പടിയിറങ്ങാനൊരുങ്ങി റാഫ; ചെമ്മൺ കോർട്ടിൽ തീ പടർത്താൻ ഇനി അയാളില്ല

ഒന്നാം ലോകമഹായുദ്ധ കാലത്ത് ഫ്രാന്സിനായി യുദ്ധവിമാനങ്ങള് പറത്തിയ വ്യക്തിയാണ് യൂജീന് അഡ്രിയന് റോളണ്ട് ജോര്ജസ് ഗാരോസ്. ജീവിതത്തില് ഒരിക്കല് പോലും അയാളൊരു ടെന്നീസ് റാക്കറ്റ് കൈകൊണ്ട് തൊട്ടിട്ടില്ല. എങ്കിലും ഫ്രഞ്ച് ഓപ്പണ് ടെന്നീസ് ടൂര്ണമെന്റും ഇദ്ദേഹവും തമ്മിലൊരു ബന്ധമുണ്ട്. ഈ വൈമാനികനോടുള്ള ആദരസൂചകമായാണ് ഫ്രഞ്ച് ഓപ്പണ് മത്സരങ്ങള്ക്ക് അരങ്ങാകുന്ന സ്റ്റേഡിയത്തിന് റോളണ്ട് ഗാരോസ് എന്ന പേര് നല്കിയത്. എന്നെങ്കിലും അതൊന്ന് മാറ്റാന് ആര്ക്കെങ്കിലും തോന്നുകയാണെങ്കില് പകരം ഒരു പേരെ അവര്ക്കു മുന്നിലുണ്ടാകൂ, റാഫേല് നദാലിന്റെ, കളിമണ് കോര്ട്ടിലെ ആ ഇതിഹാസ താരത്തിന്റെ.
കുഞ്ഞു റാഫയുടെ കൈയില് മൂന്നാം വയസില് ആദ്യമായി ഒരു റാക്കറ്റ് വെച്ചുകൊടുക്കുന്നത് അമ്മാവനായ ടോണി നദാലാണ്. പക്ഷേ മറ്റൊരു അമ്മാവനും മുന് സ്പാനിഷ് ഫുട്ബോള് താരവുമായിരുന്ന മിഗ്വെല് ഏയ്ഞ്ചല് നദാലിനോടായിരുന്നു റാഫയ്ക്ക് പ്രിയം. ഫുട്ബോളിനെ സ്നേഹിച്ചിരുന്ന, സ്പാനിഷ് ക്ലബ്ബ് ബാഴ്സലോണയെ സ്നേഹിച്ചിരുന്ന, ബ്രസീലുകാരന് റൊണാള്ഡോയെ ആരാധിച്ചിരുന്ന ആ 10 വയസുകാരന് മനസില്ലാമനസോടെയാണ് പിന്നീട് ടെന്നീസില് ആത്മാവര്പ്പിച്ചത്.