പുകമഞ്ഞിൽ മൂടുന്ന ദേശീയ തലസ്ഥാനം; സ്വീകരിക്കാം ബീജിങ്ങ് മാതൃക

അനുദിനം രൂക്ഷമാകുന്ന വായുമലിനീകരണം കാരണം പുകമഞ്ഞു മൂടിയ ദേശീയ തലസ്ഥാനമായ ഡൽഹിയിൽ നിന്നുള്ള വാർത്തകൾ ഭീതിജനകമാണ്. വായു ഗുണനിലവാര സൂചിക (Air Quality Index- എക്യുഐ) അപകടകരമാംവിധം കൂടിയതിനെ തുടർന്ന് (400-ൽ അധികം) ഡിസംബർ 13-നു GRAP4 നിയന്ത്രണങ്ങൾ (Graded Action Plan4 - ബിഎസ് III പെട്രോൾ, ബിഎസ് IV ഡീസൽ വാഹനങ്ങൾ ദേശീയ തലസ്ഥാന മേഖലയിൽ പ്രവേശിക്കുന്നതിനു വിലക്ക്, സർക്കാർ സ്വകാര്യ സ്ഥാപനങ്ങളിലെ 50 % ജീവനക്കാർക്ക് വർക്ക് ഫ്രം ഹോം , സ്‌കൂളുകളിൽ ഓൺലൈൻ ക്ലാസുകൾ, കെട്ടിട നിർമാണ പ്രവർത്തനങ്ങൾക്ക് വിലക്ക് തുടങ്ങിയ നടപടികൾ ഏർപ്പെടുത്തിയെങ്കിലും സ്ഥിതി ഏറെയൊന്നും മെച്ചപ്പെട്ടിട്ടില്ല.

കഴിഞ്ഞ 10 വർഷത്തിലധികമായി ഡൽഹിയിൽ ഒക്ടോബർ, നവംബർ, ഡിസംബർ മാസങ്ങളിൽ ഗുരുതരമാകുന്ന മലിനീകരണം വല്ലാത്ത ആശങ്ക ഉണ്ടാക്കുന്നുണ്ട്. 2015 മുതൽ 2025 വരെയുളള 10 വർഷക്കാലത്തെ ഡൽഹിയിലെ ശരാശരി വായു ഗുണനിലവാര സൂചിക 235 ആണ് (എക്യുഐ 50-ൽ താഴെയാണ് നല്ലതെന്നു പറയുന്നത്). അനുവദനീയമായതിനേക്കാൾ എത്രയൊ മടങ്ങ് അധികമാണിത്. മലിനീകരണം രൂക്ഷമാകുന്ന തണുപ്പ് കാലത്തു എക്യുഐ മിക്ക ദിവസങ്ങളിലും 300-ലധികമാണ്. എന്നാൽ അല്ലാത്ത സമയത്തും എക്യുഐ ഉയർന്നു തന്നെയാണ് നിൽക്കുന്നത്. ശൈത്യത്തിലേക് കടക്കുന്ന ഒക്ടോബർ നവംബർ മാസങ്ങളിൽ ഏറെ ആസ്വാദ്യകരമായ കാലാവസ്ഥയായിരുന്നു മുമ്പ് ഡൽഹിയിൽ. എന്നാൽ, ഇന്ന് മലയാളികൾ അടക്കമുള്ള ഡൽഹി നിവാസികൾ ഒക്ടോബർ, നവംബർ, ഡിസംബർ മാസങ്ങളെ ഏറെ ആശങ്കയോടെയാണ് കാണുന്നത്.