മൈതാനം നിറഞ്ഞ് 'പേപ്പർ പ്ലെയിനു'കൾ; റയോ വയ്യെക്കാനോ-അത്‌ലറ്റിക് ബിൽബാവോ ലാ ലിഗ മത്സരം ഉപേക്ഷിച്ചു
മാഡ്രിഡ്: ക്ലബ് പ്രസിഡന്റ് റൗൾ മാർട്ടിൻ പ്രെസയ്ക്കെതിരെ ആരാധകർ നടത്തിയ വേറിട്ട പ്രതിഷേധത്തെ തുടർന്ന് റയോ വയ്യെക്കാനോയും അത്‌ലറ്റിക് ബിൽബാവോയും തമ്മിലുള്ള ലാ ലിഗ മത്സരം ഉപേക്ഷിച്ചു. മത്സരത്തിനിടെ ആരാധകർ കളിസ്ഥലത്തേക്ക് പേപ്പർ വിമാനങ്ങളും റബർ പന്തുകളും എറിഞ്ഞതിനെ തുടർന്നാണ് മത്സരം നിർത്തിവെക്കേണ്ടി വന്നത്.
മത്സരം ആരംഭിച്ച് 13-ാം മിനിറ്റിലാണ് പ്രതിഷേധങ്ങൾ ആരംഭിച്ചത്. റയോ വയ്യെക്കാനോ ആരാധകർ ക്ലബ് പ്രസിഡന്റ് റൗൾ മാർട്ടിൻ പ്രെസ ക്ലബ് വിട്ടുപോകണമെന്ന് ആവശ്യപ്പെട്ട് മുദ്രാവാക്യം വിളിക്കുകയും മൈതാനത്തേക്ക് വിവിധ വസ്തുക്കൾ എറിയുകയും ചെയ്യുകയായിരുന്നു. ഇതോടെ കളി താത്കാലികമായി നിർത്തിവെച്ചു. ആരാധകരോട് ശാന്തരാകാൻ സ്റ്റേഡിയം അധികൃതർ അഭ്യർഥിച്ചു.
ഗ്രൗണ്ടിലെ മാലിന്യങ്ങൾ നീക്കം ചെയ്തശേഷം കളി പുനരാരംഭിച്ചെങ്കിലും, 15 മിനിറ്റ് നീണ്ട ഇടവേളയ്ക്ക് ശേഷവും ആരാധകർ പ്രതിഷേധം തുടർന്നു. ഇതോടെ, മത്സരം പൂർണമായി ഉപേക്ഷിക്കാൻ റഫറി തീരുമാനിക്കുകയായിരുന്നു. ഇരു ടീമുകളും ഗോളുകളൊന്നും നേടിയിരുന്നില്ല.
ക്ലബ്ബ് മാനേജ്മെന്റിലും സ്റ്റേഡിയത്തിലെ അടിസ്ഥാന സൗകര്യങ്ങളിലുമുള്ള കടുത്ത അമർഷമാണ് പ്രതിഷേധത്തിന് കാരണമായത്. റയോ വയ്യെക്കാനോയുടെ സ്വന്തം ഗ്രൗണ്ടായ 'എസ്റ്റാഡിയോ ഡി വയ്യെക്കാസ്' ലെജിയോണെയേഴ്‌സ് രോഗം പടരാനുള്ള സാധ്യത ഉൾപ്പെടെയുള്ള ആരോഗ്യ-സുരക്ഷാ പ്രശ്‌നങ്ങൾ കാരണം താത്കാലികമായി അടച്ചിട്ടിരുന്നു.
ഇതിനുപുറമേ, ട്രെയിനിങ് ഗ്രൗണ്ടിന്റെയും പിച്ചിന്റെയും മോശം അവസ്ഥയെക്കുറിച്ച് കളിക്കാർ നേരത്തെ പരാതിപ്പെട്ടിരുന്നു. ശുചീകരണത്തിലെ വീഴ്ചകൾ, ചൂടുവെള്ളത്തിന്റെ ലഭ്യതക്കുറവ്, ടിക്കറ്റ് കൗണ്ടറുകളിലെ നീണ്ട നിര എന്നിവയും വിമർശനങ്ങൾക്കിടയാക്കി. സ്‌പെയിനിലെ ഒന്നാം ഡിവിഷൻ ഫുട്‌ബോൾ ലീഗിൽ സ്വന്തമായി ടിക്കറ്റിങ് വെബ്സൈറ്റ് ഇല്ലാത്ത ഏക ക്ലബ് റയോ വയ്യെക്കാനോയാണ്.
സ്റ്റേഡിയം അടച്ചിട്ടതിനെ തുടർന്ന് സീസണിലെ ആദ്യ മൂന്ന് ഹോം മത്സരങ്ങൾ ലെഗാനെസിലേക്ക് മാറ്റേണ്ടി വന്നതും ആരാധകരുടെ അമർഷത്തിന് കാരണമായി. എന്നാൽ, പ്രാദേശിക അധികാരികൾ തങ്ങളുടെ ക്ലബ്ബിനെ ലക്ഷ്യമിടുകയാണെന്നാണ് പ്രസിഡന്റ് പ്രെസ ആരോപിക്കുന്നത്.
Content Highlights: Rayo Vallecano and Athletic Bilbao La Liga match abandoned due to fan protests., Fans threw paper planes and rubber balls onto the pitch against club president Raul Martin Presa., Protests driven by poor stadium infrastructure, health concerns, and mismanagement., Rayo Vallecano lacks basic facilities including an official ticketing website.