എക്വഡോറിൽ വൻ കൊക്കെയ്ൻ വേട്ട, പാക്കറ്റിൽ ഹാളണ്ടിന്റെ ചിത്രം, കാരണമിതാണ്

ക്വിറ്റോ (എക്വഡോർ): ഇത്തവണത്തെ ലോകകപ്പിൽ ലോകമെമ്പാടുമുള്ള കാണികൾക്കിടയിൽ വലിയൊരു ആരാധകവൃന്ദത്തെ സമ്പാദിക്കാൻ സാധിച്ച താരമാണ് നോർവെയുടെ എർലിങ് ഹാളണ്ട്. താരത്തിനൊപ്പം തന്നെ ഹാളണ്ട്... ഹാളണ്ട് എന്ന് തുടങ്ങുന്ന പാട്ടും ഹിറ്റായിരുന്നു. എന്നാൽ ഇപ്പോൾ എക്വഡോറിൽ ഹാളണ്ട് വാർത്തകളിൽ നിറയുന്നത് മറ്റൊരു കാര്യത്തിനാണ്.

ഹാളണ്ടിന്റെ ചിത്രം പതിച്ച വൻ കൊക്കെയ്ൻ ശേഖരമാണ് എക്വഡോർ പോലീസ് കഴിഞ്ഞ ദിവസം പിടികൂടിയത്. കൊളംബിയൻ അതിർത്തിയോട് ചേർന്നുള്ള തുൾക്കാൻ നഗരത്തിന് സമീപം ഗ്വാഗ്വാ നെഗ്രോ എന്ന സ്ഥലത്ത് വെച്ചാണ് ട്രക്കിൽ കടത്തുകയായിരുന്ന മയക്കുമരുന്ന് പിടികൂടിയത്. രഹസ്യ വിവരത്തെ തുടർന്ന് നടത്തിയ പരിശോധനയിൽ ട്രക്കിന്റെ രഹസ്യ അറയിൽ ഒളിപ്പിച്ച നിലയിലായിരുന്നു പാക്കറ്റുകൾ.

469 കിലോ ഗ്രാം (1,034 പൗണ്ട്) കൊക്കെയ്‌നാണ് പോലീസ് പിടിച്ചെടുത്തത്. പച്ച നിറത്തിലുള്ള 370 ചതുരശ്ര പാക്കറ്റുകളിലായിട്ടാണ് ലഹരിമരുന്ന് സൂക്ഷിച്ചിരുന്നത്. ഓരോ പാക്കറ്റിലും ഹാളണ്ടിന്റെ ചിത്രമുള്ള സ്റ്റിക്കറുകൾ പതിപ്പിച്ചിരുന്നു.

സംഭവവുമായി ബന്ധപ്പെട്ട് മരിയ ആർ. എന്ന കൊളംബിയൻ തിരിച്ചറിയൽ രേഖകളുള്ള യുവതിയെ പോലീസ് അറസ്റ്റ് ചെയ്തു. പിടിച്ചെടുത്ത ലഹരിമരുന്നിന് പ്രാദേശിക വിപണിയിൽ ഏകദേശം 8.42 ലക്ഷം ഡോളറും, അമേരിക്കയിൽ 1.1 കോടി ഡോളറിലധികവും (ഏകദേശം 92 കോടി രൂപ), യൂറോപ്പിൽ 1.9 കോടി ഡോളറിലധികവും വിലവരും.

മയക്കുമരുന്ന് കടത്തുകാർ തങ്ങളുടെ ഉത്പന്നങ്ങൾ ഏത് ക്രിമിനൽ സംഘത്തിന്റേതാണെന്നും അത് ആർക്കുള്ളതാണെന്നും തിരിച്ചറിയാനായി പ്രമുഖ കായിക താരങ്ങളുടെയോ സെലിബ്രിറ്റികളുടെയോ ചിത്രങ്ങൾ അടയാളമായി ഉപയോഗിക്കുന്നത് പതിവാണെന്ന് പോലീസ് അധികൃതർ വ്യക്തമാക്കി. നേരത്തെ അർജന്റീന താരം ലയണൽ മെസ്സിയുടെ ചിത്രം പതിച്ച പാക്കറ്റുകളും ഇത്തരത്തിൽ പിടികൂടിയിട്ടുണ്ട്. ലോകകപ്പിലെ മികച്ച പ്രകടനത്തിലൂടെയും സമൂഹമാധ്യമങ്ങളിലെ തരംഗമായും മാറിയ ഹാലൻഡിന്റെ പ്രശസ്തിയാണ് ഇത്തരത്തിൽ ഉപയോഗിക്കപ്പെട്ടതെന്ന് കരുതപ്പെടുന്നു.

ലഹരിമരുന്ന് സംഭരിക്കുന്നതിനും അവ അമേരിക്കയിലേക്കും യൂറോപ്പിലേക്കും കടത്തുന്നതിനുമുള്ള ഒരു പ്രധാന കേന്ദ്രമായി എക്വഡോർ മാറിയിരിക്കുകയാണ്. എക്വഡോറിലെ പ്രാദേശിക ഗുണ്ടാസംഘങ്ങൾ കൊളംബിയൻ, മെക്‌സിക്കൻ മയക്കുമരുന്ന് മാഫിയകളുമായി ചേർന്ന് ഇത്തരം പ്രവർത്തനങ്ങൾ നടത്തിവരുന്നു. ഈ വർഷത്തിന്റെ ആദ്യ പകുതിയിൽ മാത്രം ഏകദേശം 80 ടൺ ലഹരിമരുന്നാണ് പോലീസ് പിടിച്ചെടുത്തത്. 2024-ൽ ഇത് റെക്കോർഡ് അളവായ 295 ടണ്ണിലെത്തിയിരുന്നു.

Content Highlights: Ecuadorian police seized 469 kg of cocaine hidden in a truck near Tulcan., Drug packets featured stickers of Norwegian footballer Erling Haaland., A Colombian woman was arrested in connection with the smuggling operation., Cartels use celebrity images like Haaland and Messi to brand their drug batches for identification., Ecuador continues to be a major transit hub for international drug trafficking to the US and Europe.