ഇന്ത്യയിലെ നവദമ്പതിമാർ പ്ലാൻ ചെയ്യുന്നത് 'മിനി മൂൺ'; വെളിപ്പെടുത്തലുമായി ട്രാവൽ പ്ലാറ്റ്ഫോം
വിവാഹത്തിന്റെ ബഹളങ്ങൾക്ക് ശേഷമുള്ള ഒരു ആശ്വാസമാണ് ഹണിമൂൺ. മലനിരകളുടെ ശാന്തതയിലേക്കോ കടൽത്തീരത്തിന്റെ മനോഹാരിതയിലേക്കോ രക്ഷപ്പെടാൻ നവദമ്പതികൾ ആകാംഷയോടെ കാത്തിരിക്കുന്നതിൽ അതിശയിക്കാനില്ല. ഒരു പുതിയ റിപ്പോർട്ട് പ്രകാരം, വിവാഹ ആഘോഷങ്ങൾക്ക് ശേഷം നവദമ്പതികൾ ഇപ്പോൾ ഒന്നല്ല, രണ്ട് യാത്രകളാണ് ആസൂത്രണം ചെയ്യുന്നത്.
അതിലൊന്ന് കുറച്ച് ദിവസത്തേക്കുള്ള ഒരു ചെറിയ യാത്രയായ 'മിനി-മൂൺ' ആണ്. മറ്റൊന്ന് 'ബിഗ്-മൂൺ' എന്നറിയപ്പെടുന്ന പരമ്പരാഗതമായ ഒരു നീണ്ട അവധിക്കാല യാത്രയും. ഇന്ത്യൻ ട്രാവൽ പ്ലാറ്റ്ഫോമായ ത്രില്ലോഫീലിയയിൽ നിന്നാണ് ഈ വെളിപ്പെടുത്തൽ.
ത്രില്ലോഫീലിയയുടെ ഹണിമൂൺ ട്രാവൽ റിപ്പോർട്ട് 2025-26 പ്രകാരം, വിവാഹത്തിന് തൊട്ടുപിന്നാലെ മൂന്ന്-അഞ്ച് രാത്രികൾ നീളുന്ന ഒരു മിനി-മൂണും, അതിനുശേഷം കൂടുതൽ ദിവസം ചെലവഴിക്കുന്ന ഒരു ബിഗ്-മൂണും നവദമ്പതികൾ തിരഞ്ഞെടുക്കുന്നു.
ഓരോ വർഷവും 18 ശതമാനം വർധനവോടെ മിനി-മൂൺ യാത്രകൾ കൂടിക്കൊണ്ടിരിക്കുകയാണെന്നും റിപ്പോർട്ടിൽ പറയുന്നു. വിവാഹിതരായവർ അവരുടെ ഒന്നാം വർഷം ഒരുമിച്ച് യാത്ര ചെയ്യാനും ആഘോഷിക്കാനും ആഗ്രഹിക്കുന്ന രീതിയിലുള്ള ഒരു സുപ്രധാന മാറ്റമാണിത് സൂചിപ്പിക്കുന്നത്.
എന്തുകൊണ്ടാണ് നവദമ്പതികൾ മിനിമൂണുകൾ തിരഞ്ഞെടുക്കുന്നത്?
വിവാഹ ആഘോഷങ്ങളുടെ തിരക്കിന് ശേഷം ഉടൻ തന്നെ സാധാരണ നിലയിലേക്ക് മടങ്ങിവരാൻ മിനി-മൂൺ നവദമ്പതികളെ സഹായിക്കുന്നുവെന്ന് ത്രില്ലോഫീലിയ റിപ്പോർട്ടിൽ പറയുന്നു. അവർക്ക് ദീർഘകാല അവധി എടുക്കുന്നത് ഒഴിവാക്കാൻ കഴിയുമെന്നത് മാത്രമല്ല, സങ്കീർണമായ തയ്യാറെടുപ്പുകളിലൂടെ കടന്നുപോകേണ്ടിയും വരുന്നില്ല.
