പുതിയ എഐ മോഡലുമായി മെറ്റ; ലക്ഷ്യം ഓപ്പൺ എഐയോടും ഗൂഗിളിനോടുമുള്ള മത്സരം

നിർമിത ബുദ്ധി (AI) രംഗത്ത് ഗൂഗിളിനെയും ഓപ്പൺഎ.ഐയെയും നേരിടാനായി മെറ്റ ഏറ്റവും പുതിയ എ.ഐ. മോഡൽ പുറത്തിറക്കി. 'മ്യൂസ് സ്പാർക്ക്' (Muse Spark) എന്ന് പേരിട്ടിരിക്കുന്ന ഈ പുതിയ എ.ഐ. മോഡൽ, എ.ഐ. വിപണിയിലെ ശക്തമായ മത്സരത്തിൽ മെറ്റയ്ക്ക് പുതിയ ഊർജം നൽകുമെന്നാണ് ടെക് ലോകം പ്രതീക്ഷിക്കുന്നത്.

കഴിഞ്ഞ വർഷം ശതകോടികൾ മുടക്കി മാർക്ക് സക്കർബർഗ് രൂപീകരിച്ച പുതിയ എ.ഐ. ഡിവിഷനായ 'സൂപ്പർഇന്റലിജൻസ് ലാബ്സ്' (Superintelligence Labs) ആണ് ഇത് വികസിപ്പിച്ചത്. സ്കെയിൽ എ.ഐ.യിൽ നിന്നെത്തിയ 29-കാരനായ അലക്സാണ്ടർ വാങ് ആണ് ഈ ഡിവിഷന് നേതൃത്വം നൽകുന്നത്. മെറ്റയുടെ പതിവിന് വിപരീതമായി വെറും ഒമ്പത് മാസങ്ങൾ കൊണ്ടാണ് മെറ്റ ഈ പുതിയ എ.ഐ. സ്റ്റാക്ക് നിർമിച്ചെടുത്തിരിക്കുന്നത്.

'അവക്കാഡോ' (Avocado) എന്ന കോഡ് നാമത്തിൽ അറിയപ്പെട്ടിരുന്ന മ്യൂസ് സ്പാർക്ക്, വലിപ്പത്തിൽ ചെറുതും എന്നാൽ വളരെ വേഗതയേറിയതുമായ ഒരു മോഡലാണ്. സയൻസ്, ഗണിതം, ആരോഗ്യം തുടങ്ങിയ വിഷയങ്ങളിലെ സങ്കീർണ്ണമായ ചോദ്യങ്ങൾക്ക് കൃത്യമായി ഉത്തരം കണ്ടെത്താൻ ഇതിന് കഴിയും. മെറ്റയുടെ മുൻ മോഡലുകളെക്കാൾ മികച്ച രീതിയിൽ എഴുതാനും യുക്തിസഹമായി ചിന്തിക്കാനും ഇതിന് സാധിക്കുമെങ്കിലും, കോഡിംഗ് രംഗത്ത് ഇത് അല്പം പിന്നിലാണ്. എങ്കിലും, നിലവിൽ വിപണിയിലുള്ള ഗൂഗിളിന്റെ ജെമിനി (Gemini), ഓപ്പൺഎ.ഐയുടെ ജിപിടി (GPT), ആന്ത്രോപിക്കിന്റെ ക്ലോഡ് (Claude) എന്നീ പ്രമുഖ മോഡലുകളോട് കിടപിടിക്കുന്ന പ്രകടനമാണ് മ്യൂസ് സ്പാർക്ക് കാഴ്ചവെക്കുന്നതെന്നാണ് റിപ്പോർട്ടുകൾ.

എ.ഐ. രംഗത്ത് ഓപ്പൺഎ.ഐ, ആന്ത്രോപിക് എന്നീ കമ്പനികളുടെ സംയുക്ത മൂല്യം നിലവിൽ ഒരു ട്രില്യൺ ഡോളറിലധികം വരും. കൂടാതെ ഗൂഗിളിന്റെ എ.ഐ. സേവനങ്ങളും ഉപഭോക്താക്കൾക്കിടയിൽ വൻ മുന്നേറ്റമാണ് നടത്തുന്നത്. എന്നാൽ മെറ്റ ഈ രംഗത്ത് അത്ര ശക്തമല്ല. ഈയൊരു സാഹചര്യത്തിൽ മത്സരത്തിൽ സജീവമാകാൻ എ.ഐ. രംഗത്ത് 600 ബില്യൺ ഡോളറിന്റെ നിക്ഷേപമാണ് മെറ്റ നടത്തുന്നത്. മുൻപ് പുറത്തിറക്കിയ ഓപ്പൺ സോഴ്‌സ് മോഡലായ ലാമയിൽ (Llama) നിന്ന് വ്യത്യസ്തമായി മ്യൂസ് സ്പാർക്ക് ഒരു പ്രൊപ്രൈറ്ററി (proprietary) മോഡലാണ്. ഭാവിയിൽ ഇതിന്റെ പുതിയ പതിപ്പുകൾ ഓപ്പൺ സോഴ്സ് ആക്കാൻ സാധ്യതയുണ്ടെന്ന് കമ്പനി വ്യക്തമാക്കുന്നു.

വരും ആഴ്ചകളിൽ തന്നെ വാട്സാപ്പ്, ഇൻസ്റ്റാഗ്രാം, മെറ്റയുടെ എ.ഐ. സ്മാർട്ട് ഗ്ലാസുകൾ എന്നിവയിലും മെറ്റയുടെ പ്രത്യേക എ.ഐ. ആപ്പിലും മ്യൂസ് സ്പാർക്ക് ലഭ്യമാകും. കൂടാതെ, ഡെവലപ്പർമാർക്ക് എ.പി.ഐ. (API) വഴി ഈ സാങ്കേതികവിദ്യ ഉപയോഗിക്കാൻ അവസരം നൽകി പുതിയൊരു വരുമാന മാർഗ്ഗം കണ്ടെത്താമെന്ന പ്രതീക്ഷയും മെറ്റയ്ക്കുണ്ട്.

Content Highlights: Meta has launched 'Muse Spark,' a fast and efficient proprietary AI model developed by its Superintelligence Labs to compete directly with tech giants like Google and OpenAI.