ട്രെയിനിൽ സ്ലീപ്പിങ് ബെർത്തുകളിൽ ഉറക്കം രാവിലെ ആറ് മണിവരെ മതി; ഹർജി തള്ളി മദ്രാസ് ഹൈക്കോടതി

ചെന്നൈ: റിസർവ് ചെയ്ത റെയിൽവേ കോച്ചുകളിൽ രാത്രി 10 മണി മുതൽ രാവിലെ 6 മണി വരെ മാത്രം സ്ലീപ്പിങ് ബെർത്തുകൾ ഉപയോഗിക്കാൻ അനുമതി നൽകുന്ന റെയിൽവേ നിയമത്തിൽ മാറ്റം വരുത്താൻ മദ്രാസ് ഹൈക്കോടതി വിസമ്മതിച്ചു. പൊതുജനങ്ങളുടെ സൗകര്യം ഉറപ്പാക്കാനാണ് ഈ സമയക്രമമെന്നും നിയമം ചോദ്യം ചെയ്തുകൊണ്ടുള്ള ഹർജി തള്ളിക്കൊണ്ട് കോടതി വ്യക്തമാക്കി.

ചെന്നൈ സ്വദേശിയായ എസ്. ബാലസുബ്രഹ്മണ്യൻ സമർപ്പിച്ച ഹർജിയിലാണ് കോടതി ഉത്തരവ് പുറപ്പെടുവിച്ചത്. നേരത്തെ സിംഗിൾ ബെഞ്ച് ഹർജി തള്ളിയതിനെ തുടർന്നാണ് അദ്ദേഹം ഡിവിഷൻ ബെഞ്ചിനെ സമീപിച്ചത്. അസുഖബാധിതയായ ഭാര്യയോടൊപ്പം യാത്ര ചെയ്യുമ്പോൾ, അനുവദിച്ച സമയപരിധിക്ക് ശേഷവും സ്ലീപ്പിങ് ബെർത്ത് ഉപയോഗിക്കാൻ സഹയാത്രക്കാർ സമ്മതിച്ചില്ലെന്ന് ബാലസുബ്രഹ്മണ്യൻ ഹർജിയിൽ പറഞ്ഞിരുന്നു.

രോഗികൾ, ഗർഭിണികൾ, ഭിന്നശേഷിക്കാർ എന്നിവർക്ക് ഇളവ് തേടാമെന്ന് മാനുവലിൽ പറയുന്നുണ്ടെങ്കിലും പ്രായോഗികമായി ഇത് പ്രയോജനപ്പെടുന്നില്ലെന്നും അതിനാൽ നിയന്ത്രണം നിയമവിരുദ്ധമായി പ്രഖ്യാപിക്കണമെന്നുമാണ് ഹർജിക്കാരൻ ആവശ്യപ്പെട്ടത്.

ചീഫ് ജസ്റ്റിസ് എസ്.എ. ധർമാധികാരി, ജസ്റ്റിസ് ജി. അരുൾ മുരുകൻ എന്നിവരടങ്ങിയ ഡിവിഷൻ ബെഞ്ചാണ് ഇന്ത്യൻ റെയിൽവേ കൊമേഴ്‌സ്യൽ മാനുവൽ ചോദ്യം ചെയ്തുള്ള ഹർജി തള്ളിയത്. രോഗിയായ ഒരാളെ അനുവദിച്ച സമയപരിധിക്ക് ശേഷവും ഉറങ്ങാൻ അനുവദിക്കാൻ സഹയാത്രക്കാർ തയ്യാറായില്ല എന്ന ഒറ്റപ്പെട്ട സംഭവം ചൂണ്ടിക്കാട്ടി ഈ നിയമം റദ്ദാക്കാനാകില്ലെന്ന് കോടതി വ്യക്തമാക്കി.

എല്ലാ യാത്രക്കാരുടെയും സൗകര്യം ഉറപ്പാക്കാനാണ് ഈ നിയന്ത്രണമെന്ന് ഹൈക്കോടതി നിരീക്ഷിച്ചു. ഒരു നിയമം, ഹർജിക്കാരന്റെ ഭാര്യയ്ക്ക് സഹയാത്രക്കാർ ഉറങ്ങാനുള്ള സമയം നീട്ടിനൽകിയില്ല എന്ന ഒറ്റപ്പെട്ട കാരണം കൊണ്ട് അസാധുവാക്കാനാകില്ലെന്നും കോടതി വ്യക്തമാക്കി. റിസർവ് ചെയ്ത കോച്ചുകളിലെ എല്ലാ യാത്രക്കാരുടെയും സൗകര്യാർത്ഥമാണ് ഇത്തരത്തിൽ വ്യവസ്ഥ ചെയ്തിരിക്കുന്നതെന്ന് കോടതി ചൂണ്ടിക്കാട്ടി.

രാത്രി 10 മണി മുതൽ രാവിലെ 6 മണി വരെ മാത്രമാണ് സ്ലീപ്പിങ് ബെർത്ത് സൗകര്യം ലഭ്യമാകുക. ബാക്കി സമയം ഇരിപ്പിട സൗകര്യമായി മാറ്റിയിരിക്കുന്നു. മിഡിൽ, അപ്പർ ബെർത്തുകൾ അനുവദിക്കപ്പെട്ടിട്ടുള്ള യാത്രക്കാർക്കും പകൽ സമയത്ത് സുഖമായി ഇരിക്കാൻ ഇടം ലഭിക്കുന്നുണ്ടെന്ന് ഉറപ്പുവരുത്താനാണ് ഈ ക്രമീകരണം. സാധുവായ ടിക്കറ്റുള്ള എല്ലാ യാത്രക്കാർക്കും മറ്റുള്ളവർക്ക് ബുദ്ധിമുട്ടുണ്ടാക്കാതെ സുഖകരമായി യാത്ര ചെയ്യാൻ അവസരമൊരുക്കുകയാണ് ഇതിന്റെ പ്രധാന ലക്ഷ്യം.

Content Highlights: The Madras High Court dismissed a petition challenging the Indian Railways rule permitting sleeping berths only between 10 PM and 6 AM, emphasizing that the regulation ensures overall passenger convenience.