മെറിൻഡ ഒരു ദിവസം ഏഴ് കിലോ പൊറോട്ടയടിക്കും; പഠിക്കണം, കുടുംബം നോക്കണം |Fire and Flame

തൃശൂർ വടക്കാഞ്ചേരിക്കടുത്ത് എരുമപ്പെട്ടിയിൽ ഒരു തട്ടുകടയുണ്ട്. കട നടത്തുന്നത് ഡി​​ഗ്രി വിദ്യാർഥിയായ മെറിൻഡയും അമ്മയും. അവിടെ ചീഫ് കുക്ക് മെറിൻഡയാണ്. നല്ല ചൂടു പൊറോട്ടയും ബീഫുമടക്കം നിരവധി വിഭവങ്ങൾ മിറാൻഡയുണ്ടാക്കും. ഏഴുകിലോയിലധികം പൊടി മെറിൻ ഒറ്റയ്ക്ക് കുഴയ്ക്കും. വീശിയടിച്ചുണ്ടാക്കുന്ന പൊറോട്ടയ്ക്ക് രുചിയേറെ. പഴയ പൊറോട്ട മേയ്ക്കറുടെ അടുത്ത് നിന്ന് കണ്ടുപഠിച്ചതാണ് മെറിൻഡ. 

15 വർഷം മുമ്പാണ് മെറിൻഡയും അമ്മ അമ്മിണിയേയും രണ്ട് ചേച്ചിമാരേയും ഉപേക്ഷിച്ച് അച്ഛൻ പോയത്. ജീവിതത്തിന് മുന്നിൽ പകച്ചു നിൽക്കാതെ അമ്മ അമ്മിണി മൂവരെയും പഠിപ്പിച്ചു. ഇതിനിടയിൽ വന്ന കനത്ത സാമ്പത്തിക ബാധ്യതയിൽ അമ്മയെ തനിച്ചാക്കാതെ മെറിനും ജോലിക്കിറങ്ങി. അങ്ങനെ മെറിൻഡ തട്ടുകടയിൽ പൊറോട്ട മേയ്ക്കറായി. പരീക്ഷാ കാലത്ത് പൊറോട്ടയുടെ എണ്ണം കുറച്ച് പഠിക്കാൻ സമയം കണ്ടെത്തും. അന്നം സ്വന്തം ഉത്തരവാദിത്തമായതിനാൽ മെറിൻഡ കോളേജ് ഡേ പോലുള്ള കോളേജ് പരിപാടിക്കൊന്നും പോകാറില്ല. കൂട്ടുകാർക്കൊപ്പം കറങ്ങാൻ പോയാൽ കുടുംബം പട്ടിണിയാകും. പോരാത്തതിന് ലക്ഷങ്ങൾ കടവുമുണ്ട് ബാങ്കിൽ.