ഇന്ത്യന്‍ നിരത്തുകളിലും സ്റ്റെറാറ്റോയുടെ ഇരമ്പല്‍; ഹുറാകാന്‍ ഓഫ് റോഡ് മോഡല്‍ ഇന്ത്യയിലും
കഴിഞ്ഞ വര്‍ഷമാണ് മിയാമി ബീച്ചില്‍ ലംബോര്‍ഗിനി ഹുറാകാന്‍ സ്റ്റെറാറ്റോ എന്ന പുതിയ ഒരു വാഹനം അവതരിപ്പിച്ചത്. ഹുറാകാനില്‍ നിന്ന് എന്ത് വ്യത്യാസമാണ് സ്റ്റെറാറ്റോയില്‍ വരുത്തിയിട്ടുള്ളതെന്ന ചോദ്യത്തിന് നിര്‍മാതാക്കളായ ലംബോര്‍ഗിനി നല്‍കിയ മറുപടി, സ്റ്റെറാറ്റോ ഒരു ഓള്‍ ടൈറൈന്‍ സ്‌പോര്‍ട്‌സ് കാറാണെന്നായിരുന്നു. 2022 ഡിസംബറില്‍ മിയാമിയില്‍ പ്രദര്‍ശിപ്പിച്ച ഈ വാഹനം മാസങ്ങള്‍ക്കിപ്പുറം ഇന്ത്യയിലും വിതരണത്തിന് എത്തിച്ചിരിക്കുകയാണ് ലംബോര്‍ഗിനി.
2022 ഡിസംബറില്‍ ഈ വാഹനം ആദ്യമായി പുറത്തിറങ്ങിയപ്പോള്‍ മുതല്‍ ഇന്ത്യയിലെ സൂപ്പര്‍കാര്‍ പ്രേമികള്‍ അതീവ ആവേശത്തിലായിരുന്നു. അതുകൊണ്ടുതന്നെ ലംബോര്‍ഗിനിയുടെ ഹുറാകാന്‍ കുടുംബത്തില്‍ പിറന്ന സ്റ്റെറാറ്റോ എന്ന വാഹനം ഇന്ത്യന്‍ ഉപയോക്താക്കള്‍ക്കായി എത്തിക്കാന്‍ സാധിച്ചതില്‍ അഭിമാനമുണ്ടെന്ന് ലംബോര്‍ഗിനി ഇന്ത്യയുടെ മേധാവിയായ ശരദ് അഗര്‍വാള്‍ അറിയിച്ചു. 2023 ഫെബ്രുവരിയിലാണ് ഈ വാഹനത്തിന്റെ നിര്‍മാണം ആരംഭിക്കുന്നതെന്നായിരുന്നു വിവരം.
റെഗുലര്‍ ഹുറാകാനില്‍ നിന്ന് അല്‍പ്പം മാറ്റങ്ങള്‍ വരുത്തിയാണ് ഓഫ് റോഡുകളിലെ കുതിപ്പിന് സ്റ്റെറാറ്റോയെ യോഗ്യമാക്കിയിരിക്കുന്നത്. ബോണറ്റിന് താഴെയായി രണ്ട് എല്‍.ഇ.ഡി.ലൈറ്റുകള്‍ നല്‍കിയും ഉയര്‍ന്ന വീല്‍ ആര്‍ച്ച് ഒരുക്കിയും റൂഫ് റെയില്‍സ് ഘടിപ്പിച്ചതുമാണ് മുന്നില്‍ നിന്നുള്ള മാറ്റങ്ങള്‍. പിന്നില്‍ ഒരു ചെറിയ ലിപ്പ് സ്പോയിലര്‍ അധികമായി നല്‍കി. റൂഫില്‍ എയര്‍ സ്‌കൂപ്പും നല്‍കിയാണ് ഈ വാഹനത്തെ റെഗുലര്‍ ഹുറാകാനില്‍ നിന്ന് വ്യത്യസ്തമാക്കിയിരിക്കുന്നത്.
