മയിലിനെ വെടിവെച്ച് കൊന്ന് പാചകംചെയ്തു; സഹോദരങ്ങള് അറസ്റ്റില്
മണ്ണാര്ക്കാട്(പാലക്കാട്): മയിലിനെ വെടിവെച്ചുകൊന്ന് പാചകംചെയ്ത് ഭക്ഷിക്കുകയും ഇറച്ചി സൂക്ഷിക്കുകയും ചെയ്ത കേസില് സഹോദരങ്ങളെ വനംവകുപ്പ് അറസ്റ്റ് ചെയ്തു. കാഞ്ഞിരപ്പുഴ പാലക്കയം കുണ്ടംപൊട്ടി പടിഞ്ഞാറെവീട്ടില് രാജേഷ് (41), രമേഷ് (41) എന്നിവരാണ് അറസ്റ്റിലായത്.
രഹസ്യവിവരത്തിന്റെ അടിസ്ഥാനത്തില് കഴിഞ്ഞദിവസം ഇവരുടെ വീടുകളില് പാലക്കാട് ഫ്ലൈയിങ് സ്ക്വാഡ് റേഞ്ച് ഫോറസ്റ്റ് ഓഫീസര് കെ.സി. സനൂപ്, പാലക്കയം ഡെപ്യൂട്ടി റേഞ്ച് ഫോറസ്റ്റ് ഓഫീസര് കെ. മനോജ് എന്നിവരുടെ നേതൃത്വത്തില് പരിശോധന നടത്തുകയായിരുന്നു.
പാചകംചെയ്ത നിലയിലുള്ള മയിലിറച്ചി കണ്ടെത്തിയതായി അധികൃതര് അറിയിച്ചു. ഒളിവിലായിരുന്ന പ്രതികള് ചൊവ്വാഴ്ച മണ്ണാര്ക്കാട് ഡി.എഫ്.ഒ.യ്ക്ക് മുന്നിലെത്തി കുറ്റസമ്മതം നടത്തുകയായിരുന്നു. തുടര്ന്ന്, മണ്ണാര്ക്കാട് റേഞ്ച് ഓഫീസര് എന്. സുബൈറിന്റെ നേതൃത്വത്തില് പ്രതികളുമായി കുണ്ടംപൊട്ടി ഭാഗത്ത് തെളിവെടുപ്പ് നടത്തി. തോക്കും മറ്റ് ആയുധങ്ങളും കണ്ടെടുത്തു. കോടതിയില് ഹാജരാക്കിയ പ്രതികളെ റിമാന്ഡ് ചെയ്തു. മറ്റുപ്രതികള്ക്കായി അന്വേഷണം ഊര്ജിതമാക്കിയെന്ന് ഡെപ്യൂട്ടി റേഞ്ച് ഓഫീസര് അറിയിച്ചു.
Content Highlights: brothers arrested for killing peacock