് വീട്ടുകാരുടെ നിർബന്ധം മൂലമായിരുന്നു. രാഷ്ട്രീയം കളിച്ചു നടന്ന കൗമാരക്കാരനെ നന്നാക്കിയെടുക്കാനുള്ള വീട്ടുകാരുടെ ഒരു ശ്രമമായിരുന്നു അത്. എവിടെയും എളുപ്പത്തിൽ അലിഞ്ഞു ചേരാനുള്ള സഹജമായ ഒരു വാസനയുള്ളതിനാൽ വള്ളിക്കാവുകാരൻ അതിവേഗം ഉത്തര മലബാറിന്റെ ജീവിതവും രാഷ്ട്രീയവുമായി ഇഴുകിച്ചേർന്നു. 

Content Highlights: Kandal Surendran, selfless activist who dedicated his life for the conservation of mangrove forests