14.6 ഇഞ്ച് വലിപ്പവും 1TB സ്റ്റോറേജും! സാംസങിന്റെ ആഡംബര ടാബ്‌‌ലെറ്റ് വിപണിയിലേക്ക്! വില 1.35 ലക്ഷം രൂപ വരെ

സാംസങ്ങിന്റെ പുതിയ ടാബ്‌ലെറ്റുകൾ വിപണിയിൽ. 14.6 ഇഞ്ച് വലുപ്പമുള്ള ഗാലക്സി ടാബ് എസ്12 അൾട്ര, 12.6 ഇഞ്ച് ഡിസ്‌പ്ലേയുള്ള ഗാലക്സി ടാബ് എസ്12+ എന്നിവയാണ് സാംസങ് അവതരിപ്പിച്ചത്. ആൻഡ്രോയിഡ് 17, മീഡിയടെക് ഡൈമെൻസിറ്റി 9500 ചിപ്പ്സെറ്റ്, അമോലെഡ് ഡിസ്‌പ്ലേ, എസ് പെൻ പിന്തുണ തുടങ്ങിയവയാണ് ഇവയുടെ പ്രധാന സവിശേഷതകൾ.

ഗാലക്സി ടാബ് എസ്12 അൾട്രയാണ് കൂട്ടത്തിലെ വലുപ്പമേറിയതും പ്രീമിയം മോഡലും. 14.6 ഇഞ്ച് അമോലെഡ് ഡിസ്‌പ്ലേയാണ് ടാബിലുള്ളത്. 2,960 x 1,848 പിക്സൽ റെസല്യൂഷനും 120Hz റിഫ്രഷ് റേറ്റും ലഭിക്കും. 11,600mAh ബാറ്ററിയാണ് നൽകിയിരിക്കുന്നത്. 45W വയർഡ് ചാർജിങ് പിന്തുണയുമുണ്ട്.

ടാബ് എസ്12+ൽ 12.6 ഇഞ്ച് ഡിസ്‌പ്ലേയാണ്. 2,800 x 1,752 പിക്സൽ റെസല്യൂഷനുള്ള ഈ സ്‌ക്രീനിലും 120Hz റിഫ്രഷ് റേറ്റ് ലഭിക്കും. 10,600mAh ബാറ്ററിയാണ് മോഡലിലുള്ളത്. 45W ചാർജിങ് പിന്തുണയും ലഭിക്കും.

രണ്ട് ടാബ്‌ലെറ്റുകളിലും മീഡിയടെക്കിന്റെ ഡൈമെൻസിറ്റി 9500 ചിപ്പ്സെറ്റാണ് ഉപയോഗിച്ചിരിക്കുന്നത്. ആൻഡ്രോയിഡ് 17 അടിസ്ഥാനമാക്കിയുള്ള വൺ യുഐ 9 ആണ് ഓപ്പറേറ്റിങ് സിസ്റ്റം. സ്‌ക്രീൻ മൂന്ന് ഭാഗങ്ങളായി വിഭജിച്ച് ഒരേസമയം വിവിധ ആപ്പുകൾ ഉപയോഗിക്കാൻ അനുവദിക്കുന്ന മൾട്ടി-വിൻഡോ സംവിധാനവും സാംസങ്ങിന്റെ പുതിയ ഗാലക്സി നിർമിത ബുദ്ധി (AI) ഫീച്ചറുകളും ഇതിലുണ്ട്.

പുതിയ ടാബ്‌ലെറ്റുകൾക്ക് ഏഴ് വർഷത്തെ ഓപ്പറേറ്റിങ് സിസ്റ്റം, സുരക്ഷാ അപ്‌ഡേറ്റുകൾ നൽകുമെന്നും സാംസങ് വ്യക്തമാക്കിയിട്ടുണ്ട്.

