ai.com വൻ തുകയ്ക്ക് വിറ്റ് ലാഭമുണ്ടാക്കിയ കഥയിൽ ട്വിസ്റ്റ്- പുതിയ റിപ്പോർട്ടുകൾ പുറത്ത്

ഏറ്റവും ഉയർന്ന വിലയ്ക്ക് വിറ്റഴിക്കപ്പെടുന്ന ഡൊമൈൻ നാമമായി ai.com മാറിയെന്നും. ക്രിപ്റ്റോ.കോം സിഇഒ ക്രിസ് മാർഷലെക് ഏഴ് കോടി ഡോളറിന് ഈ ഡൊമൈൻ വാങ്ങിയെന്നുമുള്ള വാർത്ത ദിവസങ്ങൾക്ക് മുമ്പ് ഇന്റർനെറ്റിൽ നിറഞ്ഞിരുന്നു. മലേഷ്യൻ സംരംഭകനായ ആരിസാൻ ഇസ്മായിലിന്റെ പക്കൽ നിന്നാണ് മാർഷലെക് ഈ ഡൊമൈൻ വാങ്ങിയതെന്നാണ് റിപ്പോർട്ടുകൾ. സൂപ്പർ ബൗൾ എൽഎക്സ് ടൂർണമെന്റിനിടെ അവതരിപ്പിക്കപ്പെട്ടപ്പോഴാണ് ഈ ഡൊമെയ്ൻ വീണ്ടും ചർച്ചയായത്. ഏജന്റിക് എഐ"യിൽ (agentic AI) അധിഷ്ഠിതമായ പുതിയ പ്ലാറ്റ്‌ഫോമിനായാണ് ക്രിപ്റ്റോ.കോം ഇത് ഉപയോഗിക്കുന്നത്.

1993 ൽ തന്റെ പത്താംവയസിൽ അമ്മയുടെ ക്രെഡിറ്റ് കാർഡ് ഉപയോഗിച്ച് വെറും 300 രൂപയ്ക്കാണ് ഇസ്മായിൽ ഈ ഡൊമൈൻ വാങ്ങിയതെന്നായിരുന്നു കഥ. വേൾഡ് വൈഡ് വെബ് ഔദ്യോഗിക പബ്ലിക് ഡൊമെയ്നായി മാറി വെറും അഞ്ചു ദിവസത്തിനുശേഷം, 1993 മെയ് 4-നാണ് ഈ ഡൊമെയ്ൻ രജിസ്റ്റർ ചെയ്തതെന്നാണ് റിപ്പോർട്ടുകൾ. എന്നാൽ അക്കാലത്ത് മലേഷ്യയിൽ ഇന്റർനെറ്റ് സൗകര്യങ്ങൾ വളരെ പിന്നിലായിരുന്നു. ഈ സമയം ഇസ്മായിൽ ഡൊമൈൻ വാങ്ങിയെന്നത് സംശയാസ്പദമാണെന്ന് ഇപ്പോൾ ചില റിപ്പോർട്ടുകൾ പറയുന്നു. എൻഡിടിവി റിപ്പോർട്ട് അനുസരിച്ച് അദ്ദേഹത്തിന്റെ കരിയർ ആരംഭിക്കുന്നത് 2005 കാലഘട്ടത്തിലാണ്.

യഥാർത്ഥത്തിൽ 2021-ൽ SAW.com എന്ന ഡൊമെയ്ൻ ബ്രോക്കറേജ് സൈറ്റിൽ നിന്നാണ് ആർസ്യാൻ ഈ ഡൊമൈൻ വാങ്ങിയത്. ഈ തുക എത്രയാണെന്ന് വ്യക്തമല്ല. കുവൈത്തി സ്വദേശി തുനയൻ ഖാലിദ് അൽ-ഗാനിമിന്റെ ഉടമസ്ഥതയിലുള്ള ഡൊമെയ്ൻ നെയിം ഹോൾഡിങ് കമ്പനിയായ ഫ്യൂച്ചർ മീഡിയ ആർക്കിടെക്റ്റ്സ് ഐഎൻസി ആയിരുന്നു ഈ ഡൊമെയ്ന്റെ മുൻ ഉടമസ്ഥർ. 70 ദശലക്ഷം ഡോളറിന് ഈ ഡൊമെയ്ൻ മറിച്ച് വിറ്റത് ശ്രദ്ധേയമായ ഒരു ബിസിനസ് ഇടപാടാണെങ്കിലും, ഈ ഡൊമൈൻ ഭാവിയിൽ എഐ എത്രത്തോളം വളരുമെന്ന് മുൻകൂട്ടി കണ്ട് ഡൊമൈൻ വാങ്ങി സൂക്ഷിച്ച ഒരു അത്ഭുതബാലനായിരുന്നില്ല അർസ്യാൻ.

എന്നാൽ മാർഷലെക്ക് ഈ ഡൊമൈൻ ഏറ്റെടുത്തത് അതിന്‍റെ പ്രാധാന്യം മനസിലാക്കിക്കൊണ്ടുതന്നെയാണെന്ന് വ്യക്തം. തന്റെ കമ്പനിക്ക് ai.com പോലൊരു പ്രീമിയം ഡൊമൈൻ ലഭിക്കുകയെന്നത് വലിയ നേട്ടമാണെന്ന് മാർഷലെക്കിന് അറിയാമായിരുന്നു. ഒരു സാധാരണ കമ്പനിയായി തരംതാഴ്ത്തപ്പെടാതിരിക്കാനാണ് മാർഷലെക് വലിയ വിലകൊടുത്ത് ഡൊമൈൻ സ്വന്തമാക്കിയത്. 

Content Highlights: The $70 Million Domain Mystery: Did a 10-Year-Old Really Buy ai.com for ₹300?