അമേരിക്കയെ മലർത്തിയടിച്ച് ചൈന: ലോകത്തെ ഏറ്റവും വേഗതയേറിയ സൂപ്പർ കമ്പ്യൂട്ടർ ഇനി 'ലൈൻഷൈൻ'!

ലോകത്തിലെ ഏറ്റവും വേഗതയേറിയ സൂപ്പർ കമ്പ്യൂട്ടറുകളുടെ പട്ടികയിൽ അമേരിക്കയെ പിന്തള്ളി ചൈന ഒന്നാം സ്ഥാനത്തെത്തി. ചൈനയിലെ ഷെൻസെനിലുള്ള നാഷണൽ സൂപ്പർ കമ്പ്യൂട്ടിങ് സെന്ററിലെ 'ലൈൻഷൈൻ' (LineShine) എന്ന സിസ്റ്റമാണ് ഈ നേട്ടം സ്വന്തമാക്കിയത്. എന്നാൽ, ആഗോള നിർമിത ബുദ്ധി (AI) മത്സരത്തിലെ മുന്നേറ്റത്തേക്കാളുപരി, സ്വന്തമായി കമ്പ്യൂട്ടിങ് സംവിധാനങ്ങൾ വികസിപ്പിക്കാനുള്ള കഴിവ് ലോകത്തെ കാണിക്കാനാണ് ചൈന ഇതുവഴി ശ്രമിക്കുന്നതെന്ന് വിദഗ്ധർ അഭിപ്രായപ്പെടുന്നു.

2026 ജൂണിൽ പ്രസിദ്ധീകരിച്ച സൂപ്പർ കമ്പ്യൂട്ടറുകളുടെ ആഗോള റാങ്കിങ് പട്ടികയായ 'ടോപ്പ് 500' (TOP500)-ലാണ് ലൈൻഷൈൻ ഒന്നാമതെത്തിയത്. അമേരിക്കൻ ഭരണകൂടം ആണവായുധ ശേഖരത്തിന്റെ വികസനത്തിനും പരിപാലനത്തിനുമായി ഉപയോഗിച്ചിരുന്ന 'എൽ ക്യാപ്പിറ്റൻ' (El Capitan) എന്ന സൂപ്പർ കമ്പ്യൂട്ടറിനെയാണ് ലൈൻഷൈൻ പിന്നിലാക്കിയത്. കഴിഞ്ഞ മൂന്ന് വർഷത്തിനിടെ ആദ്യമായാണ് ഒരു ചൈനീസ് സിസ്റ്റം ഈ പട്ടികയിൽ ഇടംനേടുന്നത്. തദ്ദേശീയമായി രൂപകല്പന ചെയ്ത ചിപ്പുകളാണ് ഇതിൽ ഉപയോഗിച്ചിരിക്കുന്നത്.

ഒന്നാം സ്ഥാനത്തെത്തിയെങ്കിലും, നിർമിത ബുദ്ധി (AI) സംബന്ധിച്ച പ്രവർത്തനങ്ങൾക്ക് ലോകത്തിലെ ഏറ്റവും വേഗതയേറിയ കമ്പ്യൂട്ടർ ചൈനയുടേതാണെന്ന് പറയാനാവില്ല. നിർമിത ബുദ്ധി കമ്പ്യൂട്ടിങ്ങുമായി ബന്ധപ്പെട്ട മറ്റൊരു ബെഞ്ച്മാർക്ക് ടെസ്റ്റിൽ ലൈൻഷൈൻ നാലാം സ്ഥാനത്താണ് എത്തിയത്.

