ചെലവ് കുറവ്, ശക്തി കൂടുതൽ; ജിപിടി 5.4 മിനി, നാനോ മോഡലുകൾ പുറത്തിറക്കി ഓപ്പൺ എഐ

ഓപ്പൺ എഐ പുതിയ ജിപിടി-5.4 മിനി, നാനോ എഐ മോഡലുകൾ  പുറത്തിറക്കി. ഭാരമേറിയ ജോലികൾ ചെയ്യുന്നതിനായി നിർമിച്ച വേഗമേറിയതും ചെലവു കുറഞ്ഞതുമായ മോഡലുകളാണിവ. ഫ്ലാഗ്ഷിപ്പ് മോഡലായ ജിപിടി-5.4-ന്റെ സവിശേഷതകളും ഈ മോഡലുകളിൽ ലഭ്യമാവും.

കോഡിങ്, റീസണിങ്, മൾട്ടിമോഡൽ അണ്ടർസ്റ്റാൻഡിങ്, ടൂൾ ഉപയോഗം എന്നിവയിൽ ജിപിടി-5. മിനിയേക്കാൾ മികവുള്ളതായിരിക്കും ജിപിടി-5.4 മിനി; ഒപ്പം രണ്ടിരട്ടിയിലധികം വേഗതയുമുണ്ട്. ബെഞ്ച്മാർക്കുകളിൽ, ജിപിടി-5.4-ന് തുല്യമായ പ്രകടനം ഇത് കാഴ്ചവെക്കുന്നുണ്ട്. കോഡിങ് ജോലികൾക്ക് ഏറ്റവും മികച്ച ഓപ്ഷനുകളിലൊന്നായി ഇതിനെ ആശ്രയിക്കാനാവും. ഈ മാസം ആദ്യമാണ് സങ്കീർണമായ റീസണിങ് കഴിവുകളുള്ള ജിപിടി-5.4 പുറത്തിറക്കിയത്.

എഐ അധിഷ്ഠിത ജോലികളിൽ വേഗത ആവശ്യപ്പെടുന്ന മേഖലകൾക്ക് വേണ്ടിയാണ് പുതിയ മോഡലുകൾ നിർമിച്ചിരിക്കുന്നത്. പെട്ടെന്ന് പ്രതികരിക്കേണ്ട കോഡിങ് അസിസ്റ്റന്റുകൾ, സമാന്തരമായി ജോലികൾ പൂർത്തിയാക്കുന്ന സബ് ഏജന്റുകൾ, സ്ക്രീൻഷോട്ടുകൾ വിശകലനം ചെയ്യുന്ന കമ്പ്യൂട്ടർ-യൂസ് സിസ്റ്റങ്ങൾ, തത്സമയം ചിത്രങ്ങളെ വിശകലനം ചെയ്യുന്ന മൾട്ടിമോഡൽ ആപ്ലിക്കേഷനുകൾ എന്നിവ ഇതിൽ ഉൾപ്പെടുന്നു.

എപിഐ (API), കോഡക്സ്, ചാറ്റ് ജിപിടി എന്നിവയിൽ ജിപിടി-5.4 മിനി ലഭ്യമാണ്. ചാറ്റ് ജിപിടിയിൽ, '+' മെനുവിലെ 'തിങ്കിങ്' ഓപ്ഷൻ വഴി സൗജന്യ ഉപഭോക്താക്കൾക്കും 'ഗോ' ഉപഭോക്താക്കൾക്കും ഇത് ലഭ്യമാണ്. മറ്റ് ഉപഭോക്താക്കൾക്ക് പരിധി കഴിഞ്ഞാലുള്ള ബാക്കപ്പായി ഇത് ഉപയോഗിക്കാം. ജിപിടി-5.4 നാനോ എപിഐ വഴി മാത്രമേ ലഭ്യമാകൂ.

Content Highlights: OpenAI, GPT-5.4 Mini, GPT-5.4 Nano, Artificial Intelligence, AI Models, Coding AI, GPT-5.4 features, ChatGPT Updates, Tech News Malayalam, API, Multimodal Understanding.