ക്യാമറയിലും രണ്ട് മോഡലുകൾ തമ്മിൽ വ്യത്യാസമുണ്ട്. ടാബ് എസ്12 അൾട്രയിൽ 13 മെഗാപിക്സൽ പ്രധാന ക്യാമറയ്ക്കൊപ്പം 8 മെഗാപിക്സൽ അൾട്രാവൈഡ് ക്യാമറയുമുണ്ട്. എസ്12+ൽ 13 മെഗാപിക്സൽ പിൻ ക്യാമറയാണ് നൽകിയിരിക്കുന്നത്. രണ്ട് മോഡലുകളിലും സെൽഫിക്കും വീഡിയോ കോളുകൾക്കുമായി 12 മെഗാപിക്സൽ അൾട്രാവൈഡ് ഫ്രണ്ട് ക്യാമറയുണ്ട്.

കണക്റ്റിവിറ്റിയുടെ കാര്യത്തിലും അൾട്ര മോഡൽ മുന്നിലാണ്. ടാബ് എസ്12 അൾട്രയിൽ വൈ-ഫൈ 7 പിന്തുണയുള്ളപ്പോൾ എസ്12+ൽ വൈ-ഫൈ 6E ആണ്. രണ്ട് മോഡലിലും ബ്ലൂടൂത്ത് 6.0, എസ് പെൻ പിന്തുണ എന്നിവയുണ്ട്. 2TBവരെ അധിക സ്റ്റോറേജ് ഉപയോഗിക്കാവുന്ന മൈക്രോ എസ്ഡി കാർഡ് സ്ലോട്ടും ലഭിക്കും.

1.35 ലക്ഷം രൂപവരെ വില

ഗാലക്സി ടാബ് എസ്12 അൾട്രയുടെ 12GB റാം, 256GB സ്റ്റോറേജ് മോഡലിന് 1,399 ഡോളറാണ് വില. ഏകദേശം 1.34 ലക്ഷം രൂപ വരുമിത്. 12GB റാം, 512GB സ്റ്റോറേജ്, 16GB റാം, 1TB സ്റ്റോറേജ് എന്നീ വേരിയന്റുകളും ലഭ്യമാകും.

ഗാലക്സി ടാബ് എസ്12+ന്റെ 12GB റാം, 256GB സ്റ്റോറേജ് മോഡലിന് 1,199 ഡോളറാണ് വില. ഏകദേശം 1.15 ലക്ഷം രൂപ വരുമിത്. 12GB റാം, 512GB സ്റ്റോറേജ് മോഡലും ലഭിക്കും.

പുതിയ ടാബ്‌ലെറ്റുകളുടെ വിൽപ്പന തിരഞ്ഞെടുത്ത വിപണികളിൽ ഒക്ടോബർ ഏഴിന് ആരംഭിക്കും. ഇന്ത്യയിലെ വില സാംസങ് ഇതുവരെ പ്രഖ്യാപിച്ചിട്ടില്ല. നിലവിലെ ഗാലക്സി ടാബ് 11 സീരീസിന് ഇന്ത്യയിൽ 1,27,999 രൂപ മുതലാണ് വില.

ടാബ് എസ്12 അൾട്രയ്ക്ക് 692 ഗ്രാം ഭാരവും വെറും 5.1 മില്ലിമീറ്റർ കനവുമാണുള്ളത്. ഗ്രേ, സിൽവർ നിറങ്ങളിൽ ടാബ്‌ലെറ്റ് ലഭ്യമാകും. എസ് പെൻ ബോക്സിനൊപ്പം ലഭിക്കും.

പുതിയ ഡൈമെൻസിറ്റി 9500 ചിപ്പ്സെറ്റാണ് മുൻഗാമിയുമായി താരതമ്യം ചെയ്യുമ്പോഴുള്ള പ്രധാന ഹാർഡ്‌വെയർ മാറ്റം. ഡൈമെൻസിറ്റി 9400+ ചിപ്പ്സെറ്റുമായി താരതമ്യം ചെയ്യുമ്പോൾ എൻപിയു പ്രോസസിങ്ങിൽ 61 ശതമാനവും സിപിയു പ്രകടനത്തിൽ 19 ശതമാനവും ജിപിയു പ്രകടനത്തിൽ 17 ശതമാനവും മെച്ചമുണ്ടെന്നാണ് സാംസങ്ങിന്റെ അവകാശവാദം.

Content Highlights: Samsung has launched the Galaxy Tab S12 Ultra and Galaxy Tab S12+, featuring AMOLED displays, MediaTek Dimensity 9500 processors, Android 17, S Pen support and up to seven years of software and security updates.