യുഗാന്ത്യത്തിലേക്ക് ; ബ്ലൂ-റേ റെക്കോർഡർ നിർമാണം സോണി അവസാനിപ്പിച്ചു

ബ്ലൂ റേ ഡിസ്ക് റെക്കോർഡറുകളുടെ നിർമാണം നിർത്തുകയാണെന്ന് പ്രഖ്യാപിച്ച് ലോകത്തെ ഏറ്റവും വലിയ ബ്ലൂ-റേ ഡിസ്ക് നിർമാതാക്കളായ സോണി കോർപ്പറേഷൻ. കഴിഞ്ഞ ഏതാനും വർഷങ്ങളായി ആവശ്യം കുറഞ്ഞുവരുന്ന പശ്ചാത്തലത്തിലാണ് ഈ തീരുമാനം. 2026 ഫെബ്രുവരി മുതൽ എല്ലാ ബ്ലൂ-റേ ഡിസ്ക് റെക്കോർഡർ മോഡലുകളുടെയും ഷിപ്പിങ് ഘട്ടംഘട്ടമായി അവസാനിപ്പിക്കുമെന്നും ഇതിന് പകരമായി പുതിയ മോഡലുകൾ ഉണ്ടാവില്ലെന്നും ഫെബ്രുവരി 9-ന് സോണി അറിയിച്ചു.

2024 ൽ തന്നെ ബ്ലൂ-റേ ഡിസ്കുകളുടേയും മറ്റ് ഒപ്റ്റിക്കൽ ഡിസ്ക് ഫോർമാറ്റുകളുടെയും നിർമാണം അവസാനിപ്പിക്കുമെന്ന് 2024 ൽ തന്നെ സോണി പ്രഖ്യാപിച്ചിരുന്നു. ഒപ്റ്റിക്കൽ സ്റ്റോറേജ് വിപണിയിൽ മുന്നേറ്റമില്ലാതായതോടെ മീഡിയ ഡിവിഷനിലെ 40 ശതമാനം ജീവനക്കാരെയും കമ്പനി പിരിച്ചുവിട്ടിരുന്നു. റെക്കോർഡ് ചെയ്യാവുന്ന ബ്ലൂ-റേ ഡിസ്കുകൾ, മിനി ഡിസ്കുകൾ (MiniDiscs), എം.ഡി. ഡേറ്റ (MD data), മിനി ഡി.വി. (MiniDV) കാസറ്റുകൾ എന്നിവ ഇനി നിർമ്മിക്കില്ലെന്നാണ് കമ്പനി കഴിഞ്ഞ വർഷം നടത്തിയ പ്രഖ്യാപനം.

2026-ലേക്ക് എത്തുമ്പോൾ, എല്ലാ ബ്ലൂ-റേ ഡിസ്ക് റെക്കോർഡറുകളുടെയും വിൽപന അവസാനിപ്പിക്കുകയാണെന്ന് ഈ സാങ്കേതിക ഭീമൻ വ്യക്തമാക്കി. അതായത് നിലവിലുള്ള സ്റ്റോക്ക് തീരുന്നതോടെ ഉപഭോക്താക്കൾക്ക് ഇവ വാങ്ങാൻ കഴിയില്ല. പുതിയ തീരുമാനപ്രകാരം BDZ-ZW1900- 2024, BDZ-FBT4200/FBT2200/FBW2200 ( 2023) മോഡലുകൾ നിർത്തലാക്കി.

എന്നാൽ, ബ്ലൂ-റേ പ്ലെയർ ബിൽറ്റ്-ഇൻ ആയിട്ടുള്ള ബ്ലൂ-റേ റെക്കോർഡറുകളെ മാത്രമാണ് ഈ തീരുമാനം ബാധിക്കുക. ഡിസ്കുകൾ പ്ലേ ചെയ്യുന്നതിനുള്ള ബ്ലൂ-റേ ഡിസ്ക് പ്ലെയറുകൾ താത്കാലികമായി തുടരുമെന്ന് സോണി വ്യക്തമാക്കിയിട്ടുണ്ട്.

യുഗാന്ത്യത്തിലേക്കുള്ള യാത്ര

2023 ൽ ലോകത്തിലെ ആദ്യത്തെ ബ്ലൂ-റേ ഡിസ്ക് റെക്കോർഡർ അവതരിപ്പിച്ചുകൊണ്ട് തുടക്കമിട്ട ഒരു കാലഘട്ടത്തിനാണ് സോണിയുടെ ഈ പുതിയ പ്രഖ്യാപനത്തോടെ അന്ത്യമാകുന്നത്. ഡിസ്കുകൾ പോലുള്ള ഫിസിക്കൽ സ്റ്റോറേജ് സംവിധാനങ്ങൾക്ക് പകരം ഓൺലൈൻ സ്ട്രീമിങ് സംവിധാനങ്ങൾ പ്രചാരം നേടിക്കഴിഞ്ഞു. എങ്കിലും സാധാരണ ബ്ലൂ-റേ ഡിസ്കുകളുടെയും യു.എച്ച്.ഡി. (UHD) ബ്ലൂ-റേ പ്ലെയറുകളുടെയും നിർമാണം നിർത്താൻ നിലവിൽ പദ്ധതിയില്ലെന്ന് കമ്പനി പറയുന്നു. എന്നാൽ, അടുത്ത വർഷം ടി.സി.എൽ. സോണിയുടെ ഹോം എന്റർടൈൻമെന്റ് ഡിവിഷന്റെ നിയന്ത്രണം ഏറ്റെടുക്കുന്നതോടെ കാര്യങ്ങൾ മാറിയേക്കാം.

കഴിഞ്ഞ ദശാബ്ദത്തിൽ നിരവധി കമ്പനികളാണ് ബ്ലൂ-റേ വിപണിയിൽ നിന്ന് ഘട്ടം ഘട്ടമായി പിൻമാറുകയോ ഉത്പാദനം കുറയ്ക്കുകയോ ചെയ്തത്. 2018 ൽ ഓപ്പോ തങ്ങളുടെ ബിസിനസ് അവസാനിപ്പിച്ചു. പിന്നാലെ ബ്ലൂ-റേ, യു.എച്ച്.ഡി. ബ്ലൂ-റേ പ്ലെയറുകളുടെ നിർമ്മാണം നിർത്തുമെന്ന് സാംസങും പ്രഖ്യാപിച്ചു. 2024-ൽ എൽ.ജി.യും ബ്ലൂ-റേ പ്ലെയർ നിർമ്മാണം അവസാനിപ്പിച്ചു.

അതേസമയം, ബ്ലൂ-റേ സിനിമകൾക്കും ടെലിവിഷൻ പരിപാടികൾക്കും മറ്റ് മീഡിയകൾക്കും ഇന്നും സ്ഥിരമായ ആവശ്യക്കാരുണ്ട്. സോണി വിപണി വിട്ടെങ്കിലും അസൂസ്, എൽ.ജി., പയനിയർ തുടങ്ങിയ കമ്പനികൾ ഇപ്പോഴും ഡ്രൈവുകൾ നിർമിക്കുന്നുണ്ട്. പാനസോണിക് , വെർബറ്റിം തുടങ്ങിയ വൻകിട ബ്രാൻഡുകളും ബ്ലൂ-റേ നിർമാണം തുടരുന്നുണ്ട്.

Content Highlights: The End of an Era: Why Sony is Killing Its Iconic Blu-ray Disc Recorders