കോട്ടയ്ക്കുള്ളിൽ എത്തിയപോലെ തോന്നും, അലിഞ്ഞുചേരാം അമയപ്ര പാറയുടെ സൗന്ദര്യത്തിൽ

ഇത് അമയപ്ര പാറ. സമതലപ്രദേശത്തെ ചെറിയ മല. ഉടുമ്പന്നൂർ ടൗണിൽനിന്ന് ഏറെ അകലെയല്ല മനോഹര കാഴ്ചകൾ സമ്മാനിക്കുന്ന അമയപ്ര പാറ. ഇവിടെ എത്തിയാൽ നാലുവശവും മലകളാൽ ചുറ്റപ്പെട്ടുകിടക്കുന്നതിനാൽ ഒരു കോട്ടയ്ക്കുള്ളിൽ എത്തിയ അനുഭവമായിരിക്കും. പ്രഭാതത്തിൽ പെരിങ്ങാശ്ശേരി മലയിൽനിന്ന് ഉദിച്ചുയരുന്ന സൂര്യന്റെയും സായാഹ്നത്തിൽ ചെപ്പുകുളം മലയിൽ എരിഞ്ഞടങ്ങുന്ന സൂര്യന്റെയും മിഴിവാർന്ന കാഴ്ചകൾ കാണാം.

വടക്ക് വണ്ണപ്പുറം തൊമ്മൻകുത്ത് ഭാഗത്തുള്ള കോട്ടപ്പാറയും തെക്ക് വെണ്ണിയാനി കുറുക്കനാട് മലനിരകളുടെ ഭാഗവും കിഴക്ക് മനയത്തടം കൈതപ്പാറ പെരിങ്ങാശ്ശേരി മലനിരകളും പടിഞ്ഞാറ് ചെപ്പുകുളം ചാലാശ്ശേരി മലനിരകളും കാണാം. പ്രശസ്തമായ അമയപ്ര മഹാദേവക്ഷേത്രവും ഇവിടെയാണ്.

നല്പത്തഞ്ചു കുടുംബങ്ങൾ ഇവിടെ താമസിക്കുന്നുണ്ട്. മഴക്കാലത്തുപോലും പാറയിൽക്കൂടി അപകടമില്ലാതെ നടക്കാം. രാവിലെയും വൈകീട്ടുമാണ് ഇവിടെ കാഴ്ചകൾ കാണാൻ ഏറ്റവും അനുയോജ്യം. അമയപ്ര പാറവഴി മിഷൻകുന്നിലേക്കുള്ള കോൺക്രീറ്റ് റോഡ് വീതികൂട്ടി ഹാൻഡ് റെയിൽ പിടിപ്പിച്ചാൽ ഇവിടെ എത്തുന്നവർക്ക് ഉപകാരപ്പെടും.

എങ്ങനെ എത്താം

ഉടുമ്പന്നൂർ ടൗണിൽനിന്ന് രണ്ടുകിലോമീറ്റർ ദൂരം മാത്രമാണ് അമയപ്ര പാറയിലേക്കുള്ളത്. തൊടുപുഴയിൽനിന്ന്‌ ഉടുമ്പന്നൂർ പഞ്ചായത്ത്‌ പടിക്കൽ എത്തി അമയപ്ര റോഡിൽക്കൂടി ചാക്കപ്പൻ കവലയിൽനിന്ന് ഒരുകിലോ മീറ്റർ ദൂരം പോയാൽ അമയപ്ര പാറയിൽ എത്തി കാഴ്ചകൾ കണ്ട്‌ മടങ്ങാം. പാറയിലേക്കെത്താൻ കോൺക്രീറ്റ് ചെയ്ത നല്ലവഴിയുണ്ട്.

Content Highlights: amayapra rock, unknown destination in idukki, local travel destinations