50 ജീവനക്കാരെ പുറത്താക്കി എൻ.ടി.എ., നിലവിലുള്ള രീതികൾ പൂർണമായി പൊളിച്ചെഴുതണമെന്ന് വിദ്യാഭ്യാസമന്ത്രി

ന്യൂഡൽഹി:എല്ലാ പഴുതുകളുമടച്ചുവേണം പരീക്ഷകൾ സംഘടിപ്പിക്കാനെന്ന് നാഷണൽ ടെസ്റ്റിങ് ഏജൻസി (എൻ.ടി.എ.)യോട് കേന്ദ്ര വിദ്യാഭ്യാസ മന്ത്രി പ്രൾഹാദ് ജോഷി. മുഴുവൻ പരീക്ഷാനടപടികളെക്കുറിച്ചും വിശദ പരിശോധന നടത്താനും തിരുത്തൽ നടപടികളെക്കുറിച്ച് റിപ്പോർട്ട് സമർപ്പിക്കാനും എൻ.ടി.എ.യോട് നിർദേശിച്ചു. യു.ജി.സി. നെറ്റ് പരീക്ഷയിലെ മൂന്നുവിഷയങ്ങളിൽ പുനഃപരീക്ഷ പ്രഖ്യാപിച്ചതിനുപിന്നാലെ ഉന്നതതല യോഗം വിളിച്ച് സംസാരിക്കുകയായിരുന്നു മന്ത്രി.

പരീക്ഷാ പ്രോട്ടക്കോളുകൾ കർശനമായി പാലിച്ചിരിക്കണം. ചോദ്യക്കടലാസ് തയ്യാറാക്കലടക്കം രഹസ്യസ്വഭാവമുള്ള പ്രവർത്തനങ്ങൾക്ക് നിലവിലുള്ള രീതികൾ പൂർണമായി പൊളിച്ചെഴുതണം. ചോദ്യക്കടലാസ് പ്രവർത്തനങ്ങൾക്ക് പ്രത്യേക മുറികൾ, തയ്യാറാക്കുന്നവർക്ക് പരിശോധനകൾ, ഫോണും സാമഗ്രികളും സൂക്ഷിക്കുന്നതിന് പ്രോട്ടക്കോൾ തുടങ്ങിയ സുരക്ഷാ നിയന്ത്രണങ്ങൾ യുദ്ധകാലാടിസ്ഥാനത്തിൽ നടപ്പാക്കണമെന്നും ആവശ്യപ്പെട്ടു.

50 ജീവനക്കാരെ പുറത്താക്കി എൻ.ടി.എ

നീറ്റ് ബിരുദ പരീക്ഷാചോർച്ചയ്ക്കും യു.ജി.സി.-നെറ്റ് പരീക്ഷകളിലെ ഗുരുതര വീഴ്ചകൾക്കും പിന്നാലെ നാഷണൽ ടെസ്റ്റിങ് ഏജൻസി(എൻ.ടി.എ.)യിൽ വൻ അഴിച്ചുപണി. പരീക്ഷാനടത്തിപ്പ് സംവിധാനം പൂർണമായി പരിഷ്കരിക്കുന്നതിന്റെ ഭാഗമായി 50-ലധികം ജീവനക്കാരെ പുറത്താക്കിയതായി കേന്ദ്ര വിദ്യാഭ്യാസമന്ത്രാലയം അറിയിച്ചു. 10 പ്രധാന നേതൃതസ്തികകളിലേക്ക് പ്രൊഫഷണലുകളെ നിയമിക്കുന്നതിനായി വിജ്ഞാപനം പുറപ്പെടുവിച്ചു.

വിമർശിച്ച് രാഹുൽ

മോദിസർക്കാരിന്റെ കരമായി പ്രവർത്തിക്കുന്ന എൻ.ടി.എ. തങ്ങളുടെ തെറ്റുകൾ ഏറ്റുപറയാറില്ലെന്ന് പ്രതിപക്ഷനേതാവ് രാഹുൽ ഗാന്ധി വിമർശിച്ചു. ‘‘എൻ.ടി.എ. എന്താണ് ചെയ്തിരിക്കുന്നതെന്ന് നോക്കൂ മോദിജീ’’ എന്ന് രാഹുൽ സാമൂഹികമാധ്യമങ്ങളിൽ കുറിച്ചു.

ഈ ചോദ്യക്കടലാസുകൾ പരീക്ഷയ്ക്കുമുൻപ്‌ ചോർന്നിരുന്നോ എന്നതിന് എൻ.ടി.എ. ഉത്തരം നൽകിയിട്ടില്ല. ധർമേന്ദ്ര പ്രധാന്റെ രാജി ആദ്യ ചുവടായിരുന്നു, അവസാനത്തേതല്ല. പ്രധാനമന്ത്രി ഉത്തരം പറയുംവരെ ചോദ്യം ചോദിക്കുന്നത് തുടരുമെന്നും രാഹുൽ പറഞ്ഞു.

എൻ.ടി.എ. മാത്രമല്ല, രാജ്യത്തെ വിദ്യാഭ്യാസ സമ്പ്രദായത്തിന്റെ അപചയത്തിന് കാരണമായ ദേശീയ വിദ്യാഭ്യാസ നയവും പിൻവലിക്കണമെന്ന് സി.പി.എം. പൊളിറ്റ് ബ്യൂറോ ആവശ്യപ്പെട്ടു.

Content Highlights: Union Education Minister Pralhad Joshi ordered strict NTA exam protocols., Comprehensive review and corrective measures requested following UGC-NET and NEET issues.