കംപ്യൂട്ടര്‍, മൊബൈല്‍ സ്‌ക്രീന്‍ ഉപയോഗിക്കുമ്പോള്‍ കഴുത്ത് വേദനിക്കുന്നുണ്ടോ? ടെക്‌നെക് ആകാം
സ്മാര്‍ട്ട് ഫോണ്‍, ലാപ്ടോപ്, കംപ്യൂട്ടര്‍...ഇതിലേതെങ്കിലുമൊന്നില്‍ മണിക്കൂറുകളോളം ചെലവഴിക്കുന്നവരാണ് നമ്മളില്‍ പലരും. ജോലി സംബന്ധമായിട്ടാണെങ്കില്‍ ആ ഇരിപ്പ് എട്ടും പത്തും മണിക്കൂര്‍ നീണ്ടേക്കാം. കുനിഞ്ഞിരുന്നോ തല അല്‍പം മുന്നോട്ടാഞ്ഞിരുന്നോ മണിക്കൂറുകളോളം സ്‌ക്രീന്‍ നോക്കുന്നവരാണ് നിങ്ങളെങ്കില്‍ ടെക് നെക്ക് വരാനുള്ള സാധ്യത വളരെ കൂടുതലാണ്.
സ്മാര്‍ട്ട്ഫോണുകളിലോ കംപ്യൂട്ടറുകളിലോ അധികനേരം നോക്കിയിരിക്കുമ്പോള്‍ കഴുത്തിലുണ്ടാകുന്ന അസഹ്യമായ വേദനയാണ് ടെക്നെക്ക് എന്നതുകൊണ്ടുദ്ദേശിക്കുന്നത്. തല മുന്നോട്ട് കുനിയുമ്പോള്‍ കഴുത്തിലെ പേശികള്‍ക്ക് അധിക സമ്മര്‍ദ്ദം വരുന്നതാണ് വേദനയ്ക്ക് കാരണം. കഴുത്ത് വേദന മാത്രമല്ല തോള്‍ വേദന, തലവേദന, കൂനിയുള്ള നില്‍പ്പ് എന്നിവയെല്ലാം ടെക്നെക്കിന്റെ ഭാഗമായി വരാം.