ഓഫ്റോഡ് കാര്യക്ഷമത ഉറപ്പാക്കുന്നതിനായി ഹുറാകാനെക്കാള്‍ 44 എം.എം. അധിക ഗ്രൗണ്ട് ക്ലിയറന്‍സുമായാണ് സ്റ്റെറാറ്റോ എത്തുന്നത്. ഇതിനൊപ്പം ട്രാക്ക് വിഡ്ത്ത് മുന്നില്‍ 30 എം.എമ്മും പിന്നില്‍ 34 എം.എമ്മും ഉയര്‍ത്തിയിട്ടുണ്ട്. മുന്നിലെ ബമ്പര്‍ പൂര്‍ണമായും മാറ്റുകയും മുന്‍ഭാഗത്തിന് കൂടുതല്‍ സംരക്ഷണം ഉറപ്പാക്കുന്നതിനായി അലുമിനിയം അണ്ടര്‍ ബോഡി പ്രൊട്ടക്ഷനും ഒരുക്കുന്നുണ്ട്. സ്റ്റെറാറ്റോയിക്ക് വേണ്ടി മാത്രമായി ഒരുക്കിയിട്ടുള്ള 19 ഇഞ്ച് വീലാണ് ഇതിലുള്ളത്.
അകത്തളത്തിലെ ഫീച്ചറുകളും സാങ്കേതികവിദ്യയുമെല്ലാം റെഗുലര്‍ ഹുറാകാനില്‍ നിന്ന് കടംകൊണ്ടവയാണ്. എന്നാല്‍, പെര്‍ഫോമെന്‍സിന് അല്‍പ്പം കൂടി പ്രാധാന്യം നല്‍കിയതോടെ മൂന്ന് ഡ്രൈവ് മോഡലുകള്‍ ഈ വാഹനത്തില്‍ പുതുതായി സ്ഥാനം പിടിച്ചിട്ടുണ്ട്. സ്ട്രാഡ, സ്പോര്‍ട്ട്, റാലി എന്നിവയാണത്. ഇതിനൊപ്പം പിച്ച് ആന്‍ഡ് റോള്‍ ഇന്റിക്കേറ്റര്‍, കോംപസ്, സ്റ്റിയറിങ്ങ് ആംഗിള്‍ ഇന്റിക്കേറ്റര്‍, ജിയോഗ്രഫിക് കോര്‍ഡിനേറ്റ് ഇന്റിക്കേറ്റര്‍ എന്നിവ നല്‍കുന്ന ഡിജിറ്റല്‍ ഇന്‍ക്ലിനോമീറ്ററും ഇതിലുണ്ട്.
മെക്കാനിക്കല്‍ സെല്‍ഫ് ലോക്കിങ്ങ് ഡിഫറന്‍ഷ്യല്‍ സംവിധാനമുള്ള ഇലക്ട്രോണിക്കലി കണ്‍ട്രോള്‍ഡ് ഓള്‍ വീല്‍ ഡ്രൈവ് സംവിധാനമാണ് ഇതില്‍ നല്‍കിയിട്ടുള്ളത്. 5.2 ലിറ്റര്‍ വി10 എന്‍ജിനാണ് സ്റ്റെറാറ്റോയുടെ ഹൃദയം. ഇത് 610 ബി.എച്ച്.പി. പവറും 560 എന്‍.എം. ടോര്‍ക്കുമാണ് ഉത്പാദിപ്പിക്കുന്നത്. ഏഴ് സ്പീഡ് ഡ്യുവല്‍ ക്ലെച്ചാണ് ഇതില്‍ ട്രാന്‍സ്മിഷന്‍ ഒരുക്കുന്നത്. 3.4 സെക്കന്റില്‍ 100 കിലോമീറ്റര്‍ വേഗത കൈവരിക്കാനും ഇതിനാകും.
Content Highlights: Lamborghini India delivers the first Huracán Sterrato in the country