ഫൈബർ ഒപ്ടിക് കേബിളുകൾക്ക് 'രഹസ്യം ചോർത്താൻ' കഴിയുമെന്ന് പഠനം, ജാഗ്രത വേണമെന്ന് വിദഗ്ധർ

സൈബർ സുരക്ഷയും സ്വകാര്യതയും സംബന്ധിച്ച ആശങ്കകൾ വർധിപ്പിക്കുന്ന പുതിയ പഠനം പുറത്ത്. ആധുനിക ഇന്റർനെറ്റിന്റെ നട്ടെല്ലായ ഫൈബർ ഒപ്റ്റിക് ഇന്റർനെറ്റ് കേബിളുകൾ രഹസ്യ നിരീക്ഷണ ഉപകരണങ്ങളാക്കി മാറ്റാൻ കഴിയുമെന്നാണ് Science Adviser പ്രസിദ്ധീകരിച്ച പഠനം വ്യക്തമാക്കുന്നത്.

സാധാരണ ഫൈബർ ഒപ്റ്റിക് കേബിളുകൾക്ക് സമീപത്തുള്ള മനുഷ്യരുടെ സംസാരം ഉൾപ്പെടെയുള്ള ശബ്ദങ്ങൾ സൃഷ്ടിക്കുന്ന ചെറിയ വൈബ്രേഷനുകൾ തിരിച്ചറിയാൻ കഴിയുമെന്നാണ് പഠനം നടത്തിയ ഗവേഷകർ പറയുന്നത്. ഈ വിറയലുകൾ കേബിളുകളിലൂടെ സഞ്ചരിക്കുന്ന സിഗ്‌നലുകളിൽ നേരിയ മാറ്റങ്ങൾ വരുത്തുന്നു. പ്രത്യേക ഉപകരണങ്ങൾ ഉപയോഗിച്ച് വിദഗ്ധർക്ക് ഈ മാറ്റങ്ങൾ വിശകലനം ചെയ്യാനും സംഭാഷണങ്ങൾ വീണ്ടെടുക്കാനും കഴിയും.

അതിവേഗ ഇന്റർനെറ്റ്, ആശയവിനിമയ സേവനങ്ങൾ എന്നിവയ്ക്കായി രൂപകൽപ്പന ചെയ്ത ഫൈബർ നെറ്റ്വർക്കുകൾ സെൻസിറ്റീവ് അക്കോസ്റ്റിക് സെൻസറുകളായി പ്രവർത്തിക്കാൻ സാധ്യതയുണ്ടെന്ന് കാസ്‌പെർസ്‌കി റിസർച്ചിന്റെ പഠനം എടുത്തു കാണിക്കുന്നു. ഡിസ്ട്രിബ്യൂട്ടഡ് അക്കോസ്റ്റിക് സെൻസിങ്ങിലൂടെയാണ് (DAS) ഈ സാങ്കേതികവിദ്യ പ്രവർത്തിക്കുന്നത്. ഈ സംവിധാനം ഫൈബർ ഒപ്റ്റിക് കേബിളുകളിലൂടെ ലേസർ പൾസുകൾ അയയ്ക്കുകയും കേബിളിന് ചുറ്റുമുള്ള ശബ്ദം അല്ലെങ്കിൽ ചലനം കാരണം പ്രകാശത്തിൽ സംഭവിക്കുന്ന മാറ്റങ്ങൾ അളക്കുകയും ചെയ്യുന്നു.

ഭൂകമ്പങ്ങൾ പ്രവചിക്കാനും ട്രാഫിക് നിരീക്ഷിക്കാനും കടലിനടിയിലെ പ്രവർത്തനങ്ങൾ പഠിക്കാനും ഈ സാങ്കേതികവിദ്യ ഇതിനകം ഉപയോഗിക്കുന്നുണ്ട്. എന്നിരുന്നാലും, ദുരുപയോഗം ചെയ്താൽ ഈ സാങ്കേതികവിദ്യ സ്വകാര്യതയുമായി ബന്ധപ്പെട്ട പുതിയ ആശങ്കകൾ ഉയർത്തുമെന്ന് പുതിയ കണ്ടെത്തലുകൾ സൂചിപ്പിക്കുന്നു. എന്നാൽ വ്യക്തമായ സംഭാഷണങ്ങൾ വീണ്ടെടുക്കുന്നത് അത്ര എളുപ്പമാകില്ല. അതിന് വിലകൂടിയ ഉപകരണങ്ങൾ, സാങ്കേതിക വൈദഗധ്യം, അനുയോജ്യമായ സാഹചര്യങ്ങൾ എന്നിവ ആവശ്യമാണെന്ന് ശാസ്ത്രജ്ഞർ നിരീക്ഷിച്ചു. നിലവിൽ സാധാരണ ഇന്റർനെറ്റ് ഉപയോക്താക്കൾക്ക് ഭീഷണി പരിമിതമാണെന്നും അവർ പറയുന്നു.

എന്നിരുന്നാലും ഫൈബർ ഒപ്റ്റിക് ഇൻഫ്രാസ്ട്രക്ചറിനെ ദുരുപയോഗത്തിൽ നിന്ന് സംരക്ഷിക്കാൻ ശക്തമായ നടപടികൾ ആവശ്യമാണെന്ന് സൈബർ സുരക്ഷാ വിദഗ്ധർ പറയുന്നു. മെച്ചപ്പെട്ട ഷീൽഡിംഗ്, മികച്ച കേബിൾ ഇൻസുലേഷൻ, നെറ്റ്‌വർക്ക് ആക്സസിലെ കർശന നിരീക്ഷണം എന്നിവ അവർ നിർദ്ദേശിക്കുന്ന നടപടികളിൽ ഉൾപ്പെടുന്നു.

Content Highlights: Fibre optic cables can detect vibrations from human speech., Distributed Acoustic Sensing (DAS) uses laser pulses to measure light disturbance., Scientific applications include earthquake detection and traffic monitoring., Surveillance risk is currently limited due to high technical requirements., Experts recommend improved shielding and network monitoring as safeguards.