'പുരുഷമേധാവിത്വത്തെ ചോദ്യം ചെയ്യാനല്ല വനിതാസംഘം; കഥകളിരംഗത്ത് ആണ്-പെണ് വ്യത്യാസമെന്നൊന്നില്ല'
അന്പത് വര്ഷങ്ങള് - ഓരോ വര്ഷവും ഭീമന്റെയും അര്ജ്ജുനന്റെയും നളന്റെയും നാരദന്റെയും കര്ണ്ണന്റെയും കാട്ടാളന്റെയും ബാലിയുടെയും ഹനുമാന്റെയും ഓരോ പുതിയ കാഴ്ചപ്പാടുകള് അനാവരണം ചെയ്യപ്പെട്ടു. രാത്രി മുഴുവന് നീണ്ട അവതരണങ്ങളില് നിന്ന് പകല്നേരത്തേക്കുകൂടി കളിയവതരണം ചുവടുമാറി. കലാകാരികളുടെ മൂന്ന് തലമുറ അവരുടെ കഴിവ് തെളിയിച്ചു - പാരമ്പര്യത്തിന്റെ ചട്ടക്കൂടുകളില് ബന്ധിതരായി സ്വയം കഴിവ് തെളിയിക്കേണ്ടി വന്ന ആദ്യതലമുറ തങ്ങളെ തളച്ചിട്ട ചട്ടക്കൂടുകള്ക്ക് മുകളിലൂടെ ചിറകടിച്ചുയര്ന്നു. രണ്ടാം തലമുറയിലൂടെ ആ കുതിപ്പിന് വേഗം കൂടി, ഇപ്പോഴാകട്ടെ പുതുതലമുറയ്ക്കായി ആകാശം വിശാലമായിക്കിടക്കുന്നു!
(-ഗീത വര്മ്മ, കഥകളി കലാകാരി)
1975 മുതല് 2025 വരെയുള്ള കാലത്തിന് പറയാനുള്ളത് ഒരു വിജയഗാഥയാണ്, തൃപ്പൂണിത്തുറ വനിതാ കഥകളി സംഘത്തിന്റെ അന്പതാണ്ട് താണ്ടുന്ന അഭിമാനഗാഥ. വനിതകള് മാത്രം വേദിയിലെത്തുന്ന ഒരു സംഘത്തിന് സ്വാഭാവികമായും നേരിടേണ്ടി വരുന്ന ചില പ്രശ്നങ്ങളുണ്ട്. അത്തരം പ്രശ്നങ്ങളെ കൂട്ടായ്മയിലൂടെ അതിജീവിച്ച് മുന്നേറുകയാണ് സംഘം. പിന്നണിയിലും പെണ്കുട്ടികള് ധാരാളമായി കടന്നുവരുന്നുണ്ടിപ്പോള്. കാലത്തിന്റെ കുത്തൊഴുക്കില് കഥകളിരംഗത്തെ ആണ്-പെണ് വ്യത്യാസമൊക്കെ എന്നേ ഇല്ലാതായിരിക്കുന്നുവെന്ന് പറയുകയാണ് സംഘത്തിന്റെ ആരംഭം മുതല് സജീവമായി രംഗത്തുള്ള മുതിര്ന്ന കലാകാരിയായ ഗീത വര്മ്മ. പുരുഷമേധാവിത്വത്തെ ചോദ്യം ചെയ്തുകൊണ്ടോ പുരുഷന്മാരുടെ കലാമികവിനെ വെല്ലുവിളിച്ചുകൊണ്ടോ രൂപീകൃതമായ ഒരു സംഘമല്ല വനിതാ കഥകളിസംഘമെന്നും ഒരിക്കലും അത്തരത്തിലുള്ള ചിന്തകള് സംഘത്തിനോ സംഘത്തിലെ ഏതെങ്കിലും അംഗത്തിനോ ഉണ്ടായിട്ടില്ലെന്നും ഗീത വര്മ്മ പറയുന്നു. സംഘത്തിന്റെ പ്രവര്ത്തനങ്ങളെ കുറിച്ചും കഥകളിജീവിതത്തിലെ അനുഭവങ്ങളെ കുറിച്ചും സംഘത്തിന്റെ പ്രതിനിധിയായി ഗീത വര്മ്മ സംസാരിക്കുന്നു.
Content Highlights: Celebrating 50 years of the Thripunithura Vanitha Kathakali Sangam