സാധാരണക്കാരുടെ വാഹനം, ഇതുവരെ വിറ്റത് 32 ലക്ഷം കാറുകൾ; 25ന്റെ നിറവിൽ വാഗണ്‍ ആര്‍
പാവങ്ങളുടെ ബെന്‍സെന്ന വിളിപ്പേരുള്ള, കുഞ്ഞൻ, സുന്ദരന്‍ കാർ, വാഗണ്‍ ആര്‍ ഇന്ന് 25-ാം പിറന്നാള്‍. 1999 ഡിസംബര്‍ 18-നാണ് ജനപ്രിയ മോഡലായ വാഗണ്‍ ആര്‍ പുറത്തിറങ്ങുന്നത്. ഇതുവരെ ഏകദേശം 32 ലക്ഷം വാഗണ്‍ ആർ കാറുകൾ വില്‍പ്പന നടത്തിയെന്നാണ് കണക്ക്. ഇതിന് പുറമെ ബംഗ്ലാദേശ്, നേപ്പാള്‍, ഭൂട്ടാന്‍ എന്നിവിടങ്ങളിലേക്ക് വലിയ രീതിയില്‍ കയറ്റി അയച്ചിട്ടുമുണ്ട്.
ബോക്‌സി ഡിസൈൻ കാരണം ആദ്യകാലത്ത് സമ്മിശ്ര പ്രതികരണമായിരുന്നു വാഗണ്‍ ആറിന് ലഭിച്ചത്. അതുകൊണ്ട് തന്നെ അഞ്ച് ലക്ഷം യൂണിറ്റിന്റെ വില്‍പ്പന പൂര്‍ത്തിയാക്കാന്‍ ഏതാണ്ട് ഒമ്പത് വര്‍ഷത്തോളമെടുത്തു. എന്നാൽ, പിന്നീട് ചിത്രം മാറി. ഒരു കുഞ്ഞു ഫാമിലിക്ക് സുഖകരമായി യാത്ര ചെയ്യാൻ കഴിയുന്ന ഇന്‍റീരിയറും പുതുമയാർന്ന മറ്റ് ഫീച്ചേഴ്സും വാഗൺ ആറിന് വലിയ സ്വീകാര്യത നേടികൊടുത്തു. ബഡ്ജറ്റ് ഫ്രണ്ട്‌ലി കാര്‍ എന്ന സവിശേഷത, സാധാരണക്കാരുടെ വാഹനമെന്ന പേര് വാഗണ്‍ ആറിന് പെട്ടെന്ന് നേടിക്കൊടുത്തു.