കാറുമായി 16-കാരന്റെ മരണപ്പാച്ചില്‍; അച്ഛനെ പ്രതിയാക്കി കേസെടുത്തു; അറിവോടെയല്ല വാഹനം കൊണ്ടുപോയതെന്ന് രക്ഷിതാവ്
കൊച്ചി: പതിനാറുകാരന്‍ കാറുമായി റോഡിലിറങ്ങി പരാക്രമം കാട്ടിയ സംഭവത്തില്‍ കുട്ടിയുടെ അച്ഛനെ പ്രതിയാക്കി പോലീസ് കേസെടുത്തു. കുട്ടിയുടെ അച്ഛന്റെ പേരിലുള്ളതാണ് വാഹനമെന്നും പോലീസ് പറഞ്ഞു. അതേസമയം, തന്റെ അറിവോടയല്ല മകന്‍ വാഹനം കൊണ്ടുപോയതെന്നാണ് രക്ഷിതാവിന്റെ മൊഴി.
എറണാകുളം ഞാറയ്ക്കലിലാണ് കാറുമായി റോഡിലിറങ്ങിയ 16-കാരന്‍ മരണപ്പാച്ചില്‍ നടത്തിയത്. കാര്‍ ഒട്ടേറെവാഹനങ്ങളില്‍ ഇടിച്ചു. അലക്ഷ്യമായി ഓടിച്ച കാറിടിച്ച് പ്രായമായ സ്ത്രീയ്ക്കും പരിക്കേറ്റു.
16-കാരനായ സ്‌കൂള്‍ വിദ്യാര്‍ഥിയാണ് കാറുമായി റോഡിലിറങ്ങി അപകടങ്ങളുണ്ടാക്കിയത്. ഞാറയ്ക്കല്‍, ചെറായി, എടവനക്കാട് മേഖലകളിലെ ഒട്ടേറെ സ്ഥലങ്ങളില്‍ 16-കാരന്‍ അപകടമുണ്ടാക്കി. ഇതില്‍ ചില അപകടങ്ങളുടെ സിസിടിവി ദൃശ്യങ്ങളും പുറത്തുവന്നു. എന്നാല്‍, സിസിടിവിയില്ലാത്ത ഒട്ടേറെസ്ഥലങ്ങളിലും 16-കാരന്‍ ഓടിച്ച വാഹനം അപകടത്തില്‍പ്പെട്ടിരുന്നു.
നിയമംലംഘിച്ച് കാറുമായി റോഡിലിറങ്ങിയ 16-കാരന്‍ അമിതവേഗത്തിലും അലക്ഷ്യമായുമാണ് വാഹനമോടിച്ചിരുന്നത്. ഒട്ടേറെ വാഹനങ്ങളിലും മതിലുകളിലും കാറിടിച്ചു. 16-കാരനെ തടയാന്‍ശ്രമിച്ച ബൈക്ക് യാത്രികനും മറിഞ്ഞുവീണു. ഇതിനിടെയാണ് റോഡരികിലൂടെ നടന്നുപോവുകയായിരുന്ന സ്ത്രീയെയും ഇടിച്ചുതെറിപ്പിച്ചത്. ഇവര്‍ ചികിത്സയിലാണ്.
16-കാരനും കൂട്ടുകാരായ രണ്ടുപേരും അടക്കം മൂന്ന് കുട്ടികളാണ് കാറിലുണ്ടായിരുന്നതെന്ന് പോലീസ് പറഞ്ഞു. വാഹനം പോലീസ് കസ്റ്റഡിയിലെടുത്തിരുന്നു. ഇതിനുപിന്നാലെയാണ് വാഹനമുടമയായ കുട്ടിയുടെ അച്ഛനെ പ്രതിയാക്കി പോലീസ് കേസെടുത്തത്.
Content Highlights: A 16-year-old drove a car recklessly, causing accidents and injuries in Kochi. Police have booked the car owner, the boy`s father, for his son`s actions.