യുവഡോക്ടറെ വിളിച്ചുവരുത്തിയത് ഹണിട്രാപ്പിനെന്ന് സംശയം; നടിയും കൂട്ടുകാരും പറയുന്നത് മറ്റൊരുകഥ, ദുരൂഹതയേറുന്നു

കൊച്ചി: അടിയന്തര ചികിത്സ ആവശ്യപ്പെട്ട് ഡോക്ടറെ ഫ്ലാറ്റിലേക്ക് വിളിച്ചുവരുത്തി മർദിച്ച് 3.25 ലക്ഷം രൂപ വിലമതിക്കുന്ന വസ്തുക്കൾ നടനും നടിയും ഉൾപ്പെടുന്ന സംഘം കവർന്നതായി പരാതി. ഒന്നാം പ്രതി മൂവാറ്റുപുഴ കല്ലൂർക്കാട് പെരുമ്പള്ളിക്കുന്നേൽ ബിബിൻ ബേബി (നടൻ ബിബിൻ പെരുമ്പള്ളി-43), രണ്ടാംപ്രതി പെരുമ്പാവൂർ വെങ്ങോല ആലിൻചുവട് കവല സ്വദേശി കെ.ബി. വിഷ്ണു (31), മൂന്നാംപ്രതി പുതിയകാവ് അൻസൽ അപ്പാർട്ട്മെന്റിൽ താമസിക്കുന്ന നടി അതുല്യ ചന്ദ്ര (32) എന്നിവരെ കടവന്ത്ര എസ്.എച്ച്.ഒ. ഹരികൃഷ്ണനും സംഘവും വ്യാഴാഴ്ച അറസ്റ്റ് ചെയ്തു. വൈദ്യപരിശോധനയ്ക്കുശേഷം മജിസ്ട്രേറ്റിന് മുന്നിൽ ഹാജരാക്കിയ മൂവരേയും റിമാൻഡ് ചെയ്തു. അന്യായമായി തടങ്കലിൽ വെക്കൽ, ഭീഷണിപ്പെടുത്തൽ, മനഃപൂർവം മുറിവേൽപ്പിക്കൽ, കവർച്ച തുടങ്ങിയ ജാമ്യമില്ലാ വകുപ്പുകൾ ചേർത്താണ് കേസെടുത്തത്. ഒൻപത് പ്രതികൾ കൂടി പിടിയിലാകാനുണ്ടെന്നാണ് വിവരം. ഹണിട്രാപ് ആണോയെന്നും പോലീസ് സംശയിക്കുന്നുണ്ട്.

നഗരത്തിനടുത്ത് താമസിക്കുന്ന 41-കാരനായ ഡോക്ടറാണ് പരാതിക്കാരൻ. നവംബർ രണ്ടിന് വൈകീട്ട് 6.30-നും രാത്രി 10.30-നും ഇടയിലാണ് സംഭവം. പ്രതികളിലൊരാളുടെ മാതൃസഹോദരിക്ക് ആരോഗ്യപ്രശ്നമുണ്ടെന്ന് പറഞ്ഞ് വൈറ്റില പൊന്നുരുന്നിയിലെ ജൂനിയർ ജനതാ റോഡിലുള്ള ബിബിന്റെ ഫ്ലാറ്റിലേക്ക് അതുല്യ ചന്ദ്രയാണ് ഡോക്ടറെ വിളിച്ചത്. നടൻ ബിബിൻ ഡോക്ടറുടെ കരണത്ത് അടിക്കുകയും കസേരയിൽ ബലമായി ഇരുത്തി വാരിയെല്ലിൽ ഇടിക്കുകയും ചെയ്തു. വിഷ്ണു ഡോക്ടറുടെ രണ്ട് മൊബൈൽ ഫോണുകളും സ്മാർട്ട് വാച്ചും ഇയർപോഡും തട്ടിയെടുക്കുകയും നടി അതുല്യ ചന്ദ്ര കൊലപ്പെടുത്തുമെന്ന് ഭീഷണിപ്പെടുത്തുകയും ചെയ്തതായി പോലീസ് പറഞ്ഞു. മറ്റ് പ്രതികൾ ഡോക്ടറെ തടഞ്ഞുവെച്ച് മർദിച്ചു. ശാരീരിക അവശത മൂലം രണ്ട് ദിവസത്തിന് ശേഷമാണ് ഡോക്ടർ പോലീസിനെ സമീപിച്ചത്.

എന്നാൽ, ഫ്ലാറ്റിൽ നടന്നതിനെക്കുറിച്ച് പ്രതികൾ മറ്റൊരു വിവരണമാണ് പോലീസിനോട് പറഞ്ഞത്. രോഗിയായ സ്ത്രീ ഫ്ലാറ്റിൽ ഉണ്ടായിരുന്നുവെന്നതിനും തെളിവു ലഭിച്ചിട്ടില്ല.

Content Highlights: A 41-year-old doctor was lured to a flat in Vyttila under the pretext of medical treatment., Actor Bibin Perumpally, actor Vishnu, and actress Athulya Chandra were arrested by Kadavanthra police., Valuables worth Rs 3.25 lakh including phones and a smartwatch were looted., Police suspect a honey trap angle as nine more suspects are yet to be caught.