ട്രായ് നിര്ദേശം: വോയിസ് കോളിനും SMS-നും മാത്രമായി ജിയോയുടെ പുതിയ റീച്ചാര്ജ് പ്ലാനുകള്
ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) പുറപ്പെടുവിച്ച നിര്ദേശത്തിന് പിന്നാലെ വോയിസ് കോളിനും എസ്.എം.എസിനും മാത്രം റീച്ചാര്ജ് പ്ലാനുകള് അവതരിപ്പിച്ച് ടെലികോം കമ്പനികള്. പ്രമുഖ ടെലികോം കമ്പനിയായ ജിയോയും ട്രായ് നിര്ദേശപ്രകാരം പ്രീപെയ്ഡ് ഉപഭോക്താക്കള്ക്കായി പുതിയ റീച്ചാര്ജ് പ്ലാനുകള് അവതരിപ്പിച്ചു.
ജിയോ വോയിസ് കോള്, എസ്.എം.എസ്. പ്ലാനുകള്
പ്രീപെയ്ഡ് ഉപഭോക്താക്കള്ക്കായി വോയിസ് കോളിനും എസ്.എം.എസിനും മാത്രമായി രണ്ട് റീച്ചാര്ജ് പ്ലാനുകളാണ് ജിയോ അവതരിപ്പിച്ചിരിക്കുന്നത്. വാല്യൂപാക്ക് എന്ന പേരില് യഥാക്രമം 1958 രൂപയുടെയും 458 രൂപയുടെയും റീച്ചാര്ജ് പ്ലാനുകളാണ് ഇത്.
1958 രൂപയുടെ റീച്ചാര്ജ് പ്ലാനില് അണ്ലിമിറ്റഡ് വോയിസ് കോളുകളും 3600 എസ്.എം.എസുകളും ലഭിക്കും. ഇതിനൊപ്പം ജിയോടിവി, ജിയോസിനിമ, ജിയോക്ലൗഡ് സബ്സ്ക്രിപ്ഷനുകളും നല്കുന്നു. 365 ദിവസമാണ് ഈ പ്ലാനിന്റെ കാലാവധി.
458 രൂപയുടെ റീച്ചാര്ജ് പ്ലാനില് അണ്ലിമിറ്റഡ് വോയിസ് കോളുകളും 1000 എസ്.എം.എസും ലഭിക്കും. ഇതിനൊപ്പം ജിയോടിവി, ജിയോസിനിമ, ജിയോക്ലൗഡ് സബ്സ്ക്രിപ്ഷനുമുണ്ട്. 84 ദിവസമാണ് പ്ലാനിന്റെ കാലാവധി.
ട്രായ് നിര്ദേശം...
അടുത്തിടെയാണ് വോയിസ് കോളുകള്ക്കും എസ്.എം.എസിനും മാത്രമായി റീച്ചാര്ജ് ചെയ്യാവുന്ന പ്ലാനുകള് നല്കണമെന്ന് ടെലികോം കമ്പനികളോട് ട്രായ് നിര്ദേശിച്ചത്. ഫീച്ചര് ഫോണുകള് ഉപയോഗിക്കുന്നവര്ക്കും 2ജി സേവനം ഉപയോഗിക്കുന്നവര്ക്കും ഉപകാരപ്രദമാകുന്ന തീരുമാനമായിരുന്നു ഇത്. ഇന്റര്നെറ്റ് സേവനം ആവശ്യമില്ലാത്തവര് റീച്ചാര്ജ് പ്ലാനുകളിലെ ഇന്റര്നെറ്റ് സേവനത്തിന് കൂടി പണം നല്കേണ്ടിവരുന്നതായും ട്രായ് വിലയിരുത്തിയിരുന്നു. ഇതിനാലാണ് പുതിയ നിര്ദേശം പുറപ്പെടുവിച്ചത്. ഒരു സ്പെഷ്യല് താരിഫ് വൗച്ചറെങ്കിലും വോയിസ്, എസ്.എം.എസ്. സേവനത്തിന് മാത്രമായി പുറത്തിറക്കണമെന്ന നിര്ദേശവുമായി 2012-ലെ ടെലികോം ഉപഭോക്തൃ സംരക്ഷണ നിയന്ത്രണ ചട്ടങ്ങള് ഭേദഗതി ചെയ്ത് ട്രായ് ഉത്തരവിറക്കുകയുംചെയ്തിരുന്നു.
Also Read: വോയിസ് കോളിനും SMS-നും മാത്രം റീച്ചാര്ജ്: മാറ്റംവരുത്തി എയര്ടെല്; പുതിയ പ്ലാൻ ഇങ്ങനെ
അതേസമയം, ട്രായ് നിര്ദേശം നടപ്പിലാക്കാനായി ടെലികോം കമ്പനികള് പുതുതായി അവതരിപ്പിച്ച വോയിസ് കോള്, എസ്.എം.എസ്. റീച്ചാര്ജ് വൗച്ചറുകള് ഉദ്ദേശിച്ച ഫലം ലഭിക്കാത്തതെന്നാണ് സാമൂഹികമാധ്യമങ്ങളിലടക്കം ഉയരുന്ന വിമര്ശനം. ചെറിയ തുകയ്ക്കുള്ള വോയിസ് കോള്, എസ്.എം.എസ് റീച്ചാര്ജ് പ്ലാനുകള് അവതരിപ്പിക്കേണ്ടതിന് പകരം വലിയതുകയുടെ പ്ലാനുകള് കമ്പനികള് നല്കുന്നതിലൂടെ ഉപഭോക്താക്കള്ക്ക് പ്രയോജനമില്ലെന്നും അഭിപ്രായമുയരുന്നുണ്ട്. കഴിഞ്ഞദിവസം എയര്ടെല് 509, 1999 പ്ലാനുകള് പുനഃക്രമീകരിച്ച് വോയിസ്, എസ്.എം.എസ്. റീച്ചാര്ജ് പ്ലാനാക്കി അവതരിപ്പിച്ചപ്പോഴും കടുത്ത വിമര്ശനമുയര്ന്നിരുന്നു. നേരത്തെയുണ്ടായിരുന്ന ഇന്റര്നെറ്റ് ഡേറ്റ ഒഴിവാക്കിയിട്ടും അതേതുക തന്നെ ഈടാക്കുന്നതാണ് സാമൂഹികമാധ്യമങ്ങളിലടക്കം ചര്ച്ചയായത്.