മെഡിക്കൽ പ്രവേശനത്തിന് പ്ലസ് ടു മാർക്ക് മാനദണ്ഡമാക്കണം; നീറ്റിനെതിരെ തമിഴ്‌നാട് നിയമസഭയിൽ പ്രമേയം

ചെന്നൈ: നീറ്റ് (നാഷണൽ എലിജിബിലിറ്റി ടെസ്റ്റ്) നിർത്തലാക്കണമെന്ന് ആവശ്യപ്പെട്ട് വീണ്ടും പ്രമേയം പാസാക്കി തമിഴ്‌നാട് നിയമസഭ. നീറ്റ് പരീക്ഷ സാമൂഹിക നീതിക്കും സമത്വത്തിനും സംസ്ഥാനങ്ങളുടെ ഭരണഘടനാ അവകാശങ്ങൾക്കും വിരുദ്ധമാണെന്ന് ചൂണ്ടിക്കാട്ടിയാണ് ആരോഗ്യമന്ത്രി കെ. അരുൺരാജ് നിയമസഭയിൽ പ്രമേയം അവതരിപ്പിച്ചത്.

ഭരണകക്ഷിയായ ഡി.എം.കെ, പ്രതിപക്ഷമായ അണ്ണാ ഡി.എം.കെ, കോൺഗ്രസ്, പി.എം.കെ, ഡി.എം.ഡി.കെ, ഇടത് പാർട്ടികൾ തുടങ്ങിയ പ്രമുഖ കക്ഷികളെല്ലാം പ്രമേയത്തിന് പിന്തുണ നൽകി. എന്നാൽ, പ്രമേയത്തിൽ പ്രതിഷേധിച്ച് ബി.ജെ.പി.യുടെ ഏക എം.എൽ.എ സഭയിൽ നിന്ന് ഇറങ്ങിപ്പോവുകയും ചെയ്തു.

സംസ്ഥാനത്തെ മെഡിക്കൽ പ്രവേശനത്തിനുള്ള ഏകീകൃത നീറ്റ് പരീക്ഷ ഒഴിവാക്കി, പന്ത്രണ്ടാം ക്ലാസിലെ മാർക്കിന്റെ അടിസ്ഥാനത്തിൽ പ്രവേശനം നൽകുന്നതിന് ആവശ്യമായ കേന്ദ്ര നിയമഭേദഗതികൾ വരുത്തണമെന്ന് സംസ്ഥാനം ആവശ്യപ്പെട്ടു.

ഗ്രാമീണ മേഖലകളിൽ നിന്നുള്ളവർക്കും സാമ്പത്തികമായി പിന്നാക്കം നിൽക്കുന്നവർക്കും തമിഴ് മാധ്യമത്തിൽ പഠിക്കുന്ന വിദ്യാർഥികൾക്കും നീറ്റ് പരീക്ഷ വലിയ തിരിച്ചടിയാണെന്ന് സർക്കാർ വാദിച്ചു. പന്ത്രണ്ട് വർഷത്തെ പഠനത്തിന് ശേഷം ഒരൊറ്റ പ്രവേശന പരീക്ഷ നടത്തുന്നത് വിദ്യാർഥികളിൽ വലിയ മാനസിക സമ്മർദ്ദമുണ്ടാക്കുന്നുണ്ടെന്നും ചെലവേറിയ സ്വകാര്യ കോച്ചിങ് സെന്ററുകളെ ആശ്രയിക്കാൻ ഇത് നിർബന്ധിതരാക്കുന്നുവെന്നും മന്ത്രി സഭയിൽ പറഞ്ഞു.

പ്രമേയത്തെ എതിർത്ത ബി.ജെ.പി എം.എൽ.എ എം. ഭോജരാജൻ, പരീക്ഷ റദ്ദാക്കുന്നതിന് പകരം വിദ്യാർഥികൾക്ക് ആവശ്യമായ സൗജന്യ കോച്ചിങ് കേന്ദ്രങ്ങൾ തുടങ്ങുകയാണ് സർക്കാർ ചെയ്യേണ്ടതെന്ന് അഭിപ്രായപ്പെട്ടു. പൊള്ളാച്ചിയിലെ ഒരു സ്കൂളിൽ നിന്നുതന്നെ 10 വിദ്യാർഥികൾ നീറ്റ് വിജയിച്ച സംഭവം ചൂണ്ടിക്കാട്ടിയ അദ്ദേഹം, പരീക്ഷ ബഹിഷ്കരിച്ച് സഭയിൽ നിന്ന് ഇറങ്ങിപ്പോവുകയായിരുന്നു.

2021-ൽ തമിഴ്‌നാട് നിയമസഭ ഏകകണ്ഠമായി പാസാക്കിയ 'ആന്റി-നീറ്റ്' ബില്ലിന് കേന്ദ്ര സർക്കാരിന്റെ അംഗീകാരം വേഗത്തിൽ ലഭ്യമാക്കണമെന്നും സഭ വീണ്ടും ആവശ്യപ്പെട്ടിട്ടുണ്ട്.

Content Highlights: The Tamil Nadu Assembly has passed a fresh resolution demanding the abolition of the NEET exam and requesting a constitutional amendment to restore medical admissions based on Class 12 marks to protect social justice and state rights.