കൗമാരക്കാരുടെ വാട്സാപ്പ് ഉപയോഗം രക്ഷിതാക്കൾക്ക് നിയന്ത്രിക്കാം; പുതിയ പാരന്റൽ കൺട്രോളുകൾ അവതരിപ്പിച്ചു

മെറ്റയുടെ ഉടമസ്ഥതയിലുള്ള ജനപ്രിയ മെസേജിങ് പ്ലാറ്റ്‌ഫോമായ വാട്‌സ്ആപ്പ് കൗമാരക്കാരായ ഉപയോക്താക്കളുടെ (Teen Accounts) സുരക്ഷ മുൻനിർത്തി പുതിയ പാരന്റൽ കൺട്രോളുകൾ പുറത്തിറക്കി. കൗമാരക്കാരായ കുട്ടികൾ അവരുടെ പഠനാവശ്യങ്ങൾക്കോ മറ്റോ സ്മാർട്ട്‌ഫോൺ ഉപയോഗിക്കുന്നുണ്ടെങ്കിൽ അവരുടെ വാട്സാപ്പ് ഉപയോഗം രക്ഷിതാക്കളുടെ നിയന്ത്രണത്തിലും നിരീക്ഷണത്തിലുമാക്കാൻ ഈ സംവിധാനത്തിലൂടെ സാധിക്കും. സോഷ്യൽ മീഡിയ അഡിക്ഷനും കുട്ടികളുടെ ഓൺലൈൻ സുരക്ഷയും സംബന്ധിച്ച് ആഗോളതലത്തിൽ ആശങ്കകൾ ഉയരുകയും വിവിധ സർക്കാരുകൾ നിയന്ത്രണങ്ങൾ കടുപ്പിക്കുകയും ചെയ്യുന്ന പശ്ചാത്തലത്തിലാണ് വാട്‌സ്ആപ്പിന്റെ ഈ നീക്കം.

പ്രധാന ഫീച്ചറുകളും മാറ്റങ്ങളും

• പ്രൊഫൈൽ, ഗ്രൂപ്പ് സുരക്ഷ: കൗമാരക്കാരുടെ പ്രൊഫൈൽ ഫോട്ടോ ആരൊക്കെ കാണണം, അവരെ ഗ്രൂപ്പുകളിൽ ചേർക്കാൻ ആർക്കൊക്കെ അനുമതിയുണ്ട് എന്നിവ നിർണയിക്കാൻ രക്ഷിതാക്കൾക്ക് സാധിക്കും.
• ഗ്രൂപ്പ് നോട്ടിഫിക്കേഷനുകൾ: കുട്ടി ഏതെങ്കിലും ഗ്രൂപ്പിൽ ചേരുമ്പോഴോ ഗ്രൂപ്പിൽ നിന്ന് പുറത്തുപോകുമ്പോഴോ, അല്ലെങ്കിൽ കുട്ടി ഉൾപ്പെടുന്ന ഗ്രൂപ്പിലേക്ക് പുതിയ അംഗങ്ങൾ വരുമ്പോഴോ രക്ഷിതാക്കൾക്ക് അറിയിപ്പ് ലഭിക്കും.
• ചാനലുകളും സ്റ്റാറ്റസുകളും: കുട്ടിക്ക് ആരെയൊക്കെ ചാനലുകളിൽ പിന്തുടരാം, ആരുടെയൊക്കെ സ്റ്റാറ്റസ് കാണാം, കുട്ടിയുടെ സ്റ്റാറ്റസ് ആരൊക്കെ കാണണം എന്നിവയും രക്ഷിതാക്കൾക്ക് നിയന്ത്രിക്കാം.
• പിൻ ഉപയോഗിച്ച് അംഗീകാരം: ഈ പ്രൈവസി ക്രമീകരണങ്ങളിൽ മാറ്റംവരുത്തണമെങ്കിൽ രക്ഷിതാക്കൾ സെറ്റ് ചെയ്ത പ്രത്യേക പിൻ (PIN) മുഖേനയുള്ള അനുമതി കൗമാരക്കാർക്ക് ആവശ്യമാണ്.
• മെറ്റാ നിർമിത ബുദ്ധി സുരക്ഷ: മെറ്റാ നിർമിത ബുദ്ധി ഉപയോഗത്തിൽ 13 വയസിന് മുകളിൽ പ്രായം നിശ്ചയിക്കുന്ന '13+' സെറ്റിങ്സിന് പുറമെ കൂടുതൽ നിയന്ത്രണങ്ങളുള്ള 'ലിമിറ്റഡ് കണ്ടന്റ്' ഓപ്ഷനും തിരഞ്ഞെടുക്കാം.

എൻഡ്-ടു-എൻഡ് എൻക്രിപ്ഷനും സുരക്ഷയും

പുതിയ സുരക്ഷാ മാറ്റങ്ങൾ നടപ്പിലാക്കുമ്പോഴും വാട്‌സ്ആപ്പിന്റെ എൻഡ്-ടു-എൻഡ് എൻക്രിപ്ഷൻ സുരക്ഷയ്ക്ക് മാറ്റമൊന്നുമില്ല. അതായത്, കുട്ടികളുടെ സ്വകാര്യ സന്ദേശങ്ങളോ കോളുകളോ വാട്‌സ്ആപ്പിനോ രക്ഷിതാക്കൾക്കോ പുറത്തുനിന്നുള്ള മറ്റാർക്കെങ്കിലുമോ കാണാനോ കേൾക്കാനോ സാധിക്കില്ല. കുട്ടികളുടെ വാട്സാപ്പ് ഉപയോഗത്തിന്റെ സുതാര്യത ഉറപ്പുവരുത്തുന്നതിനൊപ്പം സന്ദേശങ്ങളുടെ സ്വകാര്യത നിലനിർത്തിക്കൊണ്ടുമാണ് ഈ ഫീച്ചറുകൾ രൂപകൽപ്പന ചെയ്തിരിക്കുന്നതെന്ന് വാട്‌സ്ആപ്പ് അറിയിച്ചു. ഇതിനുമുമ്പ്, ഇക്കഴിഞ്ഞ മാർച്ച് മാസത്തിൽ 13 വയസ്സിൽ താഴെയുള്ള കുട്ടികൾക്കായി രക്ഷിതാക്കൾക്ക് നിയന്ത്രിക്കാവുന്ന അക്കൗണ്ട് സൗകര്യവും (Parent-managed accounts) വാട്‌സ്ആപ്പ് പരിചയപ്പെടുത്തിയിരുന്നു.

Content Highlights: WhatsApp has introduced new parental control features for teen accounts, enabling parents to manage profile visibility, group notifications, channel access, and Meta AI usage while maintaining end-to-end encryption for private messages.