തെക്കുപടിഞ്ഞാറൻ കാലവർഷം വീണ്ടും സജീവമാകുന്നു; ദക്ഷിണേന്ത്യയിൽ കനത്തമഴയെന്ന് പ്രവചനം

രണ്ടാഴ്ചത്തെ ഇടവേളയ്ക്ക് ശേഷം രാജ്യത്ത് തെക്കുപടിഞ്ഞാറൻ കാലവർഷം വീണ്ടും സജീവമാകുന്നതായി റിപ്പോർട്ട്. മധ്യ ഇന്ത്യയിൽ മഴമേഘങ്ങൾ ശക്തിപ്രാപിക്കുന്നത്, ഈ മേഖലയിൽ രാജ്യത്ത് വലിയ ആശ്വാസമാകുമെന്ന് കാലാവസ്ഥാ വകുപ്പ് വ്യക്തമാക്കി. വരും ആഴ്ചയിൽ രാജ്യത്ത് ഏറ്റവും കൂടുതൽ മഴ ലഭിക്കുന്നത് ദക്ഷിണേന്ത്യൻ സംസ്ഥാനങ്ങളിലായിരിക്കുമെന്ന് കാലാവസ്ഥാ വകുപ്പ് അറിയിച്ചു.

കേരളം, മാഹി മേഖലയിൽ ജൂൺ 19 മുതൽ 23 വരെ ശക്തമായ മഴയ്ക്ക് സാധ്യതയുണ്ട്. തമിഴ്‌നാട്, പുതുച്ചേരി, കാരയ്ക്കൽ മേഖലയിൽ ജൂൺ 19 മുതൽ 21 വരെ ഒറ്റപ്പെട്ട ശക്തമായ മഴ ലഭിച്ചേക്കാം.കർണാടക തീരപ്രദേശങ്ങളിൽ ജൂൺ 21 മുതൽ 25 വരെയും, വടക്ക്-തെക്കൻ ഉൾനാടൻ കർണാടകയിൽ ജൂൺ 22, 23 തീയതികളിലും കനത്ത മഴ പ്രതീക്ഷിക്കുന്നു. ലക്ഷദ്വീപ് ജൂൺ 21-ന് ശക്തമായ മഴ ലഭിച്ചേക്കാം.

വടക്ക്, മധ്യ ഇന്ത്യയിലെ പല ഭാഗങ്ങളിലും വ്യാപകമായ കനത്ത മഴ ഇനിയും ആരംഭിച്ചിട്ടില്ല. എങ്കിലും, വർദ്ധിച്ചുവരുന്ന മേഘാവൃതമായ അന്തരീക്ഷവും ഇടിമിന്നലോട് കൂടിയ മഴയും വരും ദിവസങ്ങളിൽ കാലവർഷം കൂടുതൽ സജീവമാകുമെന്നതിന്റെ സൂചനയാണ് നൽകുന്നത്. ജൂൺ 19 മുതൽ 25 വരെയുള്ള ദിവസങ്ങളിൽ ഛത്തീസ്ഗഡ്, കിഴക്കൻ-പടിഞ്ഞാറൻ മധ്യപ്രദേശ്, വിദർഭ എന്നിവിടങ്ങളിൽ മഴയ്ക്ക് സാധ്യതയുണ്ടെന്ന് ഐഎംഡി അറിയിച്ചു.

പടിഞ്ഞാറൻ മധ്യപ്രദേശിൽ ജൂൺ 19, 20 തീയതികളിൽ മണിക്കൂറിൽ 50 മുതൽ 70 കിലോമീറ്റർ വരെ വേഗതയിൽ അതിശക്തമായ കാറ്റുവീശാൻ സാധ്യതയുള്ളതിനാൽ മുന്നറിയിപ്പ് നൽകിയിട്ടുണ്ട്. ഈ പ്രദേശങ്ങളിൽ ജൂൺ 23 വരെ ശക്തമായ ഇടിമിന്നലോടു കൂടിയ മഴയ്ക്കും സാധ്യതയുണ്ട്.

മഴ വൈകിയത് കാർഷിക മേഖലയിൽ വലിയ ആശങ്കയുണ്ടാക്കിയിരുന്നു. മഴ സജീവമാകുന്നത് രാജ്യത്തെ കർഷകർക്ക് ഏറെ ആശ്വാസമാകും.

Content Highlights: The India Meteorological Department (IMD) has announced a revival of the southwest monsoon, with heavy rainfall expected across Kerala, Lakshadweep, and parts of South India between June 19 and June 25, bringing much-needed relief to the agricultural sector.