പാലക്കാടിന്റെ ഭൂമികയും ജീവിതങ്ങളും പശ്ചാത്തലമായ പുസ്തകശേഖരവുമായി 'മധുരം ഗായതി'
പാലക്കാട് : വായനദിനത്തില്‍ പുതുപ്പരിയാരത്തെ ''വിഹ'' എന്ന വീട്ടിന്റെ മുകള്‍നിലയില്‍ 'മധുരം ഗായതി'യെന്ന പുസ്തകക്കലവറ മിഴിതുറക്കുന്നത് പാലക്കാടിന്റെ സാഹിത്യചരിത്രത്തിലേക്കാണ്. പാലക്കാടിന്റെ ഭൂമികയും ജീവിതങ്ങളും പശ്ചാത്തലമാവുന്ന തിരഞ്ഞെടുക്കപ്പെട്ട നാല്പതോളം കൃതികളാണ് ഇവിടെ പ്രദര്‍ശിപ്പിച്ചിട്ടുള്ളത്. ഈ പുസ്തകങ്ങള്‍ വായിക്കാനും വിലയിരുത്താനും വായനപക്ഷാചരണത്തില്‍ 'മധുരം ഗായതി'യുടെ വാതിലുകള്‍ തുറന്നിരിക്കും.
150വര്‍ഷംമുന്‍പ് അനങ്ങന്‍മലയുടെ താഴ്വാരത്തെ കോതകുറുശ്ശിയില്‍നിന്ന് അപ്പു നെടുങ്ങാടി കുന്ദലതയുടെ രചയിതാവായതുമുതല്‍ ആരംഭിക്കുന്ന പാലക്കാടിന്റെ സാഹിത്യചരിത്രത്തെ പുതിയ കാലത്തിലേക്ക് ആവാഹിക്കാനാണ് ശ്രമമെന്ന് സംഘാടകനായ എഴുത്തുകാരന്‍ രാജേഷ് മേനോന്‍ പറഞ്ഞു.