ഉറപ്പെന്ന് LDF, സുവര്ണാവസരമെന്ന് UDF, ബി.ജെ.പി പ്രതീക്ഷ ഫലിക്കുമോ?; കടുപ്പമാണ് ചേലക്കര
ഭാരതപ്പുഴയും വാഴാലിക്കാവുമുള്പ്പെടെ ഗ്രാമീണസൗന്ദര്യം നിറഞ്ഞുതുളുമ്പുന്ന ചേലക്കര ഇന്ന് തിരഞ്ഞെടുപ്പ് ചൂടില് തിളച്ചുമറിയുകയാണ്. അഞ്ചര പതിറ്റാണ്ടിലധികമായി മാറിയും മറിഞ്ഞും വിധിയെഴുതിയ മണ്ഡലം ചരിത്രത്തിലെ ആദ്യ ഉപതിരഞ്ഞെടുപ്പിനാണ് സാക്ഷ്യം വഹിക്കാന് പോകുന്നത്. ഇടത്തോട്ടും വലത്തോട്ടും ചായാന് മടികാണിക്കാത്ത ചേലക്കര കഴിഞ്ഞ കാല്നൂറ്റാണ്ടായിട്ട് ഇടതുകോട്ടയായി പരിവര്ത്തനം ചെയ്യപ്പെട്ടെന്ന് പറയാം. എന്തുവിലകൊടുത്തും ആ കോട്ട പൊളിക്കാന് തന്ത്രങ്ങള് മെനയുകയാണ് കോണ്ഗ്രസ്. മണ്ഡലം കൈവിടുകയെന്നത് ഇടതുപക്ഷത്തെ സംബന്ധിച്ച് ചിന്തിക്കാന് പോലുമാകില്ല. ജയപ്രതീക്ഷയുമായി ബി.ജെ.പിയും അന്വറിന്റെ ഡി.എം.കെ പിന്തുണയ്ക്കുന്ന സ്വതന്ത്രസ്ഥാനാര്ഥിയും കളത്തിലിറങ്ങുമ്പോള് ചേലക്കര ചരിത്രത്തിലെ ഏറ്റവും കടുത്ത പോരാട്ടത്തിനാണ് തയ്യാറെടുക്കുന്നത്.
തിരുവില്വാമല, പഴയന്നൂര്, ദേശമംഗലം,കൊണ്ടാഴി, ചേലക്കര, പാഞ്ഞാള്, വള്ളത്തോള്നഗര്, മുള്ളൂര്ക്കര, വരവൂര് എന്നിങ്ങനെ ഒമ്പത് പഞ്ചായത്തുകളടങ്ങിയതാണ് ചേലക്കര നിയമസഭാ മണ്ഡലം. പട്ടികജാതി സംവരണ മണ്ഡലമാണ്. തൃശ്ശൂര് ജില്ലയിലുള്പ്പെടുന്ന മണ്ഡലം നിലനിര്ത്താന് മുന് എം.എല്.എ യു.ആര് പ്രദീപിനെയാണ് സി.പി.എം കളത്തിലിറക്കിയത്. മണ്ഡലത്തിലെ എം.എല്.എ ആയിരുന്ന കെ.രാധാകൃഷ്ണന് ആലത്തൂരില് നിന്ന് ലോക്സഭയിലേക്ക് പോയ ഒഴിവിലാണ് തിരഞ്ഞെടുപ്പ്. ആലത്തൂരില് രാധകൃഷ്ണനോട് പരാജയപ്പെട്ട മുന് എം.പി രമ്യ ഹരിദാസിനെ തന്നെയാണ് കോണ്ഗ്രസ് ചേലക്കര പിടിക്കാന് ഗോദയിലിറക്കിയത്. 2019-ലോക്സഭാ തിരഞ്ഞെടുപ്പില് ചേലക്കരയിലെ ഇടതുകോട്ടകളെ വിറപ്പിച്ച ചരിത്രം രമ്യക്ക് ആവര്ത്തിക്കാനാകുമോയെന്നാണ് രാഷ്ട്രീയ കേന്ദ്രങ്ങള് ഉറ്റുനോക്കുന്നത്. എന്നാല് 2021-നിയമസഭാ തിരഞ്ഞെടുപ്പിലും 2024-ലെ ലോക്സഭാ തിരഞ്ഞെടുപ്പിലും മണ്ഡലത്തില് തിരിച്ചുവന്നിട്ടുണ്ട് എല്.ഡി.എഫ്. മണ്ഡലത്തിലെ ജയപരാജയങ്ങള് നിര്ണയിക്കുന്ന തരത്തിലേക്ക് വോട്ടുവര്ധിപ്പിച്ചിട്ടുള്ള ബി.ജെ.പി തിരുവില്വാമല മുന് പഞ്ചായത്ത് പ്രസിഡന്റായ കെ. ബാലകൃഷ്ണനെയാണ് മത്സരിപ്പിക്കുന്നത്. അതേസമയം അന്വറിന്റെ ഡെമോക്രാറ്റിക് മൂവ്മെന്റ് ഓഫ് കേരള(ഡി.എം.കെ) പിന്തുണയ്ക്കുന്ന സ്വതന്ത്ര സ്ഥാനാര്ഥിയും ഉപതിരഞ്ഞെടുപ്പില് മത്സരിക്കുന്നുണ്ട്.
Content Highlights: chelakkara assembly constituency election bypolls ldf udf bjp