വാഹന ഇൻഷുറൻസ് പ്രീമിയം വർധിച്ചേക്കും: തേർഡ് പാർട്ടി നിരക്കുകൾ കൂട്ടണമെന്ന് കമ്പനികൾ

ഇന്ത്യയിൽ വാഹനങ്ങളുടെ തേർഡ് പാർട്ടി മോട്ടോർ ഇൻഷുറൻസ് പ്രീമിയം നിരക്കുകൾ വർധിക്കാൻ സാധ്യത. കഴിഞ്ഞ നാല് വർഷത്തിനിടയിലെ ആദ്യത്തെ പ്രീമിയം വർധനവിനായി ജനറൽ ഇൻഷുറൻസ് കമ്പനികൾ സമ്മർദ്ദം ചെലുത്തുകയാണ്. വർധിച്ചുവരുന്ന സാമ്പത്തിക നഷ്ടം, ഉയർന്ന ക്ലെയിം ചെലവുകൾ, സുപ്രീം കോടതിയുടെ സമീപകാല വിധി എന്നിവയാണ് നിരക്ക് വർധന ആവശ്യപ്പെടാൻ കാരണം.

ഇന്ത്യൻ റോഡുകളിൽ ഓടുന്ന എല്ലാ വാഹനങ്ങൾക്കും തേർഡ് പാർട്ടി ഇൻഷുറൻസ് നിർബന്ധമാണ്. അപകടങ്ങൾ മൂലമുണ്ടാകുന്ന വ്യക്തിപരമായ പരിക്കുകൾ, മരണം, അല്ലെങ്കിൽ മറ്റ് വ്യക്തികളുടെ സ്വത്തുക്കൾക്കുണ്ടാകുന്ന കേടുപാടുകൾ എന്നിവയ്ക്കാണ് ഈ ഇൻഷുറൻസ് പരിരക്ഷ നൽകുന്നത്.

തേർഡ് പാർട്ടി പ്രീമിയം നിരക്കുകൾ അവസാനമായി പരിഷ്കരിച്ചത് 2022 ജൂൺ ഒന്നിനാണ്. കോവിഡ് കാലത്ത് വാഹന ഉടമകളുടെ സാമ്പത്തിക ഭാരം കുറയ്ക്കുന്നതിനായി സർക്കാർ പ്രീമിയം നിരക്കുകൾ മരവിപ്പിച്ചിരുന്നു.

ഇന്ത്യയിലെ ₹1.08 ലക്ഷം കോടിയുടെ മോട്ടോർ ഇൻഷുറൻസ് വിപണിയിൽ ഏകദേശം 60 ശതമാനവും (₹64,200 കോടി) തേർഡ് പാർട്ടി ഇൻഷുറൻസാണ്. എന്നിരുന്നാലും, ഈ മേഖലയിൽ കമ്പനികൾക്ക് വലിയ സാമ്പത്തിക നഷ്ടം സംഭവിക്കുന്നതായി ഇൻഷുറൻസ് കമ്പനികൾ വ്യക്തമാക്കുന്നു.

പൊതുമേഖലാ ഇൻഷുറൻസ് കമ്പനിയായ ന്യൂ ഇന്ത്യ അഷ്വറൻസിന്റെ 2027 സാമ്പത്തിക വർഷത്തെ ഏപ്രിൽ-ജൂൺ പാദത്തിൽ മോട്ടോർ അണ്ടർറൈറ്റിംഗ് നഷ്ടം 57% വർധിച്ച് ₹1,297.2 കോടിയായതായി റിപ്പോർട്ട് ചെയ്തു. മുൻ വർഷം ഇതേ കാലയളവിൽ ഇത് ₹824.6 കോടിയായിരുന്നു.