മൈക്രോസോഫ്റ്റ്, ആമസോൺ, ഗൂഗിൾ തുടങ്ങിയ വൻകിട ക്ലൗഡ് കമ്പ്യൂട്ടിങ് കമ്പനികൾക്ക് നിർമിത ബുദ്ധി പ്രവർത്തനങ്ങൾക്കായി സ്വന്തം കൂറ്റൻ സൂപ്പർ കമ്പ്യൂട്ടറുകൾ ഉണ്ടെങ്കിലും അവരൊന്നും ഈ ടോപ്പ് 500 റാങ്കിങ്ങിൽ മത്സരിക്കാറില്ല. സ്‌പേസ് എക്‌സിന്റെ ഉടമസ്ഥതയിലുള്ള എക്സ്എഐയുടെ (xAI) 'കൊളോസസ്' (Colossus) സിസ്റ്റം അമേരിക്കയുടെ എൽ ക്യാപ്പിറ്റനേക്കാൾ ശക്തമാണെന്ന് കഴിഞ്ഞ വർഷം പഠനങ്ങൾ കണ്ടെത്തിയിരുന്നു. ഇത്തരം വൻകിട കമ്പനികൾ അവരുടെ സിസ്റ്റങ്ങൾ കൂടി പട്ടികയിൽ ഉൾപ്പെടുത്തിയാൽ, നിലവിലെ ഈ ഒന്നാം സ്ഥാനക്കാർ ആദ്യ അഞ്ചിൽ പോലും എത്തില്ലെന്ന് യൂണിവേഴ്സിറ്റി ഓഫ് കാലിഫോർണിയയിലെ സീനിയർ ഫെലോ ആയ ജിമ്മി ഗുഡ്റിച്ച് അഭിപ്രായപ്പെട്ടു.

അമേരിക്കയും ചൈനയും തമ്മിൽ നൂതന കമ്പ്യൂട്ടിങ് മേഖലയിൽ കടുത്ത മത്സരം നടക്കുന്നതിനിടയിലാണ് ഈ വാർത്ത പുറത്തുവരുന്നത്. ക്വാണ്ടം കമ്പ്യൂട്ടിങ്ങിൽ ചൈനയെക്കാൾ മുന്നിലെത്തുക എന്ന ലക്ഷ്യത്തോടെ തിങ്കളാഴ്ച അമേരിക്കൻ പ്രസിഡന്റ് ഡൊണാൾഡ് ട്രംപ് ഒരു ഉത്തരവിൽ ഒപ്പുവെച്ചിരുന്നു. മുൻ അമേരിക്കൻ ഭരണകൂടങ്ങൾ ഏർപ്പെടുത്തിയ കർശനമായ കയറ്റുമതി നിയന്ത്രണങ്ങൾ കാരണം 2023 മുതൽ ചൈന അവരുടെ സിസ്റ്റങ്ങൾ ഇത്തരം റാങ്കിങ്ങുകൾക്കായി സമർപ്പിക്കുന്നത് നിർത്തിവെച്ചിരിക്കുകയായിരുന്നു.

നൂതനമായ നിർമിത ബുദ്ധി ചിപ്പുകളൊന്നും തന്നെ ലൈൻഷൈൻ സിസ്റ്റത്തിൽ ഉൾപ്പെടുത്തിയിട്ടില്ല. അമേരിക്കയുടെ നിയന്ത്രണങ്ങൾക്കിടയിലും സ്വന്തമായി കമ്പ്യൂട്ടിങ് ചിപ്പുകൾ രൂപകല്പന ചെയ്തുവെന്ന് ലോകത്തിന്റെ മുന്നിൽ അംഗീകാരം നേടിയെടുക്കാനും കൂടി ചൈന ലക്ഷ്യമിടുന്നുണ്ട്. അമേരിക്കയുടെ കയറ്റുമതി നിയന്ത്രണങ്ങൾ വിലപ്പോവില്ല എന്ന് ലോകത്തെ ബോധ്യപ്പെടുത്താനും ഈ നേട്ടത്തിലൂടെ ചൈനയ്ക്ക് സാധിക്കും.

Content Highlights: China's domestically built supercomputer, 'LineShine', has officially surpassed the US's 'El Capitan' to claim the number one spot on the June 2026 TOP500 list, showcasing Beijing's technological resilience and computing independence despite strict US export controls.