JEE Advanced ഫലം വന്നു: ശുഭം കുമാറിന് ഒന്നാം റാങ്ക്; പെൺകുട്ടികളിൽ ആരോഹി ദേശ്പാണ്ഡെ മുന്നിൽ
ന്യൂഡൽഹി: രാജ്യത്തെ പ്രമുഖ സാങ്കേതിക വിദ്യാഭ്യാസ സ്ഥാപനങ്ങളായ ഐ.ഐ.ടി-കളിലേക്കുള്ള പ്രവേശന പരീക്ഷയായ ജെ.ഇ.ഇ അഡ്വാൻസ്ഡ് ഫലം പ്രസിദ്ധീകരിച്ചു. ജൂൺ ഒന്നിന് പ്രഖ്യാപിക്കാനിരുന്ന ഫലം മേയ് 31-ന് രാത്രിയോടെയാണ് പരീക്ഷാ നടത്തിപ്പ് ചുമതലയുണ്ടായിരുന്ന ഐ.ഐ.ടി റൂർക്കി പുറത്തുവിട്ടത്.
ഐ.ഐ.ടി ഡൽഹി സോണിൽ നിന്നുള്ള ശുഭം കുമാറാണ് ഇത്തവണ ദേശീയതലത്തിൽ ഒന്നാം റാങ്ക് കരസ്ഥമാക്കിയത്. വിദ്യാർഥികൾക്ക് ഔദ്യോഗിക വെബ്സൈറ്റായ jeeadv.ac.in വഴി സ്കോർകാർഡുകൾ പരിശോധിക്കാവുന്നതാണ്.
പരീക്ഷാ വിവരങ്ങൾ ഒറ്റനോട്ടത്തിൽ:
പരീക്ഷ നടന്ന തീയതി: മേയ് 17 (രണ്ട് ഷിഫ്റ്റുകളിലായി)
ആകെ യോഗ്യത നേടിയവർ: 56,880 വിദ്യാർഥികൾ (ഇതിൽ 10,107 പേർ പെൺകുട്ടികളാണ്)
പരീക്ഷ എഴുതിയവർ: 1,79,694 പേർ (രണ്ട് പേപ്പറുകളും എഴുതിയവർ)
ആകെ രജിസ്റ്റർ ചെയ്തവർ: 1,87,389 പേർ
പെൺകുട്ടികളുടെ വിഭാഗത്തിൽ ഐ.ഐ.ടി ഡൽഹി സോണിൽ നിന്നുള്ള ആരോഹി ദേശ്പാണ്ഡെ (സ്കോർ: 360-ൽ 280, കമ്മ്യൂണിറ്റി റാങ്ക് ലിസ്റ്റ് - 77) ഒന്നാമതെത്തി. ഒന്നാം റാങ്ക് നേടിയ ശുഭം കുമാറിന് 360-ൽ 330 മാർക്കുണ്ട്. ജെ.ഇ.ഇ മെയിൻ പരീക്ഷയിൽ നിശ്ചിത കട്ട്-ഓഫ് മാർക്ക് നേടിയ ആദ്യ 2.5 ലക്ഷം വിദ്യാർഥികൾക്കാണ് അഡ്വാൻസ്ഡ് പരീക്ഷ എഴുതാൻ യോഗ്യത ലഭിച്ചിരുന്നത്.
ഫലം എങ്ങനെ പരിശോധിക്കാം?
jeeadv.ac.in എന്ന ഔദ്യോഗിക വെബ്സൈറ്റ് സന്ദർശിക്കുക.
ഹോം പേജിലെ 'JEE Advanced Results 2026' എന്ന ലിങ്കിൽ ക്ലിക്ക് ചെയ്യുക.
നിങ്ങളുടെ റോൾ നമ്പർ, ജനനത്തീയതി, രജിസ്റ്റർ ചെയ്ത മൊബൈൽ നമ്പർ എന്നിവ നൽകി സബ്മിറ്റ് ചെയ്യുക.
വിജയികൾക്ക് അവരുടെ രജിസ്റ്റർ ചെയ്ത മൊബൈൽ നമ്പറിലേക്ക് എസ്.എം.എസ് വഴിയും വിവരങ്ങൾ ലഭിക്കും.
കൗൺസിലിങ് ഉടൻ ആരംഭിക്കും
ഫലപ്രഖ്യാപനത്തിന് പിന്നാലെ ഐ.ഐ.ടി, എൻ.ഐ.ടി തുടങ്ങിയ സ്ഥാപനങ്ങളിലേക്കുള്ള പ്രവേശനത്തിനായുള്ള ജോയിന്റ് സീറ്റ് അലോക്കേഷൻ അതോറിറ്റിയുടെ കൗൺസിലിങ് നടപടികൾ ഉടൻ ആരംഭിക്കും. പരീക്ഷയിൽ യോഗ്യത നേടിയ എല്ലാ ഉദ്യോഗാർഥികൾക്കും പന്ത്രണ്ടാം ക്ലാസിലെ മാർക്ക് നോക്കാതെ തന്നെ കൗൺസിലിങ്ങിൽ രജിസ്റ്റർ ചെയ്യാം. എന്നാൽ, അന്തിമ സീറ്റ് സ്ഥിരീകരണത്തിന് ഇൻഫർമേഷൻ ബ്രോഷറിൽ പറയുന്ന പന്ത്രണ്ടാം ക്ലാസ് മാർക്കിന്റെ യോഗ്യതാ മാനദണ്ഡങ്ങൾ നിർബന്ധമായും പാലിച്ചിരിക്കണം. റാങ്ക് ലിസ്റ്റിൽ ഉൾപ്പെട്ടു എന്നതുകൊണ്ട് മാത്രം സീറ്റ് ഉറപ്പാകുന്നില്ലെന്നും ലഭ്യമായ സീറ്റുകളുടെ എണ്ണവും മെരിറ്റും അടിസ്ഥാനമാക്കിയായിരിക്കും പ്രവേശനമെന്നും അധികൃതർ വ്യക്തമാക്കി.
Content Highlights: IIT Roorkee has officially released the JEE Advanced 2026 results on its website, with Shubham Kumar securing the top national rank and over 56,880 students qualifying for the upcoming JoSAA counselling process.