അതേസമയം, വിവാഹം കഴിഞ്ഞ് ഏതാനും മാസങ്ങൾക്ക് ശേഷം ആസൂത്രണം ചെയ്യുന്ന ബിഗ്-മൂൺ, ദമ്പതികളെ കൂടുതൽ ആഴത്തിലുള്ളതും അനുഭവസമ്പന്നവുമായ ഒരു യാത്രയ്ക്ക് പ്രാപ്തരാക്കുന്നു.
അതൊരു ഓഫ്-ബീറ്റ് ഡെസ്റ്റിനേഷനാണോ, ഒരു അന്താരാഷ്ട്ര അവധിക്കാല യാത്രയാണോ, അതോ പ്രകൃതി കേന്ദ്രീകൃതമായ ഒരു യാത്രയാണോ എന്നിങ്ങനെയുള്ള തങ്ങളുടെ പരസ്പര യാത്രാ മുൻഗണനകളെക്കുറിച്ച് ചിന്തിക്കാൻ ഇത് അവർക്ക് സമയം നൽകുന്നു.
മിനി-മൂൺ, ബിഗ്-മൂൺ എന്നിവ നിർണയിക്കുന്ന ഘടകങ്ങൾ
റിപ്പോർട്ട് പ്രകാരം, നവദമ്പതികൾ ആഡംബരത്തേക്കാൾ അനുഭവങ്ങൾക്ക് പ്രാധാന്യം നൽകുന്ന മിനി-മൂണുകളും ബിഗ്-മൂണുകളുമാണ് തിരഞ്ഞെടുക്കുന്നത്. 64 ശതമാനം ദമ്പതികളും സൂര്യാസ്തമയ യാത്രകൾ, വില്ലകളിലെ താമസം, ബീച്ച് ഡിന്നറുകൾ എന്നിവ പോലുള്ള റൊമാന്റിക് അല്ലെങ്കിൽ സ്വകാര്യ സൗകര്യങ്ങൾ ആസ്വദിക്കുന്നു. അതേസമയം, 42 ശതമാനം പേരുടെയും യാത്രാ പദ്ധതികളിൽ സ്നോർക്കെല്ലിങ്, സിപ്പ്ലൈനിങ്, സ്നോ പ്ലേ തുടങ്ങിയ രസകരമായ സാഹസിക പ്രവർത്തനങ്ങളും ആയുർവേദ റിട്രീറ്റുകൾ പോലുള്ള വെൽനസ് സെഷനുകളും ഉൾപ്പെടുന്നു.
പ്രശസ്തമായ ഹണിമൂൺ കേന്ദ്രങ്ങൾ
പ്രകൃതിയുടെയും സംസ്കാരത്തിൻ്റെയും സംയോജനം കാരണം, ഇന്ത്യയിൽ രണ്ട് തരം ഹണിമൂണുകൾക്കും പ്രശസ്തമായ സ്ഥലങ്ങളിൽ കേരളം, ആൻഡമാൻ, ഗോവ, രാജസ്ഥാൻ എന്നിവ ഉൾപ്പെടുന്നു. സ്വകാര്യതയും വേറിട്ടൊരു അനുഭവവും ആഗ്രഹിക്കുന്ന ദമ്പതികൾക്കായി ഹിമാചൽ പ്രദേശ്, മേഘാലയ, കൂർഗ് തുടങ്ങിയ സ്ഥലങ്ങളും ഈ പട്ടികയിലുണ്ട്. അന്താരാഷ്ട്ര തലത്തിൽ തായ്ലൻഡ്, വിയറ്റ്നാം, ബാലി, മാലദ്വീപ് എന്നിവ മികച്ച തിരഞ്ഞെടുപ്പുകളായി മാറിയിരിക്കുന്നു.
Content Highlights: Discover the new trend of Indian newlyweds planning two honeymoons: a quick `mini-moon` and a longer `big-moon`. Learn why & where to go!