നാട്ടികയിലെ ടോൾപിരിവ്; കളക്ടറേറ്റ് മാർച്ചുമായി എൽ.ഡി.എഫ്.

തൃശ്ശൂർ : ദേശീയപാത 66-ന്റെ നിർമാണം പൂർത്തിയാക്കുന്നതിനുമുൻപ് നാട്ടികയിൽ ടോൾപിരിവ് ആരംഭിച്ച കേന്ദ്ര-സംസ്ഥാന സർക്കാരുകളുടെ നടപടിക്കെതിരേ രൂക്ഷവിമർശനവുമായി എൽ.ഡി.എഫ്. മാർച്ച്. നിർമാണം പൂർത്തിയാകാതെ ടോൾപിരിവ് അനുവദിക്കരുതെന്നും പ്രദേശവാസികൾക്ക് ടോൾ സൗജന്യമാക്കണമെന്നും ആവശ്യപ്പെട്ട് എൽ.ഡി.എഫ്. ജനകീയസമരസമിതിയുടെ നേതൃത്വത്തിൽ കളക്ടറേറ്റിലേക്ക് മാർച്ച് നടത്തി. സി.പി.എം. സംസ്ഥാന കമ്മിറ്റി അംഗം ആർ. ബിന്ദു മാർച്ച് ഉദ്ഘാടനംചെയ്തു.

നിർമാണം പൂർത്തിയാക്കുന്നതിനു മുൻപുതന്നെ ടോൾപിരിവ് ആരംഭിച്ച് സാധാരണക്കാരുടെ മേൽ സാമ്പത്തികഭാരം അടിച്ചേൽപ്പിക്കുകയാണ് കേന്ദ്ര-സംസ്ഥാന സർക്കാരുകളെന്ന് ആർ. ബിന്ദു പറഞ്ഞു.

അടിപ്പാതകൾ, മേൽപ്പാലങ്ങൾ, സർവീസ് റോഡുകൾ, വഴിവിളക്കുകൾ തുടങ്ങിയ അടിസ്ഥാനസൗകര്യങ്ങൾ ഉറപ്പാക്കാതെ ടോൾപിരിവ് നടത്തുന്നത് അംഗീകരിക്കാനാകില്ലെന്നും ആർ. ബിന്ദു പറഞ്ഞു. ചാവക്കാട്, ചേറ്റുവ, വാടാനപ്പള്ളി, എടമുട്ടം, എസ്.എൻ. പുരം, കൊടുങ്ങല്ലൂർ തുടങ്ങിയ പ്രദേശങ്ങളിൽ പാലങ്ങളുടെയും അനുബന്ധസൗകര്യങ്ങളുടെയും നിർമാണം ഇനിയും പൂർത്തിയാകാനുണ്ടെന്നും ഈ പ്രവൃത്തികൾ പൂർത്തിയാക്കിയശേഷം മാത്രമേ ടോൾപിരിവ് നടത്താവൂ എന്നും മാർച്ചിൽ ആവശ്യമുയർന്നു.

ടോൾ പ്ലാസയുടെ 20 കിലോമീറ്റർ ചുറ്റളവിൽ താമസിക്കുന്ന പ്രദേശവാസികൾക്ക് സൗജന്യമായി ടോൾ കടന്നുപോകാൻ അനുമതി നൽകണമെന്നും പ്രതിഷേധക്കാർ ആവശ്യപ്പെട്ടു.

ഗീതാഗോപി എം.എൽ.എ. അധ്യക്ഷയായി. സി.പി.ഐ. സംസ്ഥാന എക്സിക്യുട്ടീവ് അംഗം വി.എസ്. സുനിൽകുമാർ, എൽ.ഡി.എഫ്. ജില്ലാ കൺവീനർ പി.കെ. ചന്ദ്രശേഖരൻ, സി.പി.ഐ. ജില്ലാ സെക്രട്ടറി കെ.ജി. ശിവാനന്ദൻ, ജില്ലാ അസിസ്റ്റന്റ് സെക്രട്ടറി ടി.ആർ. രമേഷ്‌കുമാർ, സംഘാടകസമിതി ചെയർമാൻ കെ.പി. സന്ദീപ്, കൺവീനർ എം.എ. ഹാരിസ്ബാബു, ട്രഷറർ വി.കെ. ജ്യോതിപ്രകാശ്, സി.എസ്.പി. സംസ്ഥാന സെക്രട്ടറി രഘു കെ. മാരാത്ത്, സി.ടി. ജോഫി തുടങ്ങിയവർ പ്രസംഗിച്ചു.