വൃത്തി, സൗകര്യങ്ങള്; ചൈനയിലെ ഇന്ത്യന് വിദ്യാര്ഥിയുടെ ഹോസ്റ്റല് കണ്ട് അമ്പരന്ന് സോഷ്യല് മീഡിയ
ചൈനയില് പഠിക്കുന്ന ഇന്ത്യന് എന്ജിനീയറിങ് വിദ്യാര്ഥിനിയുടെ ഹോസ്റ്റല് റൂം വീഡിയോയാണ് ഇപ്പോള് വൈറലായിരിക്കുന്നത്. ചൈനയിലെ വിദ്യാര്ഥി ജീവിതത്തെ കുറിച്ച് വ്യക്തമാകുന്ന വീഡിയോയാണിത്. സലോണി ചൗധരി എന്ന വിദ്യാര്ഥിനി തന്റെ യുട്യൂബില് പങ്കുവെച്ച വീഡിയോയിലാണ് ഇക്കാര്യങ്ങള് ഉള്ളത്.
'എല്ലാവര്ക്കും നമസ്കാരം! ഞാന് ഇന്ത്യയില് നിന്നാണ്, ഈ വീഡിയോയില് ചൈനയിലെ ഷെന്ജെനിലുള്ള എന്റെ യൂണിവേഴ്സിറ്റി ഡോര്മ്മിലേക്കുള്ള ഒരു ടൂറാണ്. സലോണി ചൗധരി യൂട്യൂബില് വീഡിയോ പങ്കുവെച്ചുകൊണ്ട് കുറിച്ചു. ആണ്കുട്ടികള്ക്കും പെണ്കുട്ടികള്ക്കും താമസിക്കാനുള്ള ഒരു കെട്ടിടത്തിലെ ജീവിതം എങ്ങനെയാണെന്ന് അവര് കാണിക്കുന്നു. അവര് തന്റെ ഹോസ്റ്റല് റൂമും കാഴ്ചക്കാര്ക്ക് കാണിച്ചു കൊടുക്കുന്നുണ്ട്. 'സൂപ്പര് ക്യൂട്ട്, സുഖപ്രദം, വിദ്യാര്ത്ഥി ജീവിതത്തിന് അനുയോജ്യം' എന്നാണ് സലോണി ഇതിനെ വിശേഷിപ്പിക്കുന്നത്.
'ഞാന് ഇവിടെ പൂര്ണ്ണ ഫണ്ടുള്ള സ്കോളര്ഷിപ്പിലാണ് പഠിക്കുന്നത്. എനിക്ക് ട്യൂഷന് ഫീസോ മറ്റ് ചിലവുകളും ഇല്ല. അന്താരാഷ്ട്ര വിദ്യാര്ത്ഥികള്ക്ക് ഇതൊരു വലിയ അനുഗ്രഹമാണ്. ചൈനയിലെ വിദ്യാര്ത്ഥി ജീവിതം എങ്ങനെയിരിക്കും എന്നതിനെക്കുറിച്ച് നിങ്ങള്ക്ക് ജിജ്ഞാസയുണ്ടെങ്കില് അല്ലെങ്കില് ഇവിടെ ഒരു സ്കോളര്ഷിപ്പിന് അപേക്ഷിക്കുന്നതിനെക്കുറിച്ച് ആലോചിക്കുന്നുണ്ടെങ്കില്, ഈ വീഡിയോ നിങ്ങള്ക്കുള്ളതാണ്.- അവര് കൂട്ടിച്ചേര്ത്തു.
ഹോസ്റ്റല് കെട്ടിടം കാണിച്ചുകൊണ്ടാണ് വീഡിയോ ആരംഭിക്കുന്നത്. തന്റെ മുറി 17-ാം നിലയിലാണെന്നും അവര് പറയുന്നു. ഡോര്മിറ്ററിയില് പ്രവേശിക്കാന് വിദ്യാര്ഥികള് അവരുടെ ഐഡി കാര്ഡുകളോ ബയോമെട്രിക്ക് തിരിച്ചറിയല് സംവിധാനമോ ഉപയോഗിക്കണം എന്നും അവര് കൂട്ടിച്ചേര്ത്തു. നാല് പേര് താമസിക്കുന്ന മുറിയാണ് വീഡിയോയിലുള്ളത്.
പൊതുവായ ബാത്ത്റൂം/ഡ്രസ്സിംഗ് ഏരിയ, തുണി അലക്കാനുള്ള ഇടം എന്നിവയും അവര് കാണിക്കുന്നുണ്ട്. അവിടെ വിദ്യാര്ഥികള്ക്ക് വാഷിങ് മെഷീനുകള് സൗജന്യമായി ഉപയോഗിക്കാം.
വീഡിയോ വളരെ പെട്ടെന്ന് വൈറലായി. നിരവധി പേര് കമന്റുകളുമായി എത്തി. 'ഇന്ത്യന് ഡോര്മ്മുകളും ചൈനീസ് ഡോര്മ്മുകളും തമ്മില് ഇത്രയധികം വ്യത്യാസമോ... വൃത്തി, സ്വകാര്യത, തുറന്ന അന്തരീക്ഷം, പ്രിന്റിങ് മെഷീന്, വാഷിങ് മെഷീന് സൗകര്യം, വാഷ്റൂം സൗകര്യം പോലുള്ള സൗജന്യ കാര്യങ്ങള് എന്നിവ നോക്കൂ... വ്യക്തിപരമായി എനിക്കിഷ്ടപ്പെട്ട കാര്യം അവിടുത്തെ ചിട്ടയും വൃത്തിയുമാണ്. ഇതുപോലുള്ള ഒരിടത്ത് താമസിക്കുന്നത് മാനസിക സമാധാനം, കൂടുതല് ഉത്പാദനക്ഷമത, നല്ല ആരോഗ്യം, കൂടുതല് കൂടുതല് സ്വാതന്ത്ര്യം അനുഭവിക്കാനുള്ള കഴിവ് എന്നിവ നല്കാന് സഹായിക്കും.- ഒരാള് കുറിച്ചു.
'നിങ്ങളുടെ ഹോസ്റ്റല് ഒരു കൊറിയന് ഡ്രാമയില് നിന്ന് നേരിട്ട് വന്നതുപോലെ തോന്നിക്കുന്നു. മനോഹരവും തികച്ചും യാഥാര്ത്ഥ്യബോധമുള്ളതുമാണ്. ചൈനയില് നിങ്ങള്ക്ക് നല്ലതും സുരക്ഷിതവുമായ സമയം ആശംസിക്കുന്നു,' മറ്റൊരാള് അഭിപ്രായപ്പെട്ടു.
Content Highlights: Indian Student`s Viral China Hostel Tour