ആമസോണിലെ ഉയര്ന്ന ജോലി കളഞ്ഞു, മെറ്റയില് മൂന്നര കോടിയോളം ശമ്പളമുള്ള ജോലി നേടി ടെക്കി
അതിവേഗം വികസിച്ചുകൊണ്ടിരിക്കുന്ന ഇന്നത്തെ ടെക് തൊഴില് വിപണിയില്, മെഷീന് ലേണിങ്ങിനും ആര്ട്ടിഫിഷ്യല് ഇന്റലിജന്സിനും വലിയ പ്രാധാന്യമാണുളളത്. ഈ കഴിവുകള്ക്ക് ആവശ്യക്കാര് ഏറെയാണ്. ഈ വിഭാഗത്തില് പ്രാവീണ്യമുള്ളവര്ക്ക് ഉയര്ന്ന പ്രതിഫലം ലഭിക്കുന്ന അവസരങ്ങളാണ് ലഭിക്കുക. മൈക്രോസോഫ്റ്റ്, ആമസോണ്, ഗൂഗിള്, മെറ്റ തുടങ്ങിയ ടെക് ഭീമന്മാര് ഈ മേഖലകളില് വൈദഗ്ധ്യമുള്ള പ്രൊഫഷണലുകളെ നിയമിച്ചുകൊണ്ടിരിക്കുകയാണ്. പലപ്പോഴും ഉയര്ന്ന ശമ്പള പാക്കേജുകളാണ് അവര് വാഗ്ദാനം ചെയ്യുന്നത്.
23 വയസുള്ള ഇന്ത്യന് ടെക്കി മനോജ് തുമുവിന്റെ അനുഭവമാണ് ഇപ്പോള് വൈറലാവുന്നത്. ഇന്ത്യന്-അമേരിക്കന് മെഷീന് ലേണിങ് സോഫ്റ്റ്വെയര് എന്ജിനീയറായ ഇദ്ദേഹം മെറ്റയുടെ എഐ പ്രോജക്റ്റുകളില് ആകൃഷ്ടനായി, ആമസോണിലെ ഉയര്ന്ന ശമ്പളമുള്ള ജോലി ഉപേക്ഷിച്ചു. 400,000 ഡോളറില് കൂടുതല് ശമ്പളമുള്ള ജോലിയാണ് അദ്ദേഹത്തിന് മെറ്റയില് ഇപ്പോള് ലഭിച്ചിരിക്കുന്നത്.
വ്യക്തിഗത പ്രോജക്റ്റുകളേക്കാള്, ശക്തമായ ഒരു റെസ്യൂമെക്കും പ്രസക്തമായ തൊഴില് പരിചയത്തിനുമാണ് കൂടുതല് പ്രാധാന്യമെന്ന് മനോജ് തൂമ പറയുന്നു. ബിസിനസ് ഇന്സൈഡറിന് നല്കിയ അഭിമുഖത്തിലാണ് മനോജ് തുമു ഇക്കാര്യം പറഞ്ഞത്.
കോളേജ് പഠനകാലത്തെ ഇന്റേണ്ഷിപ്പുകളുടെ പ്രാധാന്യം അദ്ദേഹം എടുത്തുപറഞ്ഞു. പ്രായോഗിക പരിചയം അറിവ് വര്ദ്ധിപ്പിക്കുകയും ഒരു ഉദ്യോഗാര്ത്ഥിയുടെ പ്രൊഫൈല് ശക്തിപ്പെടുത്തുകയും ചെയ്യുമെന്ന് മനോജ് തുമു ചൂണ്ടിക്കാട്ടി.
ജോലിക്കായുള്ള അപേക്ഷകളെ താന് സമീപിച്ച രീതിയും മനോജ് വിവരിച്ചു. ശുപാര്ശകളെ ആശ്രയിക്കുന്നതിന് പകരം, ഓരോ ജോലിക്കും അനുസരിച്ച് ശ്രദ്ധാപൂര്വ്വം തയ്യാറാക്കിയ റെസ്യൂമെകള് സമര്പ്പിച്ചുകൊണ്ട്, കമ്പനി വെബ്സൈറ്റുകള് വഴിയും ലിങ്ക്ഡ്ഇന് വഴിയും അദ്ദേഹം നേരിട്ട് അപേക്ഷിച്ചു.
അഭിമുഖങ്ങള്ക്കുള്ള നുറുങ്ങുകള്
മനോജിന്റെ അഭിപ്രായത്തില്, അഭിമുഖങ്ങളില് വിജയിക്കാന് വിശദമായ തയ്യാറെടുപ്പുകള് അത്യാവശ്യമാണ്. തയ്യാറെടുപ്പില്ലായ്മ ഉദ്യോഗാര്ത്ഥികള്ക്ക് ഒരു വലിയ തടസ്സമാകും. ആമസോണിന്റെ നേതൃത്വ തത്വങ്ങള്ക്കും മെറ്റയുടെ കോര്പ്പറേറ്റ് സംസ്കാരത്തിനും വേണ്ടി തയ്യാറെടുത്തപ്പോള് താന് ചെയ്തതുപോലെ, ഒരു കമ്പനിയുടെ മൂല്യങ്ങള് പ്രതിഫലിപ്പിക്കുന്ന തരത്തില് ഉത്തരങ്ങള് ക്രമീകരിക്കണമെന്ന് അദ്ദേഹം നിര്ദ്ദേശിച്ചു. മെറ്റയിലെ അദ്ദേഹത്തിന്റെ അഭിമുഖ പ്രക്രിയയില് ഒരു സ്ക്രീനിങ് കോളും, തുടര്ന്ന് ആറാഴ്ചയ്ക്കുള്ളില് കോഡിങ് , മെഷീന് ലേണിങ് പെരുമാറ്റ വിലയിരുത്തല് എന്നിവയുടെ നാല് മുതല് ആറ് റൗണ്ടുകളും ഉള്പ്പെട്ടിരുന്നു.
തന്റെ താല്പ്പര്യങ്ങളോട് ചേര്ന്നുനില്ക്കുന്ന, കുറഞ്ഞ ശമ്പളമുള്ള മെഷീന് ലേണിങ് റോള് അദ്ദേഹം തിരഞ്ഞെടുത്തു. ആ തിരഞ്ഞെടുപ്പാണ് ഒടുവില് ഉയര്ന്ന ശമ്പളമുള്ള അവസരങ്ങളിലേക്ക് വഴിതുറന്നതെന്നും, മെറ്റയിലെ തന്റെ ഇപ്പോഴത്തെ സ്ഥാനത്ത് എത്തിച്ചതെന്നും മനോജ് തുമു അഭിമുഖത്തില് പറഞ്ഞു.
Content Highlights: 23-year-old engineer quits Amazon for $400K Meta AI role. Get his tips on landing top ML/AI jobs