'അമ്പലമില്ലാതെ ആല്‍ത്തറയില്‍ വാഴും..' ഓച്ചിറ പരബ്രഹ്മക്ഷേത്രത്തില്‍ പന്ത്രണ്ട് വിളക്ക് ആഘോഷം
അമ്പലമില്ലാതെ ആല്‍ത്തറയില്‍ വാഴുന്ന ഓംകാരമൂര്‍ത്തിയുടെ ക്ഷേത്രം.. കൊല്ലം ഓച്ചിറ പരബ്രഹ്മക്ഷേത്രം. ഇരുപത്തിരണ്ടേക്കര്‍ സ്ഥലത്ത് രണ്ട് ആല്‍ത്തറകളും കാവുകളും അടങ്ങുന്ന ക്ഷേത്രസങ്കല്‍പം. പ്രകൃതിയോടിണങ്ങിയ ആചാര അനുഷ്ഠാനങ്ങള്‍... വര്‍ഷംതോറും ലക്ഷക്കണക്കിന് ഭക്തരെത്തുന്ന ക്ഷേത്രത്തില്‍ ചെളിയാണ് പ്രസാദം. വൃശ്ചികം ഒന്നു മുതല്‍ പന്ത്രണ്ട് വരെ നടക്കുന്ന പന്ത്രണ്ടുവിളക്കാണ് ക്ഷേത്രത്തിന്റെ ഏറ്റവും പ്രധാനആഘോഷം. ആ ദിവസങ്ങളിലെ പ്രധാന ആചാരമാണ് കുടില്‍കെട്ടി ഭജനം.
ദുരിതശാന്തിക്കായി സ്വന്തം വീടും സൗകര്യങ്ങളും താത്കാലികമായി ഉപേക്ഷിച്ച് 12 ദിവസം ഭജനം പാര്‍ക്കാന്‍ ഓരോ വര്‍ഷവും ആയിരക്കണക്കിന് ഭക്തരാണ് ക്ഷേത്രത്തിലെത്തുക. ഇതിനായി ദേവസ്വം തയ്യാറാക്കിയ കുടിലുകള്‍ക്ക് മുന്‍കൂട്ടി ബുക്ക് ചെയ്യണം. തകരഷീറ്റുകൊണ്ട് നിര്‍മിച്ച ചെറിയ ഷെഡ്ഡുകളാണ് ഇപ്പോള്‍ കുടിലുകള്‍. കുടിലില്‍ നിലത്തുപായവിരിച്ച് കിടന്നാണ് ഉറക്കം. രാവിലെയും വൈകിട്ടും ആല്‍ത്തറയില്‍ പ്രദക്ഷിണവും പൂജകളും. മിക്ക കുടിലുകളിലും ഭക്ഷണവിതരണമുണ്ടാകും.