കൈപ്പമംഗലത്തെ കൊലപാതകം: അക്രമികളെന്ന് സംശയിക്കുന്നവര്‍ മുങ്ങിയത് നാട്ടുകാരുടെ കണ്‍മുന്നില്‍നിന്ന്
തൃശൂർ: കൈപ്പമംഗലത്ത് മധ്യവയസ്കനെ കൊല്ലപ്പെട്ട നിലയിൽ കണ്ടെത്തി. മരിച്ചയാളെ തിരിച്ചറിഞ്ഞിട്ടില്ല. കൊല നടത്തിയവരെന്ന് സംശയിക്കുന്ന സംഘം മൃതദേഹം റോഡരികിൽ ഉപേക്ഷിച്ച് രക്ഷപ്പെടാൻ ശ്രമിക്കുന്നതിനിടെ വഴിയാത്രക്കാർ കണ്ടെങ്കിലും ഇവർ സമർഥമായി രക്ഷപ്പെട്ടു.
തിങ്കളാഴ്ച രാത്രി പത്ത് മണിയോടെ കൈപ്പമംഗലം വഞ്ചിപ്പുര സെന്ററിനടുത്താണ് സംഭവം. മറ്റെവിടെയോ വെച്ച് കൊല നടത്തിയ ശേഷം മൃതദേഹം കാറിൽ കൊണ്ടുവന്ന് ഇവിടെ തള്ളാനായിരുന്നു സംഘത്തിൻ്റെ ശ്രമമെന്ന് സംശയിക്കുന്നു. ഇതിനിടെ വഴിയാത്രക്കാർ കണ്ടതോടെ അപകടം ഉണ്ടായെന്നും ഗുരുതരമായി പരിക്കേറ്റ ഇദ്ദേഹത്തെ ആശുപത്രിയിലെത്തിക്കാൻ ആംബുലൻസ് വിളിക്കാനും സംഘം ആവശ്യപ്പെട്ടു.
ആംബുലൻസ് എത്തിയതോടെ ഇയാളെ ആംബുലൻസിൽ കയറ്റിയ സംഘം, തങ്ങൾ കാറിൽ ആശുപത്രിയിൽ എത്തിക്കോളം എന്ന് പറഞ്ഞ് മുങ്ങുകയായിരുന്നു. ആശുപത്രിയിലെത്തിയപ്പോഴാണ് നേരത്തേ തന്നെ മരണം സംഭവിച്ചതായി അറിയുന്നത്. ഉടൻ കയ്പ്പമംഗലം പോലീസ് സ്ഥലത്തെത്തി അന്വേഷണം ആരംഭിച്ചു. കൊല്ലപ്പെട്ട ആളുടെ ശരീരത്തിൽ മർദ്ദനമേറ്റ പാടുകൾ കണ്ടെത്തിയിട്ടുണ്ട്.
Content Highlights: Man found dead at Kaipamangalam, Thrissur