വിള ഇൻഷുറൻസ്: 16.50 ലക്ഷം കർഷകർ പുറത്തായി, പരിരക്ഷ കിട്ടിയത് 57,521 പേർക്ക്

തിരുവനന്തപുരം: സംസ്ഥാനത്ത് വായ്പയെടുത്ത് കൃഷിചെയ്യുന്ന 17 ലക്ഷം കർഷകരിൽ 57,521 പേർക്കുമാത്രമാണ് വിള ഇൻഷുറൻസ് പരിരക്ഷ ലഭിക്കുന്നതെന്ന് റിപ്പോർട്ട്. ബാങ്കുകളുടെ വീഴ്ചകാരണം 16.50 ലക്ഷത്തോളം കർഷകർ ഇൻഷുറൻസിന് പുറത്തായി.

2023 ഒക്ടോബർമുതൽ 2024 മാർച്ചുവരെയുള്ള സംസ്ഥാനത്തെ വിള ഇൻഷുറൻസ് റിപ്പോർട്ടിലാണ് ഈ കാര്യങ്ങൾ വ്യക്തമാക്കുന്നത്. നിലവിൽ വിള ഇൻഷുറൻസ് പദ്ധതിയിൽ അംഗമായവർക്കുമാത്രം ഈ കാലയളവിൽ 83 കോടിരൂപ നഷ്ടപരിഹാരമായി നൽകി. എന്നാൽ, മുഴുവൻ കർഷകരുടെയും ഈ കാലയളവിലെ നഷ്ടം കണക്കാക്കുമ്പോൾ മൊത്തം നാശനഷ്ടം 1200 കോടിയോളം ഉണ്ടാകുമെന്നാണ് കൃഷിവകുപ്പ് ഉദ്യോഗസ്ഥരുടെ നിഗമനം.

2023-’24 സാമ്പത്തികവർഷം കൊടുംചൂട് വിളകളെ ബാധിച്ചു. 32 ഡിഗ്രിക്കു മുകളിൽ ചൂട് ഉയർന്ന സ്ഥലത്താണ് ഇൻഷുറൻസ് നഷ്ടപരിഹാരം കണക്കാക്കിയിട്ടുള്ളത്.

നെല്ലിനാണ് വിളനാശം കൂടുതലുണ്ടായത്. 79.26 കോടിരൂപയാണ് നെല്ലിന്റെ നാശത്തിനുമാത്രം നഷ്ടപരിഹാരമായി നൽകിയത്.

Content Highlights: 16.5 lakh farmers in Kerala are without crop insurance due to bank failures.