'പട്ടില്‍ പൊതിഞ്ഞ ഒരു ശകാരം പോലും ആര്‍.എസ്.എസുകാരെ കണ്ട ADGP-ക്കില്ല'; മുഖ്യമന്ത്രിക്കെതിരേ സതീശന്‍
തിരുവനന്തപുരം: മുഖ്യമന്ത്രി അറിയാതെയാണ് എഡിജിപി അജിത് കുമാര്‍ ആര്‍എസ്എസ് നേതാക്കളെ കാണാന്‍ പോയതെങ്കില്‍ അദ്ദേഹത്തെ വിളിച്ച് പട്ടില്‍ പൊതിഞ്ഞ ഒരു ശകാരമെങ്കിലും മുഖ്യമന്ത്രി ചെയ്യണ്ടേയെന്ന് പ്രതിപക്ഷ നേതാവ് വിഡി സതീശന്‍. മുഖ്യമന്ത്രി പറഞ്ഞിട്ടാണ് എഡിജിപി പോയത് എന്നുള്ളതുകൊണ്ടാണ് അദ്ദേഹത്തിനെതിരേ അന്വേഷണത്തിന് നിര്‍ദേശം നല്‍കാത്തതെന്നും സതീശന്‍ സഭയില്‍ വിമര്‍ശിച്ചു.
'എംആര്‍ അജിത് കുമാര്‍ മുഖ്യമന്ത്രിയുടെ നിര്‍ദേശപ്രകാരം അദ്ദേഹത്തിന്റെ ദൂതനായി ആര്‍എസ്എസ് നേതാവുമായി കൂടിക്കാഴ്ച നടത്തിയെന്ന ആരോപണം ആദ്യം ഉന്നിച്ചത് താനാണ്. ഈ വിവരം കിട്ടി ഒരുമാസം കഴിഞ്ഞ് ശരിയാണോയെന്ന് നൂറ് ശതമാനം പരിശോധിച്ച ശേഷമാണ് ഒരാക്ഷേപമായി ഉന്നയിച്ചത്. ആദ്യം ബിജെപി പ്രസിഡന്റ് അക്കാര്യം നിഷേധിച്ചു. അജിത് കുമാര്‍ പാര്‍ട്ടിക്കാരനല്ലല്ലോ എന്നും അദ്ദേഹം ആര്‍എസ്എസ് നേതാവിനെ കണ്ടാലെന്താണ് കുഴപ്പമെന്നുമാണ് ചിലര്‍ ചോദിച്ചത്.