ട്വിറ്റര് ലോഗോ മാറി, കിളിക്ക് പകരം ഇനി X ; മാറ്റങ്ങൾ അവതരിപ്പിച്ച് കമ്പനി
ജനപ്രിയ സോഷ്യൽ മീഡിയാ വെബ്സൈറ്റുകളിലൊന്നായ ട്വിറ്റര് റീബ്രാന്ഡ് ചെയ്തു. ട്വിറ്റര് വെബ്സൈറ്റിലെ പക്ഷിയുടെ ചിഹ്നം മാറി ഇപ്പോള് X എന്ന പുതിയ ലോഗോ ആണ് നല്കിയിരിക്കുന്നത്. ഞായറാഴ്ചയാണ് ട്വിറ്റര് റീബ്രാന്റ് ചെയ്യുകയാണെന്ന് ഇലോണ് മസ്ക് പ്രഖ്യാപിച്ചത്.
ട്വിറ്ററിന്റെ ലോഗിൻ പേജിലും ഹോം പേജിൽ ഇടത് വശത്ത് മുകളിലായും ഉണ്ടായിരുന്ന പക്ഷിയുടെ ലോഗോ മാറ്റി X എന്നാക്കി. വെബ്സൈറ്റ് തുറക്കുമ്പോഴും X എന്ന ലോഗോ കാണിക്കുന്നുണ്ട്. കറുപ്പ് നിറത്തിലാണ് ലോഗോ. ട്വിറ്ററിന്റെ ഔദ്യോഗിക പേജായിരുന്ന @twitter ന്റെ പേര് മാറ്റി X എന്നാക്കി. പ്രൊഫൈൽ ചിത്രവും പുതിയ ലോഗോ ആക്കി മാറ്റിയിട്ടുണ്ട്. ഇതോടെ കമ്പനിക്ക് കീഴിലുള്ള ഔദ്യോഗിക വെരിഫൈഡ് അക്കൗണ്ടുകൾക്കൊപ്പമുള്ള കമ്പനി ബാഡ്ജും പുതിയ ലോഗോ ആയി മാറി. മസ്കിന്റേയും, സിഇഒ ലിൻഡ യക്കരിനോയുടെയും ഔദ്യോഗിക അക്കൗണ്ടിൽ ഇപ്പോൾ ഈ ലോഗോ ആണുള്ളത്.
എക്സ് എവരിതിങ് ആപ്പ് എന്ന പേരില് ട്വിറ്ററിനെ പരിവര്ത്തനം ചെയ്യുമെന്ന് കഴിഞ്ഞ വര്ഷം ഇലോണ് മസ്ക് പ്രഖ്യാപിച്ചിരുന്നു. ട്വിറ്റര് ഏറ്റെടുത്തിന് ശേഷം രജിസ്റ്റര് ചെയ്ത പുതിയ കമ്പനിയുടെ പേര് X corp എന്നായിരുന്നു.
എഐ പിന്തുണയില് പ്രവര്ത്തിക്കുന്ന ഓഡിയോ, വീഡിയോ മെസേജിങ്, പണമിടപാട്, ബാങ്കിങ് എന്നീ സൗകര്യങ്ങളും വിവിധ ആശയങ്ങള്, സാധനങ്ങള്, സേവനങ്ങള്, അവസരങ്ങള് എന്നിവയ്ക്കുള്ള ഒരു ആഗോള വിപണിയായുമാണ് കമ്പനി പുതിയ പ്ലാറ്റ്ഫോമിനെ ആവിഷ്കരിച്ചിരിക്കുന്നത്.
Content Highlights: twitter replaced bird logo with new x logo, elon musk, x.com