ജെ.ഇ.ഇ അഡ്വാൻസ്ഡ്; പെൺകുട്ടികളുടെ ചരിത്ര കുതിപ്പ്, യോഗ്യത നേടി പതിനായിരത്തിലധികം പേർ

ന്യൂഡൽഹി: ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ (ഐ.ഐ.ടി) പ്രവേശനത്തിനായുള്ള ജെ.ഇ.ഇ അഡ്വാൻസ്ഡ് പരീക്ഷാ ഫലത്തിൽ പെൺകുട്ടികൾക്ക് ചരിത്ര നേട്ടം. ചരിത്രത്തിലാദ്യമായി പതിനായിരത്തിലധികം പെൺകുട്ടികളാണ് ഇത്തവണ ഐ.ഐ.ടി കട്ട് ഓഫ് മാർക്ക് മറിടകന്ന് പ്രവേശനത്തിന് അർഹത നേടിയത്. പരീക്ഷാ നടത്തിപ്പ് ചുമതലയുണ്ടായിരുന്ന ഐ.ഐ.ടി റൂർക്കിയാണ് വെള്ളിയാഴ്ച ഇക്കാര്യം ഔദ്യോഗികമായി അറിയിച്ചത്.

ഇത്തവണ പരീക്ഷ എഴുതിയവരിൽ ആകെ 56,880 വിദ്യാർത്ഥികളാണ് ഐ.ഐ.ടി പ്രവേശനത്തിന് യോഗ്യത നേടിയത്. ഇതിൽ 10,107 പേർ പെൺകുട്ടികളാണ്. ശാസ്ത്ര-സാങ്കേതിക-എഞ്ചിനീയറിങ് (STEM) മേഖലകളിലേക്ക് കൂടുതൽ യുവതികൾ കടന്നുവരുന്നതിന്റെ വ്യക്തമായ സൂചനയാണിതെന്ന് ഐ.ഐ.ടി റൂർക്കി വിലയിരുത്തി. സാങ്കേതിക വിദ്യാഭ്യാസ രംഗത്തെ ലിംഗസമത്വത്തിലേക്കുള്ള വലിയൊരു ചുവടുവെപ്പാണിതെന്നും അധികൃതർ കൂട്ടിച്ചേർത്തു.

ഡൽഹി സോണിന് മേധാവിത്വം

ജൂൺ ഒന്നിന് പ്രഖ്യാപിച്ച ഫലം അനുസരിച്ച് ഐ.ഐ.ടി ഡൽഹി സോണിൽ നിന്നുള്ള ശുഭം കുമാർ ആണ് അഖിലേന്ത്യാ തലത്തിൽ ഒന്നാം റാങ്ക് കരസ്ഥമാക്കിയത്. 360-ൽ 330 മാർക്ക് നേടിയാണ് ശുഭം കുമാർ മികച്ച നേട്ടം കൈവരിച്ചത്.

പെൺകുട്ടികളുടെ വിഭാഗത്തിൽ ഐ.ഐ.ടി ഡൽഹി സോണിൽ നിന്നുള്ള ആരോഹി ദേശ്പാണ്ഡെ ഒന്നാമതെത്തി. 360-ൽ 280 മാർക്ക് നേടിയ ആരോഹിക്ക് പൊതു റാങ്ക് പട്ടികയിൽ  77-ാം റാങ്കുണ്ട്.

പട്ടികയിലെ ആദ്യ മൂന്ന് റാങ്കുകാരും ഡൽഹി സോണിൽ നിന്നുള്ളവരാണ് എന്നത് ഇത്തവണത്തെ ഫലത്തിന്റെ സവിശേഷതയാണ്. 329 മാർക്കോടെ കബീർ ചില്ലർ രണ്ടാം റാങ്കും, 319 മാർക്കോടെ ജതിൻ ചാഹർ മൂന്നാം റാങ്കും സ്വന്തമാക്കി.

പരീക്ഷ എഴുതിയത് 1.79 ലക്ഷത്തിലധികം പേർ

മേയ് 17-നായിരുന്നു രാജ്യത്തുടനീളം ജെ.ഇ.ഇ അഡ്വാൻസ്ഡ് പരീക്ഷ നടന്നത്. ആകെ 1,87,389 വിദ്യാർത്ഥികൾ പരീക്ഷയ്ക്കായി രജിസ്റ്റർ ചെയ്തിരുന്നെങ്കിലും രണ്ട് പേപ്പറുകളും എഴുതി പൂർത്തിയാക്കിയത് 1,79,694 ഉദ്യോഗാർത്ഥികളാണ്. വരും ദിവസങ്ങളിൽ ഐ.ഐ.ടികളിലേക്കുള്ള കൗൺസിലിങ് നടപടികൾ ആരംഭിക്കും.

Content Highlights: In a historic milestone for gender equality in STEM, over 10,000 girls successfully cleared the JEE Advanced cut-off this year out of the total 56,880 qualified candidates.