2026 ജൂണിൽ സുപ്രീം കോടതി പുറപ്പെടുവിച്ച വിധിയിൽ, മോട്ടോർ വാഹന നിയമപ്രകാരം നഷ്ടപരിഹാരം കണക്കാക്കുമ്പോൾ വീട്ടമ്മമാരുടെ വേതനമില്ലാത്ത ഗാർഹിക ജോലിയുടെ സാമ്പത്തിക മൂല്യം അംഗീകരിച്ചിരുന്നു. ഈ വിധി ക്ലെയിം തുകകളിൽ വലിയ വർധനവുണ്ടാക്കുമെന്ന് ഇൻഷുറൻസ് കമ്പനികൾ ചൂണ്ടിക്കാണിക്കുന്നു. ഇൻഷുറൻസ് മേഖലയിലെ തേർഡ് പാർട്ടി നഷ്ട അനുപാതം (loss ratio) 12 മുതൽ 15 ശതമാനം വരെ വർധിക്കാൻ ഈ വിധി കാരണമാകുമെന്ന് ഐസിഐസിഐ ലൊംബാർഡ് (ICICI Lombard) കണക്കാക്കുന്നു. ഇതേത്തുടർന്ന് ക്ലെയിം റിസർവിലേക്ക് ഇവർ ₹165 കോടി അധികമായി വകയിരുത്തിയിട്ടുണ്ട്.

ഇൻഷുറൻസ് റെഗുലേറ്ററി ആൻഡ് ഡെവലപ്‌മെന്റ് അതോറിറ്റി ഓഫ് ഇന്ത്യ നിലവിലുള്ള തേർഡ് പാർട്ടി താരിഫുകൾ പരിശോധിച്ചുവരികയാണ്. പരിശോധനയ്ക്ക് ശേഷം കേന്ദ്ര റോഡ് ഗതാഗത, ഹൈവേ മന്ത്രാലയത്തിന് ശുപാർശ നൽകും. എല്ലാ വാഹന വിഭാഗങ്ങൾക്കും ഒരേപോലെ നിരക്ക് വർധിപ്പിക്കുന്നതിന് പകരം, ഓരോ വാഹന വിഭാഗത്തിന്റെയും ക്ലെയിം അനുഭവങ്ങൾ വിലയിരുത്തിയാകും നിരക്കുകൾ നിശ്ചയിക്കുക.

സാധാരണക്കാരനെ എങ്ങനെ ബാധിക്കും?

സ്ക്വയർ ഇൻഷുറൻസ് മാനേജിംഗ് ഡയറക്ടർ രാകേഷ് കുമാറിന്റെ അഭിപ്രായത്തിൽ, നാല് വർഷത്തിന് ശേഷമുള്ള ഈ നിരക്ക് വർധന ന്യായയുക്തവും അനിവാര്യവുമാണ്. തേർഡ് പാർട്ടി പ്രീമിയത്തിൽ 10-15% വർധനവുണ്ടായാലും, അത് മൊത്തം ഇൻഷുറൻസ് പ്രീമിയത്തെ വലിയ തോതിൽ ബാധിക്കില്ല.

മൊത്തം പ്രീമിയത്തിൽ നാല് മുതൽ എട്ട് ശതമാനം വരെ വ്യത്യാസമേ വരൂ. ഉദാഹരണത്തിന്, പ്രതിവർഷം ₹10,000 പ്രീമിയം നൽകുന്ന ഒരു വാഹനത്തിന് ഏകദേശം ₹400 മുതൽ ₹800 വരെ മാത്രമായിരിക്കും അധിക സാമ്പത്തിക ബാധ്യത വരിക. അപകടത്തിൽപ്പെടുന്ന ഇരകൾക്ക് കൃത്യമായ നഷ്ടപരിഹാരം ഉറപ്പാക്കാനും ഇൻഷുറൻസ് മേഖലയുടെ സുസ്ഥിരത നിലനിർത്താനും ഈ മാറ്റം ആവശ്യമാണെന്ന് വിദഗ്ധർ ചൂണ്ടിക്കാണിക്കുന്നു.

Content Highlights: General insurance companies in India are pushing for a 10–15% hike in third-party motor insurance premiums after four years to offset rising claim costs, mounting financial losses, and recent judicial mandates.