നീറ്റ് യുജി റീ-എക്സാം ഫീസ് റീഫണ്ട്: ബാങ്ക് വിവരങ്ങൾ സമർപ്പിക്കേണ്ട അവസാന തീയതി ജൂൺ 30

നീറ്റ് യുജി 2026 റീ-എക്സാമിനേഷൻ (പുനപ്പരീക്ഷ) എഴുതിയ ഉദ്യോഗാർത്ഥികൾക്കായുള്ള ഫീസ് റീഫണ്ട് വിൻഡോ നാഷണൽ ടെസ്റ്റിങ് ഏജൻസി തുറന്നു. യോഗ്യരായ ഉദ്യോഗാർത്ഥികൾക്ക് റീഫണ്ട് തുക ലഭിക്കുന്നതിനായി ഔദ്യോഗിക എൻടിഎ പോർട്ടൽ വഴി ബാങ്ക് അക്കൗണ്ട് വിവരങ്ങൾ സമർപ്പിക്കുകയോ പുതുക്കുകയോ ചെയ്യാം. തടസ്സമില്ലാതെ റീഫണ്ട് ലഭിക്കുന്നതിന് 2026 ജൂൺ 30-നകം  നടപടികൾ പൂർത്തിയാക്കണമെന്ന് എൻടിഎ അറിയിച്ചു.

ഉദ്യോഗാർത്ഥികൾ ആപ്ലിക്കേഷൻ നമ്പറും പാസ്‌വേഡും ഉപയോഗിച്ച് ലോഗിൻ ചെയ്യണം. തുടർന്ന് മൊബൈലിലും ഇമെയിലിലും ലഭിക്കുന്ന OTP വഴി ഐഡന്റിറ്റി വെരിഫിക്കേഷൻ പൂർത്തിയാക്കി ബാങ്ക് അക്കൗണ്ട് വിവരങ്ങൾ സ്ഥിരീകരിക്കാം. റീഫണ്ട് വൈകാതിരിക്കാൻ കൃത്യമായ വിവരങ്ങൾ രേഖപ്പെടുത്താൻ ശ്രദ്ധിക്കേണ്ടതാണ്.

ബാങ്ക് വിവരങ്ങൾ എങ്ങനെ സമർപ്പിക്കാം?

• neet.nta.nic.in എന്ന ഔദ്യോഗിക എൻടിഎ വെബ്‌സൈറ്റ് സന്ദർശിക്കുക.

• നിങ്ങളുടെ ആപ്ലിക്കേഷൻ നമ്പറും പാസ്‌വേഡും ഉപയോഗിച്ച് ലോഗിൻ ചെയ്യുക.

• രജിസ്റ്റർ ചെയ്ത മൊബൈൽ നമ്പറിലേക്കും ഇമെയിൽ ഐഡിയിലേക്കും വരുന്ന OTP നൽകി വെരിഫൈ ചെയ്യുക.

• ബാങ്ക് അക്കൗണ്ട് വിവരങ്ങൾ കൃത്യമായി രേഖപ്പെടുത്തുകയോ തിരുത്തലുകൾ വരുത്തുകയോ ചെയ്യുക.

• അവസാന തീയതിക്ക് മുൻപായി വിവരങ്ങൾ സബ്മിറ്റ് ചെയ്യുക.

ശ്രദ്ധിക്കുക: ബാങ്ക് വിവരങ്ങളിൽ തെറ്റുകൾ സംഭവിച്ചാൽ റീഫണ്ട് ലഭിക്കാൻ വൈകുമെന്നതിനാൽ ഫൈനൽ സബ്മിഷന് മുൻപ് വിവരങ്ങൾ ഒരിക്കൽ കൂടി ഒത്തുനോക്കുക.

പ്രൊവിഷണൽ ആൻസർ കീ പുറത്തുവിട്ടു

2026 ജൂൺ 21-ന് നടത്തിയ നീറ്റ് യുജി പുനപ്പരീക്ഷയുടെ പ്രൊവിഷണൽ ആൻസർ കീയും എൻടിഎ പ്രസിദ്ധീകരിച്ചിട്ടുണ്ട്. പരീക്ഷയെഴുതിയ വിദ്യാർത്ഥികൾക്ക് ഔദ്യോഗിക വെബ്‌സൈറ്റിൽ നിന്ന് ആൻസർ കീ ഡൗൺലോഡ് ചെയ്യാം. ഉത്തരങ്ങളിൽ ആക്ഷേപമുള്ളവർക്ക് ജൂൺ 25 മുതൽ ജൂൺ 28 രാത്രി 11:50 വരെ പരാതികൾ സമർപ്പിക്കാവുന്നതാണ്. ഓരോ ചോദ്യത്തിനും 200 രൂപ വീതം ഫീസ് അടച്ചും അനുബന്ധ രേഖകൾ സമർപ്പിച്ചുമാണ് ഒബ്ജക്ഷൻ ഫയൽ ചെയ്യേണ്ടത്.

Content Highlights: The National Testing Agency (NTA) has officially opened the fee refund window for candidates who appeared in the NEET UG 2026 re-examination, setting June 30, 2026, as the strict deadline to submit or update bank account details via the official portal.