ആചാരപ്രകാരം താലിചാർത്തൽ, ശേഷം മാപ്പിളപ്പാട്ട്
കണ്ണൂര്‍: വീടിന് വടക്കുവശത്തെ ക്ഷേത്രത്തിലെ കുലദേവതയെ വണങ്ങി ബ്രാഹ്‌മണ ആചാരത്തോടെ താലി ചാര്‍ത്തല്‍. തുടര്‍ന്ന് പഞ്ചായത്ത് പ്രസിഡന്റിന്റെയും വാര്‍ഡ് മെമ്പര്‍മാരുടെയും നേതൃത്വത്തില്‍ വധുവരന്‍മാരെ അനുഗ്രഹിച്ച് മാപ്പിളപ്പാട്ട്. കണ്ണൂര്‍ വളപട്ടണത്ത് നടന്ന വേറിട്ട കല്യാണത്തിന്റെ ദൃശ്യങ്ങള്‍ സമൂഹികമാധ്യമങ്ങളില്‍ വൈറലായി.
വളപട്ടണം ഗ്രാമപ്പഞ്ചായത്ത് അംഗവും മുന്‍ പ്രസിഡന്റുമായ വടക്കെ ഇല്ലം കൂടോത്ത് ലളിതാ ദേവിയുടെ മകന്‍ വി.കെ. മനോജിന്റെ മകള്‍ അഞ്ജനയും കോഴിക്കോട് സ്വദേശി തയ്യില്‍ ഇല്ലത്തില്‍ ഹരിനാഥുമാണ് വിവാഹിതരായത്. ബെംഗളൂരു ഇന്‍ഫോസിസില്‍ സോഫ്റ്റ്വേര്‍ എന്‍ജിനിയറാണ് അഞ്ജന. ഹരിനാഥ് മുംബൈയില്‍ ബാങ്ക് ഉദ്യോഗസ്ഥനും. 'മതസൗഹാര്‍ദത്തിന് മാതൃക' എന്ന കുറിപ്പോടെയാണ് കല്യാണാഘോഷത്തിന്റെ വീഡിയോദൃശ്യം പ്രചരിക്കുന്നത്.