സായുധ പോലീസില്‍ കോണ്‍സ്റ്റബിള്‍; പത്താംക്ലാസ് യോഗ്യതയുള്ളവര്‍ക്ക് അപേക്ഷിക്കാം

കേന്ദ്ര സായുധ പോലീസ് സേനകളിലേക്ക് (സെന്‍ട്രല്‍ ആംഡ് പോലീസ് ഫോഴ്‌സസ്) കോണ്‍സ്റ്റബിള്‍മാരെ തിരഞ്ഞെടുക്കുന്നതിനുള്ള പരീക്ഷയ്ക്ക് സ്റ്റാഫ് സെലക്ഷന്‍ കമ്മിഷന്‍ അപേക്ഷ ക്ഷണിച്ചു. 25,487 ഒഴിവുണ്ട്. 

ഇതില്‍ 2020 ഒഴിവ് വനിതകള്‍ക്കാണ്. പത്താംക്ലാസ് പാസായവര്‍ക്ക് അപേക്ഷിക്കാം. കംപ്യൂട്ടര്‍ അധിഷ്ഠിത പരീക്ഷ, കായികക്ഷമതാപരീക്ഷ/ ശാരീരികയോഗ്യതാപരിശോധന, മെഡിക്കല്‍ പരിശോധന, സര്‍ട്ടിഫിക്കറ്റ് വെരിഫിക്കേഷന്‍ എന്നിവ നടത്തിയാവും തിരഞ്ഞെടുപ്പ്. കംപ്യൂട്ടര്‍ അധിഷ്ഠിത പരീക്ഷ ഫെബ്രുവരി, മാര്‍ച്ച് മാസങ്ങളില്‍ നടക്കും. കേരളത്തില്‍ ഒന്‍പത് ജില്ലകളില്‍ പരീക്ഷാകേന്ദ്രമുണ്ടാവും.

സേനകളും ഒഴിവും: ബോര്‍ഡര്‍ സെക്യൂരിറ്റി ഫോഴ്‌സ് (ബിഎസ്എഫ്)-616, സെന്‍ട്രല്‍ ഇന്‍ഡസ്ട്രിയല്‍ സെക്യൂരിറ്റി ഫോഴ്‌സ് (സിഐഎസ്എഫ്)-14,595, സെന്‍ട്രല്‍ റിസര്‍വ് പോലീസ് ഫോഴ്‌സ് (സിആര്‍പിഎഫ്)-5490, സശസ്ത്ര സീമാബെല്‍ (എസ്എസ്ബി)-1764, ഇന്‍ഡോ ടിബറ്റന്‍ ബോര്‍ഡര്‍ പോലീസ് (ഐടിബിപി)-1293, അസം റൈഫിള്‍സ് (എആര്‍)-1706, സെക്രട്ടേറിയറ്റ് സെക്യൂരിറ്റി ഫോഴ്‌സ് (എസ്എസ്എഫ്)-23.

വിദ്യാഭ്യാസയോഗ്യത: പത്താംക്ലാസ് വിജയം. 

പ്രായം: 2026 ജനുവരി ഒന്നിന് 18-23 വയസ്സ്. എസ്സി/ എസ്ടി വിഭാഗക്കാര്‍ക്ക് അഞ്ചുവര്‍ഷത്തെയും ഒബിസി വിഭാഗക്കാര്‍ക്ക് മൂന്ന് വര്‍ഷത്തെയും ഇളവുണ്ട്. വിമുക്തഭടര്‍ക്കും നിയമാനുസൃത ഇളവ് ലഭിക്കും.

ശാരീരികയോഗ്യത: പുരുഷന്മാര്‍ക്ക് 170 സെന്റിമീറ്ററും (എസ്ടി വിഭാഗത്തിന് 162.5) വനിതകള്‍ക്ക് 157 സെന്റിമീറ്ററും (എസ്സി വിഭാഗത്തിന് 150) ഉയരം വേണം. പുരുഷന്മാര്‍ക്ക് 80 സെ.മി. (എസ് സി-76) നെഞ്ചളവും അഞ്ച് സെ.മീ നെഞ്ചളവ് വികാസവും ഉണ്ടായിരിക്കണം. അപേക്ഷകര്‍ക്കെല്ലാം പ്രായത്തിനും ഉയരത്തിനും ഒത്ത തൂക്കമുണ്ടായിരിക്കണം.

എഴുത്തുപരീക്ഷ: കംപ്യൂട്ടര്‍ അധിഷ്ഠിത പരീക്ഷയ്ക്ക് ഒരു മണിക്കൂറാണ് പരീക്ഷാസമയം. ജനറല്‍ ഇന്റലിജന്‍സ് ആന്‍ഡ് റീസണിങ്, ജനറല്‍ നോളജ് ആന്‍ഡ് ജനറല്‍ അവേര്‍നെസ്, എലിമെന്ററി മാത്തമാറ്റിക്‌സ്, ഇംഗ്ലീഷ്/ഹിന്ദി എന്നിവയെ ആസ്പദമാക്കിയായിരിക്കും ചോദ്യങ്ങള്‍.

കായികക്ഷമതാപരീക്ഷ: എഴുത്തുപരീക്ഷയില്‍നിന്ന് ഷോര്‍ട്ട് ലിസ്റ്റ് ചെയ്യപ്പെടുന്നവര്‍ക്ക് കായികക്ഷമതാപരീക്ഷയും ശാരീരികയോഗ്യതാ പരിശോധനയും ഉണ്ടാവും. കായികക്ഷമതാ പരീക്ഷയില്‍ പുരുഷന്മാര്‍ 24 മിനിറ്റില്‍ അഞ്ചുകിലോമീറ്റര്‍ ദൂരവും വനിതകള്‍ എട്ടരമിനിറ്റിനുള്ളില്‍ 1.6 കിലോമീറ്റര്‍ ദൂരവും ഓടിയെത്തണം.

അപേക്ഷ: ഒറ്റത്തവണ രജിസ്റ്റര്‍ ചെയ്തശേഷം ഓണ്‍ലൈനായി അപേക്ഷിക്കണം. പഴയ വെബ്‌സൈറ്റായ ssc.nicin-ല്‍ ഒറ്റത്തവണ രജിസ്‌ട്രേഷന്‍ചെയ്തവരും പുതിയ വെബ്‌സൈറ്റായ ssc.gov.in-ല്‍ രജിസ്റ്റര്‍ ചെയ്തിരിക്കണം.

ലൈവ് ഫോട്ടോയും സ്‌കാന്‍ചെയ്ത ഒപ്പും അപേക്ഷയോടൊപ്പം വിജ്ഞാപനത്തില്‍ നിര്‍ദേശിച്ചിട്ടുള്ള മാതൃകയില്‍ അപ്‌ലോഡ് ചെയ്യണം. മൊബൈല്‍ പ്ലേ സ്റ്റോറില്‍നിന്ന് ഡൗണ്‍ലോഡ് ചെയ്യാവുന്ന ‘mySSC’ എന്ന ആപ്പ് മുഖേനയും അപേക്ഷിക്കാം. അപേക്ഷ സ്വീകരിക്കുന്ന അവസാന തീയതി: ഡിസംബര്‍ 31-ന് രാത്രി 11 വരെ. ശമ്പളം: 21,700-69,100 രൂപ 

കൂടുതല്‍ തൊഴിലവസരങ്ങള്‍ക്കും സമഗ്രപരിശീലനത്തിനും പുതിയ ലക്കം തൊഴില്‍വാര്‍ത്ത കാണുക.

Content Highlights: SSC invites applications for 25,487 Constable posts in CAPFs. 10th pass eligible. Apply online before Dec 31. Check details and eligibility.