ഓസ്‌ട്രേലിയന്‍ ഓപ്പണ്‍ യോഗ്യതാ മത്സരത്തില്‍ ഭാംബ്രിയ്ക്ക് ജയം, രാംകുമാറിനും റെയ്‌നയ്ക്കും തോല്‍വി

മെല്‍ബണ്‍: ഓസ്‌ട്രേലിയന്‍ ഓപ്പണ്‍ ടെന്നീസ് ടൂര്‍ണമെന്റിലേക്കുള്ള യോഗ്യതാ മത്സരത്തില്‍ ഇന്ത്യയുടെ യൂകി ഭാംബ്രിയ്ക്ക് വിജയം. 2009 ജൂനിയര്‍ ഓസ്‌ട്രേലിയന്‍ ഓപ്പണ്‍ ജേതാവായ ഭാംബ്രി ആദ്യറൗണ്ടില്‍ പോര്‍ച്ചുഗലിന്റെ ജാവോ ഡൊമിന്‍ഗസിനെ പരാജയപ്പെടുത്തി.

നേരിട്ടുള്ള സെറ്റുകള്‍ക്കാണ് ഭാംബ്രിയുടെ വിജയം. സ്‌കോര്‍: 6-4, 6-2. 29 കാരനായ ഭാംബ്രി അടുത്ത റൗണ്ടില്‍ ലോക 143-ാം റാങ്കുകാരനായ ചെക്ക് റിപ്പബ്ലിക്കിന്റെ തോമസ് മഷാസിനെ നേരിടും.  

എന്നാല്‍ മറ്റ് ഇന്ത്യന്‍ താരങ്ങളായ രാംകുമാര്‍ രാമനാഥനും അങ്കിത റെയ്‌നയും ആദ്യ റൗണ്ടില്‍ തന്നെ പരാജയപ്പെട്ട് പുറത്തായി. രാംകുമാര്‍ രാമനാഥന്‍ ഇറ്റലിയുടെ മാര്‍ക്കോ മോറോണിയോടാണ് പരാജയപ്പെട്ടത്. സ്‌കോര്‍ 3-6, 5-7. 

വനിതാ വിഭാഗത്തില്‍ അങ്കിത റെയ്‌നയെ യുക്രൈന്‍ താരം ലെസിയ സ്യൂറെന്‍കോ നാണംകെടുത്തി. 1-6, 0-6 എന്ന സ്‌കോറിനാണ് ഇന്ത്യന്‍ താരം പരാജയപ്പെട്ടത്. 

നേരത്തേ പുരുഷസിംഗിള്‍സില്‍ ഇന്ത്യയുടെ പ്രജ്‌നേഷ് ഗുണേശ്വരന്‍ മൂന്നാം സീഡായ കൊളംബിയയുടെ ഡാനിയേല്‍ എലാഹി ഗ്യാലനെ അട്ടിമറിച്ച് രണ്ടാം റൗണ്ടില്‍ പ്രവേശിച്ചിരുന്നു. 6-4, 6-4 എന്ന സ്‌കോറിനാണ് പ്രജ്‌നേിഷിന്റെ വിജയം. 

Content Highlights: Yuki Bhambri advances into next round of Australian Open qualifiers

Content Highlights: