കെ.വി. തോമസിന്റെ പോസ്റ്റര് കത്തിച്ച് യു.ഡി.എഫ്. പ്രവര്ത്തകര്
തൃക്കാക്കരിയില് കെ.വി. തോമസിന്റെ പോസ്റ്റര് കത്തിച്ച് യു.ഡി.എഫ്. പ്രവര്ത്തകര്. ഉമാ തോമസ് വിജയമുറപ്പിച്ച ഘട്ടത്തില് കെ.വി. തോമസിന്റെ വീടിന് മുന്നിലും യു.ഡി.എഫ്. പ്രവര്ത്തകര് ആഹ്ളാദപ്രകടനം നടത്തി. യു.ഡി.എഫിന് ജയ് വിളിച്ചും പടക്കം പൊട്ടിച്ചുമാണ് പ്രവര്ത്തകര് യു.ഡി.എഫ്. മുന്നേറ്റം ആഘോഷിച്ചത്.
തിരുത മീനുമായി എത്തിയ പ്രവര്ത്തകര് തോമസ് മാഷിന്റെ ചിത്രം കത്തിക്കുകയും ചെയ്തു. തിരഞ്ഞെടുപ്പ് പ്രഖ്യാപിക്കുന്നതിന് മുന്പ് നടന്ന സി.പി.എം. പാര്ട്ടി കോണ്ഗ്രസില് പാര്ട്ടി വിലക്കിയിട്ടും സെമിനാറില് പങ്കെടുത്തത് മുതല് കെ.വി. തോമസ് പാര്ട്ടിയെ പിന്നില് നിന്ന് കുത്തുകയാണെന്ന വികാരമാണ് പ്രവര്ത്തകര്ക്ക്.
തിരഞ്ഞെടുപ്പില് പാര്ട്ടി സ്ഥാനാര്ഥിക്കെതിരെ രംഗത്ത് വരികയും ഇടതുപക്ഷത്തിന് പരസ്യമായി പിന്തുണ പ്രഖ്യാപിച്ച് പിണറായി വിജയന് ഉദ്ഘാടനം ചെയ്ത തിരഞ്ഞെടുപ്പ് കണ്വെന്ഷനില് പങ്കെടുക്കുകയും ചെയ്തതോടെ എല്ലാം നല്കിയ പാര്ട്ടിയെ കെ.വി. തോമസ് ചതിച്ചുവെന്ന വികാരമായിരുന്നു പ്രവര്ത്തകര്ക്ക്.