കാറപകടത്തിൽപെട്ടു; രക്ഷാപ്രവർത്തനത്തിനിടെ കണ്ടെത്തിയത് MDMA, യുവാവ് അറസ്റ്റിൽ

കൊടുവള്ളി: യുവാവ് ഓടിച്ച കാർ നിർത്തിയിട്ട മറ്റൊരു കാറിലിടിച്ച് അപകടം. കാറിൽനിന്ന് എംഡിഎംഎ കണ്ടെടുത്തു. കാക്കൂർ പുന്നൂർ ചെറുപാലം കണ്ടോത്ത്പാറ മലയിൽതൊടുകയിൽ മുഹമ്മദ് ഷഫാൻ (36) ആണ് അപകടത്തിൽപ്പെട്ടത്.

വെള്ളിയാഴ്ച വൈകീട്ട് മൂന്നോടെ നെല്ലാങ്കണ്ടി അങ്ങാടിയിലായിരുന്നു സംഭവം. കൊടുവള്ളിയിൽനിന്ന് താമരശ്ശേരി ഭാഗത്തേക്ക് പോവുകയായിരുന്ന ഷഫാൻ ഓടിച്ച മാരുതി സ്വിഫ്റ്റ് കാർ അങ്ങാടിയിൽ നിർത്തിയിട്ടിരുന്ന കാറിൽ ഇടിക്കുകയായിരുന്നു. തുടർന്ന് ബസ് കാത്തിരിപ്പു കേന്ദ്രത്തിന് സമീപമെത്തിയപ്പോൾ കാർ നിന്നു.

ശബ്ദംകേട്ട് ഓടിയെത്തിയ നാട്ടുകാർ ഡ്രൈവറെ അബോധാവസ്ഥയിൽ കണ്ടെത്തി. രക്ഷാപ്രവർത്തനത്തിനായി കാറിനുള്ളിൽ കയറിയപ്പോഴാണ് ഡാഷ്‌ബോർഡിൽ എംഡിഎംഎയുടെ കവർ ശ്രദ്ധയിൽപ്പെട്ടത്. തുടർന്ന് നാട്ടുകാർ കൊടുവള്ളി പോലീസിൽ വിവരമറിയിച്ചു. സ്ഥലത്തെത്തിയ പോലീസ് ഷഫാനെ കസ്റ്റഡിയിലെടുത്തു. കാറിൽ കൂടുതൽ പരിശോധന നടത്തിക്കൊണ്ടിരിക്കുകയാണെന്നും ഇതിന് ശേഷമേ എംഡിഎംഎയുടെ അളവ് പറയാൻ കഴിയുകയുള്ളുവെന്നും പോലീസ് പറഞ്ഞു. ബാലുശ്ശേരി, കോഴിക്കോട് ടൗൺ, എലത്തൂർ പോലീസ് സ്റ്റേഷനുകളിൽ ഇയാൾക്കെതിേര എംഡിഎംഎയുമായി ബന്ധപ്പെട്ട കേസുകൾ നിലവിലുണ്ടെന്നും പോലീസ് പറഞ്ഞു. അപകടത്തിൽ നിർത്തിയിട്ട കാറിലുണ്ടായിരുന്ന ആവിലോറ സ്വദേശി സിനാന് നിസ്സാര പരിക്കേറ്റു.

Content Highlights: Car met with an accident after hitting a parked vehicle in Nellankandi, Koduvally., Locals found the driver unconscious and spotted an MDMA cover in the dashboard., Police took the accused, Mohammed Shafan, into custody., The accused already has multiple NDPS and MDMA cases in other police stations.