NLSIU ബിരുദദാനച്ചടങ്ങ് ഒക്ടോബർ 17-ന് നടത്താൻ തീരുമാനം; റദ്ദാക്കിയ നടപടി സർവകലാശാല പിൻവലിച്ചു

ബെംഗളൂരു: നാഷണൽ ലാ സ്‌കൂൾ ഓഫ് ഇന്ത്യ യൂണിവേഴ്‌സിറ്റി താൽക്കാലികമായി റദ്ദാക്കിയിരുന്ന 34-ാമത് വാർഷിക ബിരുദദാനച്ചടങ്ങ് ഒക്ടോബർ 17-ന് നടത്താൻ തീരുമാനിച്ചു. സെപ്റ്റംബർ 9-ന് വിദ്യാർഥികൾക്ക് അയച്ച ഔദ്യോഗിക ഇമെയിൽ സന്ദേശത്തിലൂടെയാണ് സർവകലാശാല അധികൃതർ ഈ വിവരം അറിയിച്ചത്.

ചീഫ് ജസ്റ്റിസിന്റെ അധ്യക്ഷതയിൽ സെപ്റ്റംബർ 9-ന് ചേർന്ന എക്‌സിക്യൂട്ടീവ് കൗൺസിലിന്റെയും ജനറൽ കൗൺസിലിന്റെയും യോഗങ്ങളിലാണ് പുതിയ തീയതി നിശ്ചയിച്ചത്. സർവകലാശാല ചാൻസലർ കൂടിയാണ് സുപ്രീം കോടതി ചീഫ് ജസ്റ്റിസ്.

സെപ്റ്റംബർ 12-ന് നടത്താനിരുന്ന ബിരുദദാനച്ചടങ്ങ് ‘ഒഴിവാക്കാനാകാത്ത കാരണങ്ങളാൽ’ റദ്ദാക്കിയതായി ഓഗസ്റ്റ് 27-ന് സർവകലാശാല പ്രഖ്യാപിച്ചിരുന്നു. തുടർന്ന് എല്ലാ വിദ്യാർഥികൾക്കും 'ഇൻ ആബ്‌സെൻഷ്യ' (നേരിട്ട് പങ്കെടുക്കാതെ) ബിരുദം നൽകാനായിരുന്നു തീരുമാനം.

ചടങ്ങിൽ ചീഫ് ജസ്റ്റിസ് സൂര്യ കാന്ത്, ബാർ കൗൺസിൽ ഓഫ് ഇന്ത്യ ചെയർമാൻ മനൻ കുമാർ മിശ്ര എന്നിവർ പങ്കെടുക്കുന്നതിനെതിരെ വിദ്യാർഥികളും പൂർവ്വ വിദ്യാർഥികളും പ്രതിഷേധിച്ചിരുന്നു. വിദ്യാർഥി പ്രക്ഷോഭങ്ങളുമായി ബന്ധപ്പെട്ട് ചീഫ് ജസ്റ്റിസ് നടത്തിയ ചില പരാമർശങ്ങളിലുള്ള എതിർപ്പാണ് പ്രതിഷേധത്തിന് കാരണമായത്.

ഒക്ടോബർ 17-ലേക്ക് മാറ്റിവെച്ച ചടങ്ങിൽ ചീഫ് ജസ്റ്റിസ് നേരിട്ട് പങ്കെടുക്കുമോ എന്ന കാര്യത്തിൽ ഔദ്യോഗിക വ്യക്തത വന്നിട്ടില്ല. ഇതുമായി ബന്ധപ്പെട്ട വിശദമായ വിജ്ഞാപനം ഉടൻ പുറത്തിറങ്ങുമെന്നാണ് പ്രതീക്ഷിക്കുന്നത്.

Content Highlights: The National Law School of India University (NLSIU) in Bengaluru has rescheduled its 34th annual convocation